YESU yamana hanga ahwime ha limwe shima lia meya mu Samaria. Tumbaji twenyi te haya ni kulanda kulia mu mbonge. Pwo yoze Yesu anahanjika nenyi keza ni kutaha meya. Yesu yamba kuli iye ngwenyi: ‘Penu kama meya ngunwe.’

Ha chino pwo wacho yakomoka chinji. Yena unanyingika mumu liaka? Mumu Yesu te Ka-Yunda, alioze pwo wacho te Ka-Samaria. Nawa A-Yunda anji te keshi kuzanga A-Samaria. Nawa ayo te keshi kulihanjikisa! Alioze Yesu te kakuzanga upeme hali atu eswe. Kashika iye yamba kuli pwo wacho ngwenyi: ‘Nyi te yena unanyingika yoze unambe kuli yena ngwenyi penu kama meya ngunwe, kachi yena weta kuli iye meya mba iye makwaha meya a mwono.’

Pwo wacho yamba kuli iye ngwenyi: ‘Mwata, yena kuushi ni chuma cha kuswita nacho meya, mumu shima lili lisuku. Mba kulihi yena muwana meya jacho a mwono?’

Yesu yamukumbulula ngwenyi: ‘Nyi yena wanwa meya wano muwivwa nawa pwila. Alioze meya aze Yami munguhana makapwisa mutu ni mwono wa miaka yeswe.’

Pwo yamba kuli iye ngwenyi: ‘Mwata, penu kama meya jacho! Hanga Yami nguchine kwivwa nawa pwila. Nawa yami nguchine kwiza kuno ni kutaha meya.’

Pwo wacho yanyonga ngwo Yesu te kanahanjika hakutwala ku meya waze twakunwa. Alioze iye te kanahanjika hakutwala ku umwenemwene wa Zambi ni ku wanangana wenyi. Umwenemwene wacho uli ngwe meya waze akuhana mwono. Muuhasa kuhana mwono wa mutolo kuli mutu.

Yesu yamba kuli pwo wacho ngwenyi: ‘Yako utambike mukwenu-lunga hanga wize nawa kuno.’

Pwo yamukumbulula ngwenyi: ‘Yami chishi ni lunga.’

Yesu yamba kuli iye ngwenyi: ‘Yena hiwamba umwenemwene. Alioze yena wapwile ni malunga atano, nawa chipwe yoze ulinenyi haliapwila hi lunga lie ko.’

Pwo yakomoka, mumu yuma yeswe te yili yamwenemwene. Kuchi Yesu anyingikine yuma jacho? Yesu te kanayinyingika, mumu iye te Mwe Chilakenyo wa Zambi, nawa Zambi mwe wamuhele sango jacho. Hohene tumbaji twenyi yeza, yakomoka ha kumona chize iye anahanjika niumwe pwo Ka-Samaria.

Yika yetwe twalilongesa ha yino yuma? Twalilongesa ngwo Yesu kanakapwa ni zango kuli atu a ku minyachi yeswe. Nawa ni yetwe chatutamba kumwimbulula. Yetwe chatutambile kunyonga ngwo amwe atu kali api mumu ayo kali a ku minyachi yeka. Yesu kanazanga ngwo atu eswe anyingike umwenemwene uze wakusongwela ku mwono wa miaka yeswe. Nawa yetwe chatutamba kukwasa atu hanga alilongese umwenemwene wacho.