YENA unanyingika iya au unapombo hashi? Jina lienyi Saulu. Euluka, ngwo iye mwe unakafunga mahina ja malunga waze anakashaha Eshetevau ni mawe. Tala pangu alize! Yika mba yinapuko?

Muze te Eshetevau hamushaha, Saulu yapwa kasongwelo hanga aye ni kuhungumiona tumbaji twa Yesu. Iye te kakunjila mu zuwo ni zuwo hanga atuhwise tumbaji haze ni kwatwala mu zuwo lia ususu. Tumbaji anji yachinyina ku mambonge akwo, nawa ayo yaputuka kwambujola “sango jipema” kokwene. Alioze Saulu yaya ku mambonge akwo hanga afupileko tumbaji twa Yesu. Ha chino iye yaya mu jila ya Ndamaseku. Mba, muzemwene mu jila, yikupwa chimwe chikomokeso:

Susumuku, limwe pangu lia mwilu yilipanguluka hali Saulu. Iye yalimbuka hashi, ngwe chize tunamono ha chizulie. Hohene limwe liji yiliamba ngwo: ‘Saulu, Saulu! Mumu liaka yena unanguhungumiona?’ Malunga waze apwile hamwe ni Saulu yamona pangu nawa yevwa zungo lia liji, alioze ayo kakanyingikine nichimwe.

Saulu yahula ngwenyi: ‘Mwene, yena iya?’

‘Yami Yesu yoze yena unahungumiona,’ liji yiliamba chocho. Yesu yamba liji lino, mumu upi uze te Saulu akulinga kuli tumbaji twenyi, Yesu te kakwivwa ngwe hali iye akuulinga.

Saulu yahula ngwenyi: ‘Mwene, yika yami changutamba kulinga?’

Yesu yamwamba ngwenyi: ‘Katuka hanga uye ku Ndamaseku. Kwenako makakulweza yize yena chakutamba kulinga.’ Mba Saulu yakatuka, alioze muze iye hazulula meso jenyi, kahashile kumona nichimwe. Iye yapwa kapuputa! Malunga waze apwile hamwe ni iye yamukwata ku kwoko nawa yamusongwela ndo mu Ndamaseku.

Yesu yahanjika haliapwila ni umwe wa kuli tumbaji twenyi mu Ndamaseku, ngwenyi: ‘Ananiya, katuka. Yako mu tapalo yize anavuluka ngwo Yalulama. Ku zuwo lia Yundase hanga ukafupe umwe lunga jina lienyi Saulu. Yami namusakula hanga apwe kavumbi kami mulemu.’

Ananiya yononoka. Muze iye hawana Saulu, yasa moko jenyi hali Saulu nawa yamba ngwenyi: ‘Mwene kangutuma kuli yena hanga ulaule nawa hanga upwe wa too ni spiritu musandu.’ Hazehene mu meso ja Saulu yimuholoka yuma ngwe yihahi, mba iye yaputuka kumona cheka.

Ni ndundo jeswe Saulu yamutuma hanga ambujole sango jipema kuli akwa mavungu anji. Hi iye yapwa kunyingika ni jina lia postolo Paulu, mba mutulilongesa yuma yinji hakutwala kuli iye. Alioze chitangu, tutalenu yika Zambi anakatuma Petulu hanga alinge.