KAPITULU 20
“Liji Lia Yehova Liakolele” Chipwe Mu Yihungumiona
Chipwe mu Yihungumiona Apolu ni Paulu makwasa kukolesa sango jipema
Lusango yono kanakatuka ha Yilinga 18:23–19:41
1, 2. (a) Ponde yika postolo Paulu ni mandumbu akwo apalikile mu Efwesu? (b) Yika mutumona ha kapitulu yono?
MU matapalo a mu Efwesu muli chizungo-zungo chinji hamwe ni kukalumioka. Mbunga yinene ya atu yinanehe vunda! Masepa aali ja Paulu haakwata kuli mbunga yacho, chikwo nawa kanaambulumuna. Mu tapalo lize atu akulanjishila chinji himwasala hululu, mumu eswe kanaputuka kulichinga ni mbunga yize yinanehe vunda mu mbonge. Anji a kuli ayo kanyingikine mumu liaka vunda yacho yaputuka, hindu kamona ngwo, tembele hanji kazambi ko Artimise, kali mu ponde. Chocho maputuka kukololoka ni liji mwilu ngwo: “Artimise wa mu Efwesu iye Munene!”—Yili. 19:34.
2 Cheka nawa, tunamono chize Satana azachishile mbunga waze anehene vunda hanga eseke kukwika mulimo wa kwambujola Wanangana wa Zambi. Alioze, iye keshi kukalakala wika ni muheto wacho. Ha kapitulu yono, mutuhengwola miheto yize Satana azachishile ku sekulu yitangu hanga eseke kukwika mulimo wa kwambujola ni kupihisa kulinunga cha Akwa-Kristu. Chahiana ulemu mutumona ngwetu, miheto yeswe atele kuyakalakalile, mumu “liji lia Yehova liakolele ni tachi ni kufumana.” (Yili. 19:20) Mba yika yakwashile Akwa-Kristu jacho kununga ni kwambujola? Mumu lia yize yakutukwasa ni yetu musono. Ewa, twakuhasa kununga ni kwambujola mumu Yehova mwe wakutukwasa. Alioze, ngwe Akwa-Kristu a ku sekulu yitangu ni yetu twatamba kulinga chihanda chetu. Spiritu ya Yehova muyihasa kutukwasa kupwa ni yitanga yize muyitukwasa kulinga kanawa mulimo wetu wa kwambujola. Chitangu, tutalenu chilweza cha Apolu.
‘Iye Kapwile Umwe Lunga te Wanyingika Kanawa Yisoneko’ (Yilinga 18:24-28)
3, 4. Yika Akwila ni Prisela amwene hakutwala ku chinyingi cha Apolu, mba yika alingile?
3 Apolu kahetele mu Efwesu muze postolo Paulu te analulieka wenyi wamuchitatu wa umishionaliu. Apolu kapwile Ka-Yunda yoze wasemukinyine mu mbonge yinene ya Alexandria, Engitu. Kapwile ni yitanga yinji yipema, chikwo nawa te kakuhanjika kanawa. ‘Kanyingikine kanawa yisoneko ni kuzala too ni spiritu.’ Apolu kapwile ni kuhanjika ni hamu mu sunangonga ya A-Yunda.—Yili. 18:24, 25.
4 Akwila ni Prisela kevwile pande jize Apolu ahanjikile. O kawahililile chinji ha kumupanjika mumu kamwene ngwo, “iye wahanjikile ni kulongesa pundu hakutwala kuli Yesu.” Yuma yize ahanjikile hakutwala kuli Yesu te yinalite, alioze chinyingi chikehe apwile nacho mumu kanyingikine wika yuma hakutwala ku upapachiso wa Yoano. Akwila ni Prisela waze apwile akwa-kutunga mbalaka, kakevwile woma wa Apolu mumu lia mana waze apwile no ni chize te akuhanjika. Shimbu achilinge, o “yamusanyika kutenga ni kumulumbunwina kanawa jila ya Zambi.” (Yili. 18:25, 26) Yika lunga wacho walongoloka alingile? Chakusoloka ngwe iye kasolwele chitanga chimwe chilemu chinji chize Akwa-Kristu eswe atamba kupwa nacho, kulikehesa.
