MUZE Yesu te akwendangana mu chifuchi iye te kakuwuka mieji. Sango ja yikomokeso yacho yajambujola ku yihunda, ku mambonge ni sali lieswe lia chifuchi. Kashika, atu te akuneha kuli iye yitonji, tupuputa, tunaye nawa ni atu akwo anji waze te ayiza. Yesu te kakuuka eswe.

Te hi kwapalika miaka yitatu chize muze Yoano apapachishile Yesu. Mba Yesu yamba kuli apostolo jenyi ngwo kwasala hakehe hanga aye ku Yerusaleme, kwokwene iye makamushaha, alioze makahinduka mu ufwe. Ha mashimbu jacho, Yesu yanunga ni kuwuka mieji.

Limwe tangwa, Yesu te kanalongesa ha tangwa lia Sambata. Sambata lili limwe tangwa lize te A-Yunda akuhwima. Pwo yono yena unamono ha chizulie te kayiza chinji. Ha miaka 18 pwo wacho te kafumbama, te keshi kuhasa kwoloka. Yesu yasa kwoko lienyi hali iye, chocho pwo wacho yoloka. Pwo wacho yapwa kuwuka!

Mangana a ulembelo yevwa uli unji ha chino chuma. Umwe wa kuli ayo yakololoka kuli mbunga ngwenyi: ‘Kuli matangwa asambano waze yetwe chatamba kukalakala. Wano e matangwa akuwuka, hi mu Sambata ko!’

Alioze Yesu yamukumbulula ngwenyi: ‘Yenwe nuli malunga api chinji. Yenwe eswe nwakukasulula chimbulu wenu hanga nuye nenyi anwe meya ha Sambata. Chatambile pwo yono chiswale te wayiza ha miaka 18, kumuwuka ha Sambata?’ Kumbululo lia Yesu linakaneha sonyi jinji kuli malunga jacho api.

Mba hi Yesu hamwe ni apostolo jenyi yakatuka hanga aye ku Yerusaleme. Muze ayo te anatuhuka mu mbonge ya Yeriku, amwe tupuputa aali yevwa ngwo Yesu kanapalika. Chocho ayo yakololoka ngwo: ‘Yesu tukwase kama!’

Yesu yasanyika tupuputa jacho yaahula ngwenyi: ‘Yika yenwe nunazange hanga ngunulingile?’ Ayo yakumbulula ngwo: ‘Mwene, lawisa kama meso jetu.’ Yesu yakwata mu meso jo, chocho ayo yaputuka kumona. Yena unanyingika mumu liaka Yesu te akulinga yikomokeso yeswe ai? Mumu iye te kakuzanga chinji atu, nawa te kanazange ngwo atu apwe ni ufulielo kuli iye. Kashika, ni yetwe mutuhasa kupwa ni ushindakenyo ngwo muze iye mayula ngwe Mwanangana hano hashi, niumwe makayiza nawa wakwihi.