MUZE te Petulu ni Yoano hakatuka ku fuka lia Yesu, Maria yasalako ukawenyi. Iye yaputuka kulila. Hohene iye yatala mu fuka, ngwe chize twamonanga ha chizulie cha kunyima. Iye yamona angelo aali! Ayo yamuhula ngwo: ‘Mumu liaka yena unalila?’

Maria yakumbulula ngwenyi: ‘Ayo hachiza Mwene wami, alioze yami chiso kunyingika kuze amusa.’ Muze Maria hateuluka yamona umwe lunga kanama. Iye yahula Maria ngwenyi: ‘Iya yena unafupa?’

Maria yanyonga ngwo lunga wacho kali njimi, kota iye mwe wambata mujimba wa Yesu. Kashika Maria yamba ngwenyi: ‘Nyi Yena mwe wamumbatanga, ngulweze kuze wamusanga.’ Alioze, chamwenemwene lunga wacho te Yesu. Iye te kali ni umwe mujimba uze te Maria kasokuhasa kumusela chinyingi ngwo iye kali Yesu. Alioze muze iye yamusanyika ha jina lienyi, mba Maria yanyingika ngwo auze kali Yesu. Chocho iye yazomboka ni kulweza kuli tumbaji ngwenyi: ‘Yami namona Mwene!’

Hi ha mashimbu akwo muze tumbaji aali te anayi ku chihunda cha Emeu, umwe lunga yakundama hakachi ko. Tumbaji jacho te kali ni yinyengo yinji mumu Yesu te hamushaha. Alioze ha kwenda cho mu jila, lunga wacho yaalumbunwina yuma yinji ya mu Mbimbiliya yize yinakaaha chiseke. Hi muze ayo hamana hanga alie, mba tumbaji yanyingika ngwo lunga yono kali Yesu. Hohene Yesu yatoka, alioze tumbaji wano aali yafuna ka fuji-fuji ku Yerusaleme hanga ambulule yuma yacho kuli apostolo.

Ha kupalika cha amwe matangwa, Yesu yasoloka nawa kuli Petulu. Akwo yevwa chiseke chinji muze ayo achivwile. Tumbaji waze aali yaya ku Yerusaleme hanga afupe apostolo. Ayo yalumbununa kuli apostolo chize Yesu anakasoloka kuli ayo mu jila. Mba muze ayo te machihanjika hakutwala ku yuma yacho, yena unanyingika yize yinakapwako?

Tala ha chizulie. Yesu yasoloka kuli ayo mu chipatulo, alioze chikolo te chili chakuyika. Tumbaji yawahilila chinji! Liapwile limwe tangwa lia chiseke, nyi ngwami? Yena muhasa kwalula yisuho yize Yesu anakasoloka kuli tumbaji twenyi? Walula yisuho yitano?

Alioze Tomase te keshoho muze Yesu asolokele. Chocho tumbaji yamulweza ngwo: ‘Hitwamona Mwene.’ Alioze Tomase yamba ngwo, ndo amone Yesu mba iye atayize. Muze te hikwapalika matangwa nake, tumbaji yalikungulula nawa mu chimwe chipatulo chakuyika, ha ola yacho Tomase neye te he ali. Susumuku Yesu yasoloka mu chipatulo chacho. Mba hi Tomase yatayiza.