5, 6. Yika yapwishile Apolu mulemu kuli Yehova, mba yika twalilongesa?
5 Mumu lia kutayiza ukwaso wa Akwila ni Prisela, Apolu yapwa kavumbi mupema wa Yehova. Iye yaya ku Akeya kuze ‘akwashile chinji mandumbu.’ Mulimo wenyi wakwambujola wendele kanawa, chipi-chipi kuli A-Yunda waze te keshi kutayiza ngwo, Yesu mwe Mesaya. Luka yasoneka ngwenyi: “Yakumika chikolo A-Yunda kumeso ja atu eswe ni kushindakenya chikolo ha Yisoneko ngwenyi, Yesu mwe Kristu.” (Yili. 18:27, 28) Apolu kapwile chiwape chinene! Kwamba umwenemwene, iye kakwashile hanga “Liji lia Yehova” linunge ni kukola. Yika mutuhasa kulilongesa ha chilweza chenyi?
6 Kulikehesa chili chitanga chilemu chinji kuli Akwa-Kristu eswe. Mutu ni mutu kakwete utotombo walisa. Utotombo wacho muuhasa kupwa wa kusemuka nawo, yuma yize twalilongesa ku mwono hanji chinyingi chize tukwete. Alioze, kulikehesa chatamba kuhiana utotombo weswawo tukwete. Mumu nyi kutwalikehesele, utotombo wetu muhasa kupwa ulelu wetu. Nyi chino chalingiwa mutuhasa kuholokela mu muheto wakulinangamisa. (1 Kori. 4:7; Tia. 4:6) Nyi twalikehesa, mutusa tachi hanga tumone akwetu ngwo, katuhiana. (Fwili. 2:3) Chikwo nawa, nyi twalikehesa kutuchi kupihilila hanji kulituna yiyulo yize matwaha kuli akwetu. Kulikehesa muchitukwasa kwalumuna manyonga jetu nyi ngwe kalitele ni usongwelo wa spiritu yisandu. Kashika, nyi twanunga ni kulikehesa, Yehova ni Mwanenyi matuzanga chinji.—Luka 1:51, 52.
7. Kuchi Paulu ni Apolu asolwele ngwo, kakulikehesa?
7 Kulikehesa muchihasa kutukwasa kwehuka kulitachika ni akwetu. Satana kazangile chinji kuhandununa Akwa-Kristu a ku sekulu yitangu! Iye kachi kawahililile chinji nyi te Apolu ni Paulu kalimikine umwe ni mukwo mumu lia ukwa. Chino te muchihasa lume kulingiwa, mumu Akwa-Kristu amwe mu Korindu kapwile ni kwamba ngwo: “Ami nguli wa Paulu,” akwo ngwo: “Ami nguli wa Apolu.” Shina Paulu ni Apolu kakolwezele mandumbu hanga apwe ni manyonga jacho? Ka! Paulu kapwile ni kulemesa tachi jize Apolu apwile ni kusa hanga akwase mulimo wa kwambujola, kashika te akumwaha yimwe yiteli. Apolo neye te kakusa tachi hanga akaule usongwelo wa postolo Paulu. (1 Kori. 1:10-12; 3:6, 9; Titu 3:12, 13) Chino chili chilweza chipema cha kulikehesa chize twatamba kwimbulula muze tunakalakala ni mandumbu jetu!
