KANUKE au wa pwo unamono hano kali ni miaka 12. Yesu kanamukwata ku kwoko, nawa tato ni naye kali hakamwihi. Yena unanyingika mumu liaka ayo anawahilila chinji? Tutalenu.

Kanuke au wa pwo tato te umwe lunga mulemu, jina lienyi Yaru. Limwe tangwa, mwanenyi yayiza, ayo yamupombesa ha muhela. Alioze mwana wacho nihindu te kanayiza. Yikola yiyoka chinji. Yaru ni mukwo-pwo yalipikala chinji, mumu mwana te kanasoloka ngwe kumafwa. Ayo te mwana yomwene umuwika akwete. Kashika Yaru yaya ni kufupa Yesu. Mumu iye te hanevu hakutwala ku yikomokeso yize Yesu anakalinga.

Muze Yaru hawana Yesu, iye te kali mukachi ka mbunga yinene te yinamujingilika. Alioze Yaru yahasa kupalika, yafulamana ku molu ja Yesu. Iye yamba ngwenyi: ‘Mwanami kanayiji chinji.’ Nawa iye yeta kuli Yesu ngwenyi, ‘Ngunaliumbu tweya kama umuwuke.’ Yesu yamba ngwo te kumaya.

Muze te ayo anende, mbunga ya atu te yinaapalakenya chinji. Susumuku Yesu yamana. Iye yahula ngwenyi: ‘Iya wangukwata?’ Yesu yevwa ngwo mu mujimba wenyi mwakatuka ndundo, hohene iye yanyingika ngwo umwe mutu wamukwata. Mutu wacho te iya? Te umwe pwo yoze uli ni yikola yize te hiyalinga miaka 12. Pwo wacho yeza yakwata ku mahina ja Yesu, chocho yapwa kuwuka!

Muze hamona chino Yaru yawahilila, mumu iye yahasa kumona chize chile chashi kuli Yesu kuwuka mweswao. Alioze yikuheta umwe mukeji. Yalweza kuli Yaru ngwenyi: ‘Kanda upinjisa nawa Yesu. Mumu mwane hafwa kulu.’ Alioze Yesu hakwivwa chino yamulweza ngwenyi: ‘Kanda ulipikala, mwane kumahinduka.’

Muze haheta ku zuwo lia Yaru, yawana atu te kanalila mbimbi jinji. Alioze Yesu yamba ngwenyi: ‘Kanda nulila. Mwana kafwile. Iye kali mu tulo.’ Ayo yaputuka kuseha Yesu ni kumukekuna, mumu ayo te kananyingika ngwo mwana hafwa kulu.

Chocho Yesu yaya ni yisemi ja mwana wacho hamwe ni apostolo jenyi atatu ku chipatulo chize te ali mwana. Iye yakwata kwoko lia mwana mba yamba ngwenyi: ‘Hinduka!’ Chocho mwana yahinduka, ngwe chize yena unamono ha chizulie. Nawa iye yakatuka yaputuka kwenda! Kashika tato ni naye anawahilila chinji.

Yono hi mutu mutangu ko wika yoze Yesu anakahindwisa mu ufwe. Alioze Mutu mutangu yoze Mbimbiliya yinatulweze kali mwana wa umwe tuliwa te watwama mu mbonge ya Naine. Kusuloho, Yesu yahindwisa nawa Lazaru mu ufwe, ndumbu ya Maria ni Marta. Haliapwila Yesu kanayula ngwe mwangana mu wanangana wa Zambi, iye makahindwisa atu anji waze hanafu. Shina yetwe tuchi kuhasa kuwahilila ha yino?