KAPITULU 14
“Yaatesa ni Mbunge Yimuwika”
Chize chizavu cha tusongo chakwachile chiyulo chimuwika ni chize chiyulo chacho chayukishile chikungulwila
Lusango yono kanakatuka ha Yilinga 15:13-35
1, 2. (a) Yihula yika chizavu cha tusongo cha ku sekulu yitangu chatambile kuhengwola? (b) Ukwaso uka mandumbu jacho atambwile mba akwate chiyulo chipema?
ESWE yaahola kuluu! Apostolo ni makulwana, kanalitala umwe ni mukwo muze anakunguluka mu chimwe chipatulo ku Yerusaleme. Mumu liaka? Mumu kapwile mashimbu akukwata chiyulo chimwe chilemu chinji. Chikuma cha ungalami chaneha kukakajana hakachi ko. Kutala, Akwa-Kristu A-Yunda achili mushi lia Shimbi ya Mose? Shina Akwa-Kristu A-Yunda ni Akwa-Kristu Akwa-Mavungu katamba kulihandununa?
2 Mandumbu waze apwile ni kusongwela yahengwola kanawa chikuma chacho. O te kanewuluka maliji a uprofeto wa Zambi, ni sango ja yela waze asolwele yiwape ya Yehova. Yaasolola zwalala yize te ananyongo. Yuma yize ahanjikile niumwe te mahasa kulitunayo wakuhi. Spiritu ya Yehova te yinasolola kanawa chiyulo chize atamba kukwata. Shina malunga wano te maakaula usongwelo wacho?
3. Kuchi mutuhasa kuyuka ha kuhengwola lusango uli ha Yilinga kapitulu 15?
3 Kukaula usongwelo wa spiritu, te muchifupiwa hamu ni ufulielo ukolo. Mumu usongwelo wacho, te muhasa kuwezela kole ya mangana a A-Yunda. Chikwo nawa, te muchihasa kupwa chikalu, mumu mu chikungulwila mwapwile malunga waze azangile kushinjila atu ja Zambi hanga anunge ni kukaula shimbi ya Mose. Mba, yika chizavu cha tusongo malinga? Tutalenu kumbululo lia chihula chino, ni chize chizavu cha tusongo cha Yela ja Yehova akukaula chilweza chipema chize o ahichikile. Ni yetu muze mutupalika mu umwe kapinda hanji mutufupiwa kukwata yiyulo yilemu ku mwono wetu, kashika twatamba kwimbulula chilweza cho.
“Maliji ja Aprofeta” Makwasa Kukwata Chiyulo (Yilinga 15:13-21)
4, 5. Ulumbunwiso uka Tiangu ahanyine uze te unalite ni upale wa Zambi?
4 Kambaji Tiangu, mwanakwo ya Yesu yakatuka ahanjike. a Chinasoloka ngwe iye mwe te unasongwela kukunguluka chacho. Yize ahanjikile, yasolwele yize te mandumbu eswe mu chizavu cha tusongo ananyongo. Chocho yamba ngwenyi: “Semone kambulwile mu yimako-yimako chize Zambi alihulikilile kuli akwa-mavungu ha chisuho chitangu hanga akasakuleho limwe vungu lize mulimbata jina lienyi. Chino nawa chinalite ni maliji ja aprofeta.”—Yili. 15:14, 15.
5 Pande jize Semone Petulu ahanjikile ni yikuma yize Paulu ni Mbarnabe alumbunwine, kota ye yakwashile Tiangu kwiuluka yisoneko yize yapwile ni kulumbununa kanawa chikuma chacho. (Yoa. 14:26) Hachino, yamba ngwenyi: “Henaho hanakatuka maliji ni shimbi ya Aprofeta.” Tiangu katongwele maliji a mukanda wa Amose 9:11, 12. Mukanda uno wapwile chihanda cha yisoneko ya Hepreu, yize akuvuluka nawa ngwo, “aprofeta.” (Mateu 22:40; Yili. 15:16-18) Maliji waze twakuwana mu mukanda wa Amose musono, kanalisa ni waze postolo Tiangu ahanjikile. Chinasoloka ngwe iye katongwele maliji a Septuaginta, Yisoneko ya Ngregu yize alumbunwine mu Hepreu.