“Ni Kwaha Shindakenyo Hakutwala Ku Wanangana Wa Zambi” (Yilinga 18:23; 19:1-10)
8. Jila yika Paulu asakwile hanga afune ku Efwesu, mba mumu liaka?
8 Paulu kalakenyene kufuna ku Efwesu, kashika yamanununa chilakenyo chenyi. a (Yili. 18:20, 21) Alioze, tutalenu jila yize apalikile hanga afune ku Efwesu. Iye kapwile ku Andiakia ya ku Seria, kashika te katamba kuya ku Shilishia hanga akwate ulungu uze unayi ku Efwesu, ayi ye yapwile jila yashi. Alioze, Paulu yapalikila mu “limbo ni limbo.” Kulita ni kwalula chimwe, wenyi wa Paulu uze anatongola ha Yilinga 18:23 ni 19:1, wapwile wa unji wa 1600 quilômetros! Mumu liaka Paulu asakwile jila yacho yisuku? Mumu kazangile “kutakamisa tumbaji eswe.” (Yili. 18:23) Wenyi wamuchitatu wa umishionaliu te muufupiwa kusa tachi jinji ngwe chize alingile ha yisuho yikwo. Hindu, Paulu kapwile ni shindakenyo ngwenyi, chili chilemu kusa tachi jacho. Ni musono, tulayi a mambonge ni mapwo jo kakwimbulula chilweza chacho. Twakusakwilila chinji ha zango ni kulihana cho!
9. Chilumbu chaka tumbaji amwe aapapachishile cheka, mba yika twalilongesa ha chilweza cho?
9 Muze ahetele ku Efwesu, Paulu yawana tumbaji 12 a Yoano Chipapachisa. O kaapapachishile ni upapachiso wa Yoano, uze te kuwatwamineko nawa. Chikwo nawa, chasolokele ngwe ayo te kanyingikine yuma yinji hakutwala ku spiritu yisandu. Alioze Paulu yaalumbunwina yuma yaha, chizechene ngwe Apolu, no yalikehesa ni kuzanga kulilongesa yuma yinji. Muze te haapapachisa mu jina lia Yesu, yaatambula spiritu yisandu ni kuputuka kulinga yikomokeso yimwe. Chino chinasolola ngwo, nyi twasa tachi hanga tunyingike yuma yize yinalumuka mu ululikiso wa Yehova, mutupwa ni yiwape yinji.—Yili. 19:1-7.
10. (a) Mumu liaka Paulu akatukile mu sunangonga hanga aye ku chihela cha yimwe shikola? (b) Yika chino chinatulongesa hakutwala ku mulimo wa kwambujola?
10 Kulutwe, yikulingiwa chuma chikwo chize chasolwele kukola cha sango jipema. Ha tukweji atatu Paulu yambujola ni hamu mu sunangonga. Chipwe ngwe ‘kahanyine shindakenyo hakutwala ku Wanangana wa Zambi,’ nihindu, amwe yalimika nenyi. Shimbu akise mashimbu jenyi ni atu waze te anahanjika “yuma yipi hakutwala ku jila ya Mwene,” Paulu yaputuka kulongesa atu mu chihela chimwe cha shikola. (Yili. 19:8, 9) Kashika, waze azangile kukola ku ufulielo, te katamba kutuhuka mu sunangonga hanga aye kuze Paulu te analongesela. Chizechene ngwe Paulu, nyi twamona ngwetu umwe kazangile kutupanjika hanji kanazange wika kutuzwelesa, twakuya kwetu. Kuchili atu anji apwa ngwe mapanga waze anazange kupanjika sango jipema!
11, 12. (a) Chilweza chika Paulu atuhichikilile cha kukalakala chinji ni kupwa atu ashi? (b) Yika Yela ja Yehova akulinga hanga akalakale chinji ni kupwa ashi mu mulimo wa kwambujola?
11 Paulu kota kapwile ni kwambujola mu chihela cha shikola yacho matangwa eswe, kukatuka ha ola 11 ndo 16. (Yili. 19:9) Wano kota kapwile mashimbu akuhwima ndambu ku mulimo. Nyi Paulu kalingile chino ha miaka yaali chekwamba, iye kalingile 3,000 a maola mu mulimo wa kwambujola. b Kashika, chino chili chuma chimwe chize chakwashile hanga Liji lia Yehova lianungine ni kukola. Paulu kapwile chikilikita, chikwo nawa mwashi. Iye kapwile ni kwambujola ha mashimbu waze atu a njiza yenyi te mahasa kumupanjika. Mba yika yalingiwile? “A-Yunda ni A-Ngresia eswe waze te atwama mu mbonge ya Azia evwile liji lia Mwene.” (Yili. 19:10) Kwamba umwenemwene, Paulu kambulwile kanawa Wanangana wa Zambi!
Twakulikolweza hanga tuwane atu kweswako kuze ali
12 Ni musono, Yela ja Yehova kakukalakala chinji ni kupwa atu ashi hanga akwase akwo. Twakulikolweza kufupa atu ku yihela ni mashimbu waze mutuhasa kwawana ngwe: Kwambujola mu matapalo, kuze akulanjishila, kuze kwakutulila mashinyi, kwambujola ku telefone ni kusoneka mikanda. Mba muze tunayi ni kwambujola ku zuwo ni zuwo, twakusa tachi hanga tuwane atu ha mashimbu waze mutuhasa kwawana.
“Liji Lia Yehova Liakolele” Chipwe Ngwe Kwapwile Maspiritu Api (Yilinga 19:11-22)
13, 14. (a) Yika Yehova akwashile Paulu kulinga? (b) Chuma chika ana ja Sevwa alingile, mba kuchi musono Akwa-Kristu a mahuza akwimbulula?
13 Luka kanatulumbunwina yize yalingiwile kulutwe. Yehova “kalingile yikomokeso yinene kupalikila muli Paulu. Mumu chipwe mahina ni yitambala yize yapwile ni kukwata ku mujimba wa Paulu, te kakuyitwala kuli mieji. Chocho mieji ahindukile ni maspiritu api atuhukile.” c (Yili. 19:11, 12) Atu anji kawahililile ni yize yalingiwile kuli andemoniu, alioze, te hi eswe ko.
14 “A-Yunda amwe waze apwile ni kuya ku yihela yeka ni yeka ni kutuhwisa andemoniu,” yeseka kwimbulula yikomokeso ya Paulu. Amwe a kuli ayo yeseka kutuhwisa andemoniu ha kuvuluka jina lia Yesu ni Paulu. Luka kanatongola chilweza cha ana shimbiali a umwe sasendote wa lutwe Ka-Yunda avuluka ngwo, Sevwa, waze esekele kuchilinga. Ndemoniu yaalweza ngwenyi: “Yami ngunanyingika Yesu ni Paulu. Mba yenu nuli aya?” Kashika, “mutu yoze te uli ni spiritu yipi yaatumbukila, yaazeyesa, yalamba malunga waze eswe. O yatuhuka mu zuwo ni kuchina fuji uselesele ni yilonda ha mijimba.” (Yili. 19:13-16) Chino chapwile kukumba cha Liji lia Yehova, mumu kalisa wa Akwa-Kristu amwenemwene ni a mahuza kasolokele zwalala. Atu anji musono no kakunyonga ngwo, nyi mavuluka wika jina lia Yesu hanji kwamba ngwo, kali “Akwa-Kristu” acho hi kwahwa. Alioze, Yesu kambile ngwenyi, waze akulinga upale wa Tato e wika makapwa ni kutalatala cha kulutwe lia matangwa.—Mateu 7:21-23.
15. Kuchi mutuhasa kwimbulula A-Efwesu hakutwala ku yuma ya yipanda-panda?
15 Atu anji yaputuka kuvwila woma Zambi ha kulitwamina kulinga yuma ya yipanda-panda mumu lia sonyi jize ana ja Sevwa evwile. A-Efwesu kapwile ni kulinga chinji yuma ya tufuta-futa. Yuma ngwe, wanga, mikosa, ni yuma yikwo ya yipanda-panda yapwile ni kusoloka chinji. A-Efwesu anji yakunga mikanda yo ya yipanda-panda hanga ayochele ha mbunga, chipwe ngwe kota yafwikile mbongo jinji. d Luka yasoneka ngwenyi: “Liji lia Yehova liakolele ni tachi ni kufumana.” (Yili. 19:17-20) Umwenemwene wahashile kukumba mahuza ni andemoniu! A-Efwesu katuhichikilile chilweza chipema chinji: Ni yetu musono, twatwama hashi haze hanazale too ni yipanda-panda. Kashika, nyi twamona ngwetu tukwete chuma chimwe chize chinatale ha yuma ya wanga hanji tufuta-futa, chizechene ngwe A-Efwesu, twatamba kuchimbila hanji kuchocha ni kawashi! Twatamba kusa tachi jinji hanga tuchine kukwata yuma yacho chipwe ngwe mututokesa yimwe.
“Kwapwile Chizungozungo Chinene” (Yilinga 19:23-41)
“Malunga, nunanyingika kanawa ngwenu, upite wetu wakukatuka ku mulimo uno.” —Yilinga 19:25
16, 17. (a) Kuchi Ndemetriu anehene vunda mu Efwesu? (b) Kuchi A-Efwesu asolwele ngwo, te kakulikwachilila chinji ku mianda yo?
16 Haliapwila tuhengwolenu miheto ya Satana yize twatongolanga ku uputukilo. Luka yasoneka ngwenyi: “Kwapwile chizungozungo chinene mumu lia jina lia Mwene.” Yono kapwile kapinda munene. e (Yili. 19:23) Umwe lunga fuli-ya-prata avuluka ngwo, Ndemetriu yavumbula umwe mulonga. Iye yalweza fuli ni akwo ngwenyi, o te kakuwana mbongo ha kulanjisa tuponya. Mba yanunga ni kwalweza nawa ngwenyi, sango ja Paulu te jinapihisa mingoso yo mumu Akwa-Kristu keshi kuwayila tuponya. Kusulaho, yahanjika hakutwala ku yuma yize A-Efwesu apwile ni kuvumbika chinji, kazambi ko Artimise ni tembele yize amutungilile, ngwo te kwasala hakehe ayinongese.—Yili. 19:24-27.
17 Yuma yize Ndemetriu ahanjikile yavwishile atu uli, chocho yaaputuka kukololoka ngwo: “Artimise wa mu Efwesu iye Munene!” Kashika, mu mbonge yimupwa chizungozungo chinji ngwe chize twatongolanga ku uputukilo wa kapitulu yono. f Mumu lia chino, Paulu yazanga kuya muma muze mwapwile atu jacho hanga ahanjike no, alioze tumbaji yamukanjisa kuchilinga. Umwe lunga avuluka ngwo, Alexandre yamana hakachi ka mbunga hanga ahanjike. Amu lunga wacho apwile Ka-Yunda, kota kazangile kulumbununa kalisa watwama hali A-Yunda ni Akwa-Kristu. Mba muze atu jacho amwene ngwo kali Ka-Yunda, yakololoka ni liji mwilu ngwo: “Artimise wa mu Efwesu iye Munene!” Kachilingile hanga atu ahone kumupanjika. Chuma chacho kachilingile ha maola aali. Chizechene ngwe ha mashimbu aze, ni musono twakumona atu anji waze akulinga yuma chakuhona kunyonga mumu lia kuzanga chinji mayingeleja jo.—Yili. 19:28-34.
18, 19. (a) Kuchi mwata wa mbonge aholesele mbunga mu Efwesu? (b) Kuchi atu ja Yehova ha mashimbu amwe akwafunga kuli miata? (c) Kuchi yitanga yetu yipema neyo muyihasa kutukwasa?
