ATU wano kali tumbaji twa Yesu. Ayo yononoka nawa yanunga mu Yerusaleme. Mba muze te ayo eswe anatwaminyina hamuwika, umwe lundunjila munene yazalisa zuwo lieswe. Lundunjila wacho te ngwe chijimbi. Hi ha mitwe ya tumbaji eswe yihasoloka malimi ngwe milengi ya kahia. Yena unamono kahia helu lia mitwe yo? Yika yino yeswe yinalumbunuka?

Te chimwe chikomokeso! Yesu te hafuna kulu mu malilu kuli Tato, nawa iye te kanahana spiritu yisandu ya Zambi kuli tumbaji twenyi. Yena unanyingika yize spiritu yacho yinakaakwasa kulinga? Ayo eswe yaputuka kuhanjika mu malimi eka ni eka.

Atu anji mu Yerusaleme kanakevwa lundunjila wacho ngwe wa chijimbi, nawa yeza hanga atale yize te yinapuko. Amwe a kuli atu jacho te a ku mavungu eka, ayo kejile ku chiwanyino cha A-Izalele cha Pentekoste. Chino chinakapwa chikomokeso kuli ngeji jacho! Ayo yevwa tumbaji kanahanjika mu malimi jo hakutwala ku yuma yaukomokeso yize Zambi anakalinga.

Ngeji jacho yamba ngwo: ‘Atu wano a ku Ngalileya. Kuchi mba, ayo anahasa kuhanjika mu malimi eka ni eka a ku yifuchi yize twakatukanga?’

Hohene Petulu yaputuka kwaalumbunwina. Iye yahanjika ni liji linene ni kulweza kuli atu chize Yesu amushahile ni chize Yehova amuhindwishile mu ufwe. Petulu yamba ngwenyi: ‘Haliapwila Yesu kali ku kwoko lia chindume lia Zambi mu malilu. Nawa iye katuma spiritu musandu yize anakalakenya. Kashika yenwe nwevwa nawa nwamona yikomokeso yacho.’

Mba, muze Petulu hamba yino yuma, atu anji yevwa yinyengo yinji ha yize anakalinga kuli Yesu. Kashika ayo yahula ngwo: ‘Yika mba yetwe chatutamba kulinga? Petulu yaalweza ngwenyi: ‘Yenwe chanutamba kwalumuna mbunge jenu nawa ni kulipapachisa.’ Ha tangwa lizeliene amwe 3,000 a atu yalipapachisa mba yapwa tumbaji twa Yesu.