MUZE ayo te hafwambuka mu chipatulo cha kwilu, Yesu ni apostolo jenyi yaya ku munda wa Ngetesemane. Ayo te kakuyayako mashimbu eswe. Yesu yamba kuli tumbaji twenyi hanga alaule nawa ni kulemba. Mba iye yasosoloka ndambu kulutwe, yaliumba hanga alembe.

Mba Yesu yafuna haze te ali apostolo jenyi. Yika yena wanyonga ngwo ayo te analinga? Ayo te mutulo ali! Ha yisuho yitatu Yesu yaalweza ngwo ayo te chaatamba kulaula, alioze ha yisuho yeswe yitatu iye yaawana mutulo. Iye yaahula ngwenyi: ‘Kuchi yenwe nunapomba ha ola yino?’ Yesu yalinga chihula chino ha chisuho cha kasula. Yamba nawa ngwenyi: ‘Ola hiyaheta hanga angukunjike kuli akwa kole jami.’

Ha mashimbu waze ene, ayo yevwa zungo lia mbunga yinene. Tala kama! Hikweza amwe malunga anambata tutana ni mbwechi! Nawa ayo te kanambate kahia hanga alitemwine nako. Muze ayo yakundama hakamwihi, umwe lunga yakatuka mukachi ka mbunga yacho yeza kuli Yesu. Iye yamwaha mbeju, ngwe chize unamono ha chizulie. Lunga wacho kali Yundase Ka-Keriote. Mumu liaka iye ambejala Yesu?

Yesu yamuhula ngwenyi: ‘Yundase, yena unangukunjika ni yimwe mbeju ngwami?’ Chochone, mbeju te chilayi cha kumukunjika nacho. Hi chocho, malunga waze ejile ni Yundase yanyingika ngwo auze mwe Yesu, yoze te anazange. Hi akwa kole ja Yesu yaya ni kumukwata. Alioze Petulu te kanazange kulilamba no hanga achine kumbata Yesu. Kashika iye yatomona katana wenyi yamulamba kuli lunga yoze te alinenyi hakamwihi. Alioze katana kakahetele mu mutwe, yamuteta wika twitwi. Alioze Yesu yakwata twitwi lia lunga wacho yaliwuka.

Yesu yamba kuli Petulu ngwenyi: ‘Tomeka katana we mu chindalo. Yena wanyingikine ngwo yami munguhasa kwita kuli Tata tununu twa angelo hanga angulamwine?’ Ewa, iye te mahasa kwita! Alioze, Yesu kaketele kuli Zambi mungelo niumwe, mumu iye te kananyingika ngwo mashimbu haheta hanga akwa kole jenyi amukwate. Kashika iye yecha hanga amumbate kwenyi. Tutalenu yize yapwa kuli Yesu haliapwila.