CHAMWENEMWENE Yesu kanasoloka ngwo kali ni uli unji, ni ngwami? Yena unanyingika mumu liaka iye ali ni uli? Mumu malunga wano ali mu tembele ya Zambi mu Yerusaleme chipululu chinji akwete. Ayo kakuzanga kuzuka mbongo jinji ja atu waze akwiza ni kuwayila Zambi.

Yena unamona ngombe ni mapanga eswe hamwe ni membe? Mba, malunga wano kanalanjishila tushitu jacho muzemwene mu tembele. Yena unanyingika mumu liaka? Mumu A-Izalele te kakulambula yitapo ya tushitu ni tujila kuli Zambi.

Shimbi ya Zambi te yakwamba ngwo nyi umwe Ka-Izalele malinga umwe upi, iye ndo te chatamba kuhana mulambu kuli Zambi. Nawa kwapwile mashimbu akwo waze A-Izalele ndo te ahane mulambu. Alioze kulihi te umwe Ka-Izalele mahasa kuwana tujila ni tushitu hanga alambule kuli Zambi?

Amwe A-Izalele te katwete tujila ni tushitu. Kashika, ayo te mahasa kwahana ngwe mulambu. Alioze, A-Izalele anji te keshi ni tushitu hanji tujila. Nawa akwo te katwama kusuku ni Yerusaleme, kashika ayo te keshi kuhasa kwiza ni tushitu jo ku tembele. Kashika, atu te kakwiza ni kulanda tushitu hanji tujila waze ayo te akufupa. Alioze, malunga wano te kakwita ndando yikalu chinji. Ayo te kakwonga atu. Chipwe chocho, ayo te katelele kulingila mingoso yacho mu tembele ya Zambi.

Yuma yacho yinakaneha uli unji kuli Yesu. Kashika, iye yalimbula meza jize te jili ni mbongo ja malunga jacho, nawa yamwanga mbongo jeswe. Nawa iye yahosa shikote ya mihipu mba yatuhwisa tushitu eswe haze lia tembele. Iye yamba kuli malunga waze te akulanjisa membe ngwenyi: ‘Twalenu yuma ai haze! Kanda nupwisa zuwo lia Tata ngwe chimwe chihela cha kufupila mbongo.’

Amwe tumbaji twa Yesu noo kanakaya nenyi ku tembele mu Yerusaleme. Ayo eswe yakomoka hakumona yize te Yesu analinga. Hohene ayo yeuluka haze te hanasonewa mu Mbimbiliya hakutwala kuli Mwana wa Zambi ngwo: ‘Zango ha zuwo lia Zambi mulikasasaminya muli iye ngwe kahia.’

Muze te Yesu uchili mu Yerusaleme ha Chizomboka, iye yalinga yikomokeso yinji. Kulutwe lia matangwa, Yesu yahichika Yunda yaputuka kulinga wenyi hanga afune ku Ngalileya. Alioze mujila, iye yanjila mu mbonge ya Samaria. Tutalenu yize yapwile ko.