TALA lenge kuli Paulu, nawa tala kuli maswalale A-Roma waze anamufunga. Paulu kali mu ufunge mu Roma. Iye kanashimbwila hanga Ka-Roma Sesare akwate chiyulo ha yize malinga hali iye. Muze te iye uchili mu ufunge, atu te kakuya ni kumumeneka.

Chize muze Paulu ahetele ku Roma te hikwapalika matangwa atatu, mba iye yatuma kusanyika amwe tusongwelo A-Yunda hanga eze ni kumutala. Mba A-Yunda anji mu Roma yeza ni kumutala. Paulu yambujola kuli ayo hakutwala kuli Yesu ni ku wanangana wa Zambi. Amwe yatayiza nawa yapwa akwa Kristu, alioze akwo kakatayijile.

Paulu yambujola nawa kuli maswalale eka ni eka waze apwile ni kumufunga. Ha miaka yaali yize alingile mu ufunge, Paulu te kakwambujola sango jipema kuli mweswao yoze te iye mahasa kwambujola. Kashika, chipwe akwa zuwo lia Sesare kanakevwa hakutwala ku sango jipema ja wanangana, nawa amwe a kuli ayo kanakapwa akwa Kristu.

Mba alioze ngeji au unasoneka ha meza iya? Yena muhasa kutongola mukweze au iya? Ewa, kali Timoteu. Timoteu neye kapwile mu ufunge ha mukunda wa kwambujola sango ja Wanangana, alioze iye te hanamutusula. Mba iye yeza hanga akwase Paulu. Yena unanyingika yize Timoteu anasoneka? Tutalenu.

Yena uneuluka mambonge a Fwilipu ni Efwesu mu Chishima 110? Paulu kanakakwasa kwazulula yikungulwila ya akwa Kristu yaha mu mambonge jacho. Haliapwila, muze iye te uchili mu zuwo lia ususu, Paulu yasonekena akwa Kristu jacho mikanda. Mikanda yacho yili mu Mbimbiliya, nawa kakuyivuluka ngwo A-Efwesu ni A-Fwilipu. Haliapwila Paulu kanalweze Timoteu yuma yize masonekena masepa jenyi mu Fwilipu.

A-Fwilipu kanakasolola umbovu unji kuli Paulu. Ayo yatuma chawana kuli Paulu mu ufunge, ha chino Paulu yasakwilila chinji kuli ayo. Epafwonditu iye mwe lunga yoze wanehene chawana chacho. Mba alioze iye yayiza yamba kufwa. Muze iye te hahinduka yalilulieka hanga afune ku zuwo. Iye te mwe mambata mukanda wacho wa Paulu ni Timoteu ha kuhiluka ku Fwilipu.

Muze Paulu te uchili mu ufunge, iye yasoneka nawa mikanda yaali yize tulinayo mu Mbimbiliya. Umuwika kuli akwa Kristu a mu mbonge ya Kolosu. Yena unanyingika chize akuuvuluka? Kakuuvuluka ngwo, A-Kolosu. Ukwo te wa sepa lienyi Fwilimu yoze te watunga mu Kolosu. Mukanda wacho te unahanjika hakutwala kuli kavumbi wa Fwilimu, Onesimu.

Onesimu kanakachina Fwilimu yaya ku Roma. Kuzekwene Onesimu yanyingika ngwo Paulu te kali mu ufunge. Iye yaya ni kumumeneka mba Paulu yambujola sango jipema kuli Onesimu. Hohene Onesimu yapwa mukwa Kristu. Haliapwila Onesimu yevwa yinyengo yinji ha mukunda wa kuchina. Yena unanyingika yika yize Paulu asoneka mu mukanda uno kuli Fwilimu?

Paulu yeta kuli Fwilimu hanga akonekene Onesimu. Paulu yasoneka ngwenyi: ‘Yami ngunamutuma hanga afune nawa kuli yena. Alioze haliapwila iye hi kavumbi we wika ko. Iye kali nawa umwe ndumbu mupema mukwa Kristu.’ Muze te Onesimu anafuna ku Kolosu iye yambata mikanda yaali, umuwika wa A-Kolosu nawa ukwo wa Fwilimu. Mutuhasa kunyonga chiseke chize Fwilimu apwile nacho muze iye anyingikine ngwo kavumbi kenyi hapwa mukwa Kristu.

Muze Paulu asonekene kuli A-Fwilipu ni kuli Fwilimu, iye yalumbununa umwe umwenemwene wa sango jipema. Paulu yalweza A-Fwilipu ngwenyi: ‘Yami ngunatuma Timoteu kuli yenwe. Mba yami nawa mungwiza ni kunumeneka.’ Nawa, kuli Fwilimu iye yasoneka ngwenyi: ‘Lulieka chihela hanga yami ngukatwamemo.’

Muze Paulu te hamutusula, iye yaya ni kumeneka mandumbu a malunga ni a mapwo mu yihela yinji. Alioze kulutwe lia matangwa yamusa nawa mu zuwo lia ususu mu Roma. Ha mashimbu wano iye te kaso kunyingika ngwo mamushaha. Kashika iye yasonekena Timoteu nawa yamwita hanga iye eze kawashi. Paulu yasoneka ngwenyi: ‘Yami ngunashishika kuli Zambi, nawa Zambi makangwiuluka.’ Kulutwe lia yimwe miaka muze Paulu te hamushaha, Yerusaleme yayinongesa nawa kamuchiali, ha mashimbu wano kuli A-Roma.

Alioze mu Mbimbiliya muli yuma yinji. Yehova Zambi yatuma postolo Yoano hanga asoneke mikanda ya kasula, kuchinga ni mukanda wa Usolwelo. Mukanda uno wa Mbimbiliya wa kuhanjika ha kutwala ku matangwa a kulutwe. Tutalenu haliapwila yize muyikapwa kulutwe lia matangwa.