TALA mungelo unakwata ku chikolo chawashi cha ku zuwo lia ususu. Malunga waze iye anatusula kali apostolo ja Yesu. Tutalenu mumu liaka ayo anakaasa mu zuwo lia ususu.

Yino yapwile te hikwapalika mashimbu akehe chize muze tumbaji twa Yesu atambwile spiritu yisandu. Chapwile chino: Ha chingoloshi Petulu ni Yoano yaya ku tembele ya mu Yerusaleme. Kuzekwene, hakamwihi ni chikolo te kuli umwe lunga chitonji chize muze asemukine. Atu te kakumutwala matangwa eswe kuzekwene hanga ete falanga kuli waze te akwiza mu tembele. Muze iye hamona Petulu ni Yoano, iye yaputuka kwita kuli ayo umwe ukwaso. Yika apostolo anakalinga?

Ayo yamana yatala kuli lunga wacho. Petulu yamukumbulula ngwenyi: ‘Yami chishi ni mbongo, alioze yami mungukwaha yize ngulinayo. Mu jina lia Yesu, katuka wende!’ Petulu yamukwata ku kwoko lia chindume chocho iye yakatuka yaputuka kwenda. Muze atu achimwene, ayo yakomoka nawa yawahilila chinji ha chikomokeso chacho.

Petulu yamba ngwenyi: ‘Yetwe twalinga chikomokeso chino ku ndundo ja Zambi, yoze unakahindwisa Yesu mu ufwe.’ Muze te iye ni Yoano machihanjika, amwe mangana a ulembelo yeza hazehene. Ayo te uli unji anevu mumu Petulu ni Yoano te kanalweze atu hakutwala kuli Yesu yoze anakahindwisa mu ufwe. Kashika ayo yakwata Petulu ni Yoano, nawa yaasa mu zuwo lia ususu.

Ha tangwa lize linakasuloho, mangana a ulembelo yalinga umwe ukungululo unene. Ayo yatuma kuneha Petulu ni Yoano, hamwe ni lunga yoze ayo anakawuka. Mangana yahula kuli Petulu ni Yoano ngwo: ‘Ni ndundo jaya yenwe nwalinga chikomokeso chino?’

Petulu yakumbulula ngwo chino chalingiwa ni ndundo ja Zambi, yoze unakahindwisa Yesu mu ufwe. Asasendote kakamwene chize te malinga, mumu ayo te kechi kuhasa kuhangulula umwenemwene wa chikomokeso chize chinakalingiwa. Chocho ayo yakanjisa apostolo hanga eche kuhanjika ni atu hakutwala kuli Yesu, mba hi yatusula hanga aye.

Kulutwe lia matangwa, apostolo yanunga ni kwambujola hakutwala kuli Yesu ni kuwuka mieji. Sango ja yikomokeso yacho yijiya kusuku. Nawa chipwe atu waze te atunga ku membo waze te atwama hakamwihi ni Yerusaleme yaneha mieji kuli apostolo hanga awuke. Yino yinakaneha ukwa kuli mangana a ulembelo, kashika ayo yakwata apostolo yaasa nawa mu zuwo lia ususu. Alioze ayo kakalingilemo mashimbu anji.

Ha mashimbu a ufuku mungelo wa Zambi yazulula chajilo cha zuwo lia ususu, ngwe chize yena unamono ha chizulie. Mungelo yamba ngwenyi: ‘Yenu nukamane mu tembele, hanga nukanunge ni kuhanjika kuli atu.’ Ha chimene chize chinakasuloho, muze mangana a ulembelo hatuma malunga ku zuwo lia ususu hanga anehe apostolo, ayo kakaawanyinemo. Alioze malunga jacho yawana apostolo te kanalongesa mu tembele, chocho yatwala ku chipatulo cha Sinedrio.

Mangana a ulembelo yamba ngwo: ‘Yetwe tunakanukanjisa ngwetu, kanda nulongesa nawa mu jina lia Yesu ni limwe tangwa. Alioze yenwe hinwazalisa Yerusaleme ni malongeso jenu.’ Apostolo yakumbulula ngwo: ‘Yetwe chitangu chatutamba kwononokena kuli Zambi ngwe mwanangana, hi kuli atu ko.’ Chocho ayo yanunga pundu ni kwambujola “sango jipema.” Hi chilweza ko chipema chize yetwe chatutamba kukaula?