YENA unanyingika mumu liaka lunga au anasuwa chikuto chenyi mu yihanda? Yehova mwe wamwamba hanga achilinge. Lunga au jina lienyi Ahija kali profeta wa Zambi. Yena unanyingika profeta iya? Profeta kali umwe mutu yoze Zambi akulweza yuma yize muyipwa kulutwe lia matangwa.

Tunamono ha chizulie Ahija kanahanjika ni Joroboame. Joroboame kali umwe lunga yoze Solomone asele ngwe kasongwelo wa milimo ya utungilo wa tembele. Muze Ahija aliwanyine ni Joroboame mu tapalo, iye yalinga chimwe chuma. Ahija yakwata chikuto chenyi chaha te anazala yachisuwa mu yihanda 12. Iye yamba kuli Joroboame ngwenyi: ‘Tambula 10 lia yihanda, ya yena.’ Yena unanyingika mumu liaka Ahija ahana 10 lia yihanda kuli Joroboame?

Ahija yalumbununa ngwo Yehova machiza wanangana kuli Solomone. Iye yamba ngwo Yehova mahana 10 lia minyachi kuli Joroboame. Chino chinalumbunuka ngwo minyachi yaali wika ye te muyisala kuli Rehoboame mwana wa Solomone hanga ayiyule.

Muze Solomone te hevwa yize Ahija ambile kuli Joroboame, iye yevwa uli unji. Iye yafupa kushaha Joroboame. Alioze Joroboame yachinyina ku Engitu. Kulutwe lia matangwa Solomone yafwa. Iye kanakayula mu unji wa 40 a miaka, mba hi mwanenyi Rehoboame yapwa mwanangana. Joroboame ku Engitu yevwa ngwo Solomone hafwa kulu, chocho iye yafuna mu Izalele.

Rehoboame te hi mwanangana mupema ko. Iye te mupi chinji kuli atu kuhianyisa tato Solomone. Joroboame ni malunga akwo alemu yaya ni kwita kuli mwanangana Rehoboame hanga iye afunge kanawa atu. Alioze Rehoboame kakapalileko. Ha chino iye yapwa mukalu chinji. Kashika atu yapwisa Joroboame mwanangana wa 10 lia minyachi, alioze minyachi yaali wa Mbejamine ni wa Yunda yiyinunga kupwa ya Rehoboame ngwe mwanangana wo.

Joroboame kakazangile hanga atu aye ku Yerusaleme ni kuwayila mu tembele ya Yehova. Kashika iye yalinga ana-a-ngombe aali a oru hanga 10 lia minyachi awayile. Hi ha mashimbu akehe chifuchi yichizala too ni utoji hamwe ni upupilo.

Nawa ku wanangana wa minyachi yaali ni neko kwapwile kapinda munji. Ha kupalika cha yimwe miaka yitano, muze Rehoboame te hapwa kulu mwanangana, mwanangana wa Engitu yeza ni kwasa jita ni Yerusaleme. Iye yambata upite unji wa mu tembele ya Yehova. Kashika, ha mashimbu akehe tembele yiyipwa yahululu.