6. Kuchi Yisoneko yakwashile kulumbununa chikuma cha ungalami?
6 Kupalikila muli Profeta Amose, Yehova yalakenya ngwenyi, te mukupwa shimbu lize manangamisa “mbalaka ya Ndawichi” hanji ngwetu, munyachi uze te mukusemukina Mesaya. (Eze. 21:26, 27) Shina Yehova manunga ni kulihulikila wika hali A-Yunda ngwe munyachi wenyi? Ka. Uprofeto wambile nawa ngwo, atu a ku mavungu eswe te maakakunga hamuwika ngwe “atu a mu usoko wa Zambi.” Twiwulukenu nawa ngwetu, postolo Petulu kasonekene ngwenyi: “Chikwo nawa, iye kasolwele kalisa hakachi ka ayo ni yetu, alioze wapemesene mbunge jo ku ufulielo.” (Yili. 15:9) Upale wa Zambi wapwile ngwo, Akwa-Kristu A-Yunda ni Akwa-Mavungu, eswe atambule chihinga cha Wanangana. (Roma 8:17; Efwe. 2:17-19) Kukushi niyimwe yize yinasolola ngwo, maliji a uprofeto wacho kambile ngwo, Akwa-Kristu Akwa-Mavungu chitangu te katamba kwapwisa ngalami, hanji kulipwisa ene A-Yunda.
7, 8. (a) Nyonga lika postolo Tiangu ahanyine? (b) Yika azangile kwamba?
7 Muze Tiangu hapanjika maliji eswe waze evwile, ni kumona ushindakenyo wa mu Mbimbiliya, iye yasolola nyonga lienyi ha kwamba ngwenyi: “Kashika nyonga liami ngwami, kanda tupinjisa atu wano akwa-mavungu waze anazange kulingila Zambi. Alioze twasonekenenu hanga ehuke chikolo yuma yize hanayisela ku mahamba, utanji, tushitu akuhonda ni manyinga. Mumu chize ku mashimbu akunyima, atu kakwambujola Shimbi ya Mose mu mbonge ni mbonge, ni kujitanga ni liji linene mu masunangonga ha Sambata jeswe.”—Yili. 15:19-21.
8 Muze postolo Tiangu ambile ngwenyi, “nyonga liami,” shina kazangile kulinangamisa mumu ngwo, iye mwe wapwile kasongo ha kukunguluka chacho ni kweseka kulweza akwo yize atamba kulinga? Ka hi chocho ko. Kwamba umwenemwene liji lia Ngregu “nyonga liami,” mu maliji akwo linalumbunuka, “yami nanyonga chino.” Kashika, Tiangu kakazangile kupwa helu lia mandumbu jenyi, alioze kasolwele nyonga lienyi kulita ni yize evwile ni yize Yisoneko yambile hakutwala ku chikuma chacho.
9. Kuchi chiyulo cha postolo Tiangu chayukishile mandumbu?
9 Shina chiyulo chize postolo Tiangu ahanyine chapwile chipema? Kwamba umwenemwene, chapwile lume chipema. Mumu kulutwe apostolo ni makulwana yachikaula. Shina te muchihasa kwakwasa? Ewa. Chiyulo chacho te kuchichi kunehena lamba Akwa-Kristu Akwa-Mavungu, ha kwatwika chiteli cha kwononokena Shimbi ya Mose. (Yili. 15:19; New International Version) Chikwo nawa, te muchisolola vumbi kuli Akwa-Kristu A-Yunda, waze ha miaka yinji anungine ni kwivwa “Shimbi ya Mose mayitanga ni liji mwilu hita Sambata” mu masunangonga ja A-Yunda. b (Yili. 15:21) Kashika kutushi kukakajana, ngwetu chiyulo chacho te muchikwasa Akwa-Kristu A-Yunda ni Akwa-Kristu Akwa-Mavungu kupwa ni usepa upema. Chahiana ulemu te muchivwisa Yehova kuwaha, mumu chalitele ni upale wenyi. Chino chili chilweza chipema chize mutuhasa kwimbulula, cha kuhwishilamo kapinda mweswawo yoze mahasa kuhandununa mandumbu mu chikungulwila!
Ndumbu Albert Schroeder kanahanjika pande ha kukunguluka cha mambonge cha yifuchi yinji ha mwaka 1998
10. Kuchi Chizavu Cha Tusongo chakwimbulula chilweza cha Akwa-Kristu a ku sekulu yitangu?
10 Ngwe chize twamonanga ha kapitulu wapalika, chizechene ngwe ku sekulu yitangu, Chizavu Cha Tusongo cha Yela ja Yehova, kakufupa usongwelo wa Yehova ni wa Yesu Kristu mutwe wa chikungulwila ha yikuma yeswe. c (1 Kori. 11:3) Kuchi akuchilinga? Ndumbu Albert D. Schroeder, yoze wapwile mu Chizavu Cha Tusongo chize ha mwaka 1974 ndo 2006 yalumbununa ngwenyi: “Hita poso, liamatatu Chizavu Cha Tusongo chakulikungulula. Kakuputuka kukunguluka chacho ni kulemba ni kwita usongwelo wa spiritu yisandu ya Yehova. Chikwo nawa, kakusa tachi jinji, hanga yeswe yize mamba ni chiyulo cheswacho makwata chilite ni Liji lia Zambi Mbimbiliya.” Ni ndumbu Milton G. Henschel, yoze neye wapwile mu Chizavu Cha Tusongo ndo ha mwaka 2003, yahula alongi a kalasa 101 a shikola ya Ngiliate ngwenyi: “Shina hano hashi hali ululikiso umwe uze wakufupa usongwelo mu Mbimbiliya muze anazange kukwata chiyulo chimwe chilemu?” Kumbululo yetweswe tunalinyingika.
Yaatuma “Amwe Malunga” (Yilinga 15:22-29)
11. Kuchi chiyulo chize akwachile Chizavu Cha Tusongo achihetesele mu yikungulwila?
11 Chizavu Cha Tusongo mu Yerusaleme, yaakwata chiyulo chimuwika ha chikuma cha ungalami. Te katamba kutanga ni kulumbunwina mandumbu chiyulo chacho mu yikungulwila yeswe, mba achitayize ni kuchikaula. Kashika kuchi te mahasa kuchilinga? Lusango kanambe ngwo: “Hohene apostolo ni makulwana hamwe ni mandumbu eswe mu chikungulwila, yaatesa kutongola amwe malunga hakachi ko hanga aatume ku Andiakia hamwe ni Paulu ni Mbarnabe. Yaatuma Yunda yoze avuluka nawa ngwo, Mbarsavwa, ni Saila, malunga waze te akusongwela mukachi ka mandumbu.” Chikwo nawa, yasoneka mukanda ni kuutuma hanga akautangile mandumbu mu yikungulwila ya Andiakia, Seria ni mu Selishia.—Yili. 15:22-26.
12, 13. Mu jila yika kutuma Yundase ni Saila chakwashile yikungulwila?
12 “Yundase ni Saila kapwile malunga ajama” waze te mahasa kumanyinako Chizavu Cha Tusongo. Malunga awana waze atumine, kasolwele ngwo lusango yoze anatwale, kanakumbulula hi wika ko chihula chize atu anji te anashimbwila kumbululo, alioze lusango wacho kapwile nawa ni usongwelo wa Chizavu Cha Tusongo. Yundase ni Saila te maakwasa nawa kukolesa zango lia Akwa-Kristu A-Yunda mu Yerusaleme ni Akwa-Kristu Akwa-Mavungu mu yikungulwila, ngwe mandumbu a ku ufulielo. Chiyulo chino chasolwele mana ni zango. Kwamba umwenemwene, chino chanehene sambukila ni kulinunga hakachi ka atu ja Zambi.
13 Mukanda uze mandumbu atumine, wasolwele usongwelo wa zwalala kuli Akwa-Kristu Akwa-Mavungu, hi wika ko hakutwala ku chikuma cha ungalami, alioze ni yize atamba kulinga mba apwe ni utayizo ni yiwape ya Yehova. Chihanda cha mukanda wacho chambile ngwo: “Mumu hichapemena spiritu yisandu ni yetu nawa ngwetu, kanda tunutwika yiteli yilemu shina wika yuma yize chatamba kukaula. Nungenu ni kwehuka yuma yize hanayilambula ku mahamba, manyinga ni tushitu akuhonda ni utanji. Nyi nwalifunga ku yino yuma, munulinga kanawa. Mwoyo wenu!”—Yili. 15:28, 29.
14. Yika yakupwisa chashi kulinunga cha atu ja Zambi hashi hano halihandununa?
14 Yela ja Yehova musono, chipwe ngwe kali unji wa 8,000,000 mu yikungulwila kuhiana 100,000 hashi heswe, nihindu kapwa alinunga mu yitanga yo ni ha yize afuliela. Kuchi akuhasa kulinunga hashi haze ha too ni katonde ni kulihandununa? Kakuhasa kuchilinga, mumu kakukaula usongwelo wa Yesu Kristu, mutwe wa chikungulwila, uze akuhana kupalikila muli ndungo wakanyama, ni Chizavu Cha Tusongo. (Mateu 24:45-47) Kulinunga chacho chakupwa nawa chashi, mumu mandumbu hashi heswe, kakukaula usongwelo wacho ni mbunge yimuwika.
“Yaawahilila Chinji ni Maliji a Utakamiso” (Yilinga 15:30-35)
15, 16. Yika yalingiwile mu yikungulwila muze atambwile usongwelo wa chizavu cha tusongo, mba mumu liaka?
15 Lusango wa mukanda wa Yilinga kananungu ngwo, muze mandumbu waze akatukile ku Yerusaleme ahetele ku Andiakia, “yakungulula chizavu cheswe ni kwaha mukanda.” Kuchi mandumbu alivwile ha usongwelo uze atambwile kukatuka kuli Chizavu Cha Tusongo? “Muze te hautanga yaawahilila chinji ni maliji a utakamiso.” (Yili. 15:30, 31) Chikwo nawa, Yundase ni Saila yaatakamisa mandumbu ni pande jipema. Hachino, malunga wano yapwa ngwe “aprofeta,” ngwe chizechene Paulu ni Mbarnabe ni atu akwo apwile. Chisanyiko chacho kakuchiluka kuli mutu yoze wakwambujola upale wa Zambi.—Yili. 13:1; 15:32; Kutuhu. 7:1, 2.
16 Twamona zwalala ngwetu, Yehova kanakasongwela tuvumbi twenyi ni kwakwasa hanga ahwise kapinda wacho ni sambukila. Yika chamwenemwene lume yaakwashile? Usongwelo wa chizavu cha tusongo unakatuka mu Liji lia Zambi ni ukwaso wa spiritu yenyi yisandu. Chikwo nawa, chapwile zango lize mandumbu a mu chizavu cha tusongo asolwele muze atumine usongwelo wacho mu yikungulwila.
17. Kuchi tulayi a mambonge akukaula chilweza cha Akwa-Kristu a ku sekulu yitangu?
17 Mandumbu a mu Chizavu Cha Tusongo cha Yela ja Yehova, kakwimbulula chilweza cha ku sekulu yitangu ha kutuma usongwelo ha shimbu lialita mu yikungulwila ya hashi heswe. Yiyulo yize Chizavu Cha Tusongo chakukwata, yakuheta mu yikungulwila ni kuyilumbununa zwalala. O kakuchilinga kupalikila muli tulayi a mambonge. Mandumbu wano ashishika kakumeneka hita chikungulwila ni kuhana usongwelo ni utakamiso. Chizechene ngwe Paulu ni Mbarnabe, o kakupalikisa mashimbu anji mu mulimo wa kwambujola ni kulongesa “liji lia Yehova.” (Yili. 15:35) Chikwo nawa, ngwe Yundase ni Saila, ayo kakutakamisa mandumbu ha kuhanjika pande jipema.
18. Yika atu ja Zambi atamba kulinga mba apwe ni yiwape ya Yehova?
18 Yika muyihasa kukwasa yikungulwila ya hashi heswe yilinunge? Postolo Tiangu kasonekene ngwenyi: “Alioze, mana a kwilu chitangu kapwa atoma, a sambukila, ashi, kakwononoka ni kawashi, a too ni keke ni mihuko yipema, keshi katonde, keshi ulembekese. Chikwo nawa, muhuko wa ululi kakuukuwa mu sambukila kuli waze akuneha sambukila.” (Tia. 3:17, 18) Kutwanyingikine nyi postolo Tiangu kanyongene ha kukunguluka chize chapwile mu Yerusaleme muze asonekene maliji wano. Alioze, lusango wa mukanda wa Yilinga kapitulu 15 kanasolola ngwo, mutuhasa wika kupwa ni utayizo ni yiwape ya Yehova nyi twalinunga ni kukalakala hamuwika ni mandumbu jetu.
19, 20. (a) Yika yasolwele ngwo, mu Andiakia mwapwile sambukila ni kulinunga? (b) Yika Paulu ni Mbarnabe te mahasa kulinga?
19 Chasolokele zwalala ngwo, mu chikungulwila cha Andiakia mwapwile sambukila. Shimbu alihangujole ni kulihamika ni Yundase ni Saila, mandumbu mu Andiakia yawahilila chinji ha kutambula malunga jacho. “Muze te hatwamako amwe mashimbu, mandumbu yaashika ni sambukila, mba Yundase ni Saila yaahiluka kuli waze atumine,” hanji ngwetu, ku Yerusaleme. d (Yili. 15:33) Mutuhasa kupwa ni shindakenyo ngwetu, mandumbu mu Yerusaleme kanakawahilila chinji ha kwivwa lusango wa mandumbu mu Andiakia ni chize Yehova aakwashile kumanununa mulimo wo.
20 Paulu ni Mbarnabe kanungine mu Andiakia ni kulihulikila ha kusongwela mulimo wa kwambujola, ngwe chizechene tulayi a mambonge akulinga mu yikungulwila musono. (Yili. 13:2, 3) Chino chakuyukisa chinji atu ja Yehova! Mba yiwape yikwo yika Yehova ahanyine kuli Paulu ni Mbarnabe? Yino ye mutumona ha mutwe uze muuhataho.
Akwa-Kristu musono kakuyuka ni usongwelo wa Chizavu Cha Tusongo ni wa waze akwamanyinako
a Tala mushete unambe ngwo, “ Tiangu Mwanakwo ya Mwene.’”
b Tiangu kasolwele mana ha kuhanjika hakutwala ku Yisoneko ya Mose, yize te yinachingi yuma yikwo hi Shimbi wika ko, alioze ni sango hakutwala ku usepa wa Zambi ni tuvumbi twenyi ni ha upale wenyi. Chakutalilaho, nyonga lia Zambi hakutwala ku manyinga, upangala ni kukombelela mahamba, mutuhasa kulimona zwalala ha mukanda wa Uputukilo. (Uputu. 9:3, 4; 20:2-9; 35:2, 4) Chocho, Yehova yasolola shimbi jenyi jize atu eswe atamba kwononokena, apwe Ka-Yunda hanji Mukwa-Mavungu.
c Tala mushete unambe ngwo, “ Chize Chizavu Cha Tusongo Chili Cha Kululieka Musono.”
d Hakutwala ku versu 34, Mbimbiliya jimwe jakwamba ngwo, Saila kazangile kununga mu Andiakia. (Almeida, revista e corrigida) Alioze, chakusoloka ngwe maliji jacho katwamine mu yisoneko yikulu, kaalumbile.
