CHUMA chipi chinji chapwako. Yoano Chipapachisa kamushaha. Horondeya pwo lia mwanangana, te keshi kumuzanga. Kashika iye yashinjila mwanangana hanga atume kuteta mutwe wa Yoano.

Muze Yesu hachivwa iye yevwa chinyengo chinji. Iye yaya ni kutwama ku chimwe chihela chaukawenyi. Alioze atu yamukaula. Muze Yesu hamona mbunga ya atu jacho, iye yeevwila keke. Chocho iye yaputuka kwalongesa hakutwala ku Wanangana wa Zambi, nawa yauka yikola ya waze te anayiza.

Ha chingoloshi tumbaji twenyi yeza kuli iye yamba ngwo: ‘Hi kwatoka, nawa chihela chino chahola. Tuma atu aye kwo, hanga ahase kulanda kulia ku yihunda yize yili hakamwihi.’

Yesu yaakumbulula ngwenyi: ‘Ayo chaatambile kuya kwo. Ehenu chimwe kulia.’ Yesu yateuluka kuli Filipe, yamuhula ngwenyi: ‘Kulihi mutuhasa kulanda kulia cha atu apwahaha?’

Filipe yamukumbulula ngwenyi: ‘Muchifika mbongo jinji hakulanda kulia cha atu apwahaha, hanga eswe apwe ni yimwe ya kulia. Andeleu yamba ngwenyi: ‘Kanuke au unambata kulia chetu, kali ni mbolo jitano ni yishi aali. Alioze chichi kukumbana hali eswe.’

Yesu yamba ngwenyi: ‘Lwezenu atu hanga atwame hashi. Chocho iye yasakwilila kuli Zambi ha kulia chacho, hi yaputuka kuteta kulia chacho mu yihanda. Mba, tumbaji yahana mbolo ni yishi kuli atu eswe. Kwapwile 5,000 a malunga ni tununu a mapwo hamwe ni twanuke. Ayo eswe yalia nawa yakumbana. Nawa muze tumbaji hakunga kulia chize chinakasaloho, ayo yazalisa mitonga 12.

Mba Yesu yatuma tumbaji twenyi anjile mu ulungu hanga azauke Kalunga-lwiji wa Ngalileya. Ha mashimbu a ufuku yikwiza yimwe fuji yinene chinji, nawa mikanya ya meya yiyipinjisa ulungu sali ni sali. Tumbaji yevwa woma unji. Ha muchima ufuku, ayo yamona umwe mutu kanende helu lia meya. Ayo yaputuka kukololoka ni woma weswe, mumu te kaso kunyingika iya auzemweme.

Yesu yamba ngwenyi: ‘Kanda nwivwa woma. Yami Yesu!’ Ayo nihindu kamutayijile. Chocho Petulu yamba ngwenyi: ‘Nyi chamwenemwene nuli yenwe, Mwene wetu, ngwambenu hanga ngwende helu lia meya hanga ngwize kuli yenwe.’ Yesu yamukumbulula ngwenyi: ‘Ewa, tweya!’ Chocho Petulu yakatuka mu ulungu nawa yaputuka kwenda helu lia meya! Hi iye yevwa woma mba yaputuka kushimbama, alioze Yesu yamulamwina.

Kulutwe lia matangwa, Yesu yalisa nawa tununu twa atu akwo. Ha shimbu liacho iye yachilinga ni mbolo shimbiali ni tumwe tuyishi. Nawa atu eswe yakumbana. Hi kukomoka ko ha chize te Yesu akufunga atu? Muze Yesu makaputuka kuyula hano hashi, yetwe tuchi kapwa ni yipikalo ni yimwe!