MUZE te Ndawichi hashaha Ngoliate, Abener kapitau wa yizavu ya maswalale a Izalele, yamutwala kuli Saulu. Saulu yawahilila chinji hali Ndawichi. Iye yamusa helu lia tujita twenyi, nawa yamutwala ku zuwo lia mwanangana.

Tangwa likwo, muze ayo te anahiluka ku jita yize ayile ni kwasa ni A-Filistea, mapwo yaputuka kwimba ngwo: ‘Saulu hashaha tununu, alioze Ndawichi hashaha makumi a tununu.’ Maliji wano kanakaneha ukwa kuli Saulu, mumu ayo te kanalemesa chinji Ndawichi kuhianyisa Saulu. Alioze mwana wa Saulu, Jonata, kakevwile ukwa. Iye te kakuzanga chinji Ndawichi, ni Ndawichi neye te kakuzanga chinji Jonata. Ayo eswe ni aali yalilakenya umwe ni mukwo hanga apwe masepa ku matangwa eswe.

Ndawichi te kakwimba kanawa kalialia, nawa Saulu te kakuzanga chinji miaso yenyi. Alioze limwe tangwa ukwa wa Saulu yiumushinjila hanga alinge chuma chipi. Muze te Ndawichi anembi kalialia, Saulu yanda kunga lienyi yaliasa kuli Ndawichi, yamba ngwenyi: ‘Yami mungupalakenya Ndawichi ku chikalakala!’ Alioze Ndawichi yaliehia. Tangwa likwo nawa Saulu yakonga kunga lienyi kuli Ndawichi. Hazehene Ndawichi yanyingika ngwo haliapwila ndo ngukanyame.

Yena uneuluka chilakenyo chize Saulu alingile? Iye kanakamba ngwo mahana mwanenyi wa pwo hanga alimbate ni lunga yoze te mashaha Ngoliate. Ha chino Saulu yamba kuli Ndawichi ngwenyi, yami mungukwaha mwanami Mikale, alioze chitangu yena ndo ushahe 100 wa tujita A-Filistea. Achi nyonga kama! Saulu te kanazange hanga A-Filistea ashehe Ndawichi. Alioze A-Filistea kakahashile kumushaha, hi Saulu yahana mwanenyi hanga apwe pwo lia Ndawichi.

Limwe tangwa, Saulu yalweza Jonata ni tuvumbi twenyi eswe ngwo iye kanazange kushaha Ndawichi. Alioze Jonata yamba kuli tato ngwenyi: ‘Kanda uvulumuna Ndawichi. Iye kanda achikulinga kama upi nilimwe tangwa. Chikwo nawa kakukwasa ha yuma yeswe yize iye alinga. Iye kanakasa mwono wenyi mu utoji hanga ashehe Ngoliate, yena yiuwahilila.’

Saulu yapanjika mwanenyi, nawa iye yalakenya ngwo kechi kuvulumuna Ndawichi. Mba Ndawichi yafuna, nawa iye yaputuka kulingila Saulu ku zuwo lienyi ngwe chize te apwile ni kulinga chitangu. Limwe tangwa, muze te Ndawichi anembi, Saulu yasa nawa kunga lienyi kuli Ndawichi. Ndawichi yaliehia, kunga yilituwa chikalakala. Chisuho chino chili chamuchitatu! Mba Ndawichi yanyingika ngwo changutamba kuchina!

Ha ufuku Ndawichi yaya ku zuwo lienyi. Alioze Saulu yatuma amwe malunga hanga amushahe. Mikale yanyingika yize te tato anambe kulinga. Mba iye yalweza mukwo-lunga ngwenyi: ‘Nyi yena wachinyine ha ufuku uno, hamene uchi kahinduka ni mwono.’ Ufuku uzewene, Mikale yakwasa Ndawichi hanga atuhukile ha kapenda. Ha miaka shimbiali Ndawichi te kakuswama-swama hanga achine kumukwata kuli Saulu.