YIKA yinapu aha? Atu kali ha chimwe chiwanyino chinene. Mwanangana wa Babilonia yasanyika kanunu ka atu alemu. Ayo te kananwina mu misenge ya oru ni ya prata, nawa te kanalila ha mambashila jize anjile mu tembele ya Yehova ku Yerusaleme. Alioze, hi susumuku, yikusoloka ha matetela kwoko lia umwe lunga yiliputuka kusoneka ku chikalakala. Eswe yevwa woma.

Belteshazare, mujikulu wa Nabukanezore, te hapwa mwanangana. Iye yatuma kusanyika akwa mana jenyi eswe hanga eze. Mwanagana yamba ngwenyi: ‘Mweswawo mahasa kutanga sona jino nikungulweza ulumbunwiso wajo, mungumwaha yawana yinji, nawa mapwa mukwa kuyula mulemu wamuchitatu mu wanangana.’ Alioze niumwe wa kuli akwa mana wahashile kutanga sona jize te jili ku chikalakala wakwihi, chipwe kulweza ulumbunwiso wajo.

Naye ya mwanangana yevwa zungo yeza mu chipatulo cha kulila. Iye yamba kuli mwanangana ngwenyi: ‘Kanda wivwa woma. ‘Mu wanangana we muli umwe lunga kananyingika tuzambi asandu. Muze kakenu Nabukanazore te uchili mwanangana, iye kamusele mukwa lutwe wa malunga jenyi eswe akwa mana. Jina lienyi Daniele. Tuma hanga amusanyike, nawa iye makulweza ulumbunwiso wajo weswe.’

Mba ayo yaneha mwe Daniele. Muze Daniele halituna yawana yeswe, mba yaputuka kulumbununa chitela cha mumu liaka Yehova anakachiza wanangana kuli Nabukanazore, kako ya Belteshazare. Daniele yamba ngwenyi: ‘Iye te kakulizata chinji. Kashika Yehova anakamumwesa lamba.’

Daniele yamba kuli Belteshazare ngwenyi: ‘Yena unanyingika yeswe yize yinakapwa kuli iye, ni yena hiwalizata ngwe chize Nabukanazore apwile. Hi watuma kusaka mambashila ni misenge ya mu tembele ya Yehova, nawa unanwinamo. Yena hiwahalisa tuzambi a mitondo ni a mawe, nawa yena kuwalemesene Sakatanga wetu Munene. Kashika, Zambi atuma kwoko hanga lisoneke maliji wano.

Daniele yamba ngwenyi: ‘Yino ye asonekoho: MENE, MENE, TEKELE, UFARSINE.’

‘MENE, chinalumbunuka ngwo Zambi hanalula matangwa ja wanangana we, waze uli no nawa maasulisa. TEKELE, chinalumbunuka ngwo yena hakweseka ha mbalansa, nawa hakuwana uli wamokomoko. UFARSINE, chinalumbunuka ngwo wanangana we mauhana kuli A-Media ni A-Pesia.’

Muze Daniele te machihanjika, A-Midia ni A-Persia yaputuka kupupa Babilonia. Ayo yatambula mbonge, nawa yashaha Belteshazare. Chisoneko cha ku chikalakala yichimanunuka ha ufuku uzewene. Alioze, mba yika muyipwa te kuli A-Izalele? Mutuyinyingika kulutwe, alioze chitangu tutalenu yize yinakapwa kuli Daniele.