MUKWEZE yono yena unamono hano ni postolo Paulu jina lienyi Timoteu. Timoteu te katunga ni asoko jenyi mu Lisetra. Naye te jina lienyi Unise, kako te Loye.

Chino chili chisuho chamuchitatu chize Paulu ameneka Lisetra. Chize muze Paulu ni Mbarnabe ayile ko ni kwambujola sango jipema te hi kwapalika mwaka umuwika. Alioze haliapwila Paulu kafuna ko ni sepa lienyi Saila.

Yena unanyingika yize Paulu analweza kuli Timoteu? Iye yamuhula ngwenyi: ‘Yena unazange kuya ni yami hamwe ni Saila? Yetwe ni ukwaso we mutuhasa kwambujola sango jipema kuli atu waze ali kuyihela ya kusuku.’

Timoteu yakumbulula ngwenyi: ‘Ewa, Yami ngunazange hanga tuye hamuwika.’ Kulutwe lia matangwa Timoteu yahichika asoko jenyi mba yaya ni Paulu hamwe ni Saila. Mba tunyingike hakutwala ku wenyi wacho, chitangu tutalenu yize yinakapwa kuli Paulu. Te hi kwapalika miaka 17 chize muze Yesu anakasoloka kuli iye mu jila ya Ndamaseku.

Euluka ngwo, Paulu kanakeza ku Ndamaseku hanga alinge upi kuli tumbaji twa Yesu, alioze haliapwila iye neye hapwa kambaji kenyi! Hi kulutwe, amwe akwa kole yakwata chiyulo hanga ashehe Paulu mumu ayo te kaso kuzanga malongeso jenyi hakutwala hali Yesu. Alioze tumbaji yakwasa Paulu hanga achine. Ayo yasa Paulu mu mutonga nawa yamusunwisa ha chikalakala haze lia mbonge.

Ha kupalika cha matangwa, Paulu yaya ni kwambujola sango jipema ku Andiakia. Kwenako kwe aputukile kusanyika tumbaji twa Yesu ngwo akwa Kristu. Paulu ni Mbarnabe yaatuma ku Andiakia mu umwe wenyi wa kwambujola ku yifuchi ya kusuku. Yimwe mbonge yize ayo anakameneka yili Lisetra, mwenamo mwe te Timoteu atwama.

Ha kupalika cha mwaka umuwika, Paulu yafuna mu Lisetra mu wenyi wamuchiali. Muze Timoteu hamuwika ni Paulu ni Saila ahichikile Lisetra, yena unanyingika kuze ayo ayile? Tala ha mapa, hanga unyingike yihela yacho.

Chitangu, ayo yaya ku chifuchi cha Ikoniu, mba hi yaya nawa ku mbonge yikwo yize anavuluka ngwo Andiakia. Hi kulutwe ayo yaya nawa ku Troa, hohene yaya nawa ku Fwilipu ku Tesalonika ni ku Mberia. Yena unamono Atene ha mapa? Paulu kanakambujolamo sango jipema. Nawa ayo kanakapalikisa mwaka umuwika ni chipinji ni kwambujola mu Korindu. Hi kusongo ayo yatwama ndambu mu Efwesu. Mba ayo hi yafuna mu ulungu ku Sezarea nawa yaya ku Andiakia, kwenako kwe Paulu anakatwama.

Kashika, Timoteu kanakalinga wenyi unji ni Paulu, hanga akwase kwambujola “sango jipema” nawa ni kwazulula yikungulwila yinji yaha ya akwa Kristu. Muze muukola, ni yena mukapwa kavumbi washishika wa Zambi ngwe Timoteu?