YIKA yena unamono hano? Ewa, chimwe chizavu cha maswalale ali ha tuvwalu atoma. Alioze, tala kuze ayo anakatuka. Tuvwalu kanakatuka mwilu mu malelwa! Shina mwilu tuvwalu atwamamo?

Ka, wano hi tuvwalu amwenemwene ko. Yetwe tunanyingika ngwo tuvwalu kechi kuhasa kuzomboka helu lia malelwa, nyi ngwami? Alioze, Mbimbiliya yinambe hakutwala kuli tuvwalu mu malilu. Yena unanyingika mumu liaka?

Mumu ku mashimbu akunyima tujita te kakwendela ha tuvwalu hanga aliase jita. Kashika, Mbimbiliya yinambe hakutwala kuli atu waze ali ha tuvwalu anasunuka mwilu, hanga yisolole ngwo Zambi masa jita ni atu a hano hashi. Yena unanyingika jina lia chihela cha jita yacho? Armagedone. Jita yacho muyihwisa upi weswe hano hashi.

Yesu Mwe makasongwela tujita ha jita ya Armagedone. Euluka ngwo Yehova hanasakula Yesu hanga apwe mwanangana mu wanangana Wenyi. Kashika, Yesu anazala chipangula cha mwanangana. Nawa mukwale unasolola ngwo iye makashaha akwa kole ja Zambi eswe. Shina yetwe chatutamba kukomoka hakwivwa ngwo Zambi manongesa atu eswe api?

Tala kunyima ha Chishima 10. Yika yena unamonoho? Chochene, Sanga Linene lia meya lize linakashaha atu api. Iya unakaneha Sanga Linene lia Meya? Yehova Zambi. Haliapwila tala ha Chishima 15. Yika yinapuho? Sondome ni Ngomora hayocha ni kahia kaze Yehova anakatuma.

Funa ha Chishima 33. Tala yize yinapu kuli tuvwalu ni matemba a jita ja A-Engitu. Iya wapukula meya apwahaha hanga eze hali ayo? Yehova. Iye kanakachilinga hanga akalile atu jenyi. Tala ha Chishima 76. Ahaze yena mumona chize Yehova anakecha atu jenyi, A-Izalele, hanga aanongese ha mukunda wa upi wo.

Kashika, yetwe kanda tukomoka hakwivwa ngwo Yehova matuma chizavu cha maswalale a mwilu hanga ahwise upi weswe hano hashi. Alioze nyonga kama chize yino muyikalumbunuka! Fukula lifwo likwo hanga utale.