18 Chocho mwata wa mbonge yaholesa mbunga. Lunga wacho wa mana yaalweza ngwenyi, Akwa-Kristu kakapwile ponde kuli kazambi Artimise ni ku tembele yize amutungilile. Chikwo nawa, Paulu ni mandumbu akwo kakalingile upi niumwe. Yaalweza nawa ngwenyi, nyi lume Paulu ni mandumbu akwo kalingile upi, kwapwile jila yipema yakusopelamo mulonga wacho. Kota atu jacho kalihumikijile wika muze aalwezele ngwo, te kanalimika ni nguvulu wa Roma ha kuneha chizungozungo mu mbonge. Ha mukunda wa chino, kawashi-washi o yalihumikiza mumu lia maliji apema waze mwata ahanjikile.—Yili. 19:35-41.
19 Chino kuchakapwile chisuho chitangu hanji chakasula chize umwe mwata makalila tumbaji twa Yesu. Postolo Yoano kaprofetezele ngwenyi, ha matangwa a kusula mianangana waze anavuluka ngwo hashi, te “makwasa” tumbaji twa Yesu. (Uso. 12:15, 16) Pundu lume chino chakulingiwa. Ha yisuho yinji ngaji waze keshi katonde kakukalila ulite wa Yela ja Yehova wa kulikungulula ni kwambujola sango jipema kuli atu akwo. Ewa, yitanga yetu yipema neyo yakukwasa. Miata amwe mu Efwesu kota kazangile Paulu ni kumuvumbika mumu lia yitanga yenyi yipema. (Yili. 19:31) Kashika, tunungenu ni kusolola yitanga yipema ni kupwa ni mbunge yipema mu yuma yeswe kuli atu waze twakuhanjika no, mumu chino muchihasa kutukwasa nawa yetwene.
20. (a) Kuchi wakulivwa ha kumona chize liji lia Yehova liakununga ndo musono? (b) Yika muhasa kulinga hanga ukwase kukumba cha liji lia Yehova?
20 Mala cho kukomoka kumona chize “liji lia Yehova” lianungine ni kukola ku sekulu yitangu! Twakukomoka nawa ha kumona chize Yehova anatukwase kukumba mu yota ya usopelo. Shina ni yena unazange kukwasa ha kukumba chacho? Nyi chenacho, lilongese yilweza yize hitwahengwola kulu, pwako mukwa-kulikehesa, sako tachi hanga unyingike yize yinalumuka mu ululikiso wa Yehova, pwako chikilikita ni kwehuka yuma yinatale ku yipanda-panda. Chikwo nawa, sako tachi hanga uhane uchela upema kupalikila mu yitanga ye ha kupwa ni mbunge yipema ni kusolola vumbi.
a Tala mushete unambe ngwo, “ Efwesu—Mbonge Yinene ya Azia.”
b Paulu kasonekene nawa mukanda 1 A-Korindu muze apwile mu Efwesu.
c Muchihasa kupwa hanji mahina waze Paulu azalile, kapwile yitambala yize apwile ni kulikasa ha huma hanga matukuta ahone kusulumukina mu meso. Amu Paulu azalile mazalo jacho ha mashimbu waze, chino chinasolola ngwo, iye kota kapwile ni kulinga mulimo wa kutunga mbalaka ha mashimbu a chimene muze te kanda achiya mu mulimo wa kwambujola.—Yili. 20:34, 35.
d Luka kambile ngwenyi, mikanda yacho yafwikile 50,000 mbongo ja prata. Nyi Luka kahanjikile ha mbongo ja ndenario, chekwamba: Mutu te katamba kukalakala miaka 137 mba ahase kupwa ni mbongo jacho.
e Atu amwe kakwamba ngwo, maliji a Paulu akwamba ngwo: “Yitunyonga ngwetu, kutuchi kumona mwono,” kanatale ha mashimbu waze aalukukilile mu Efwesu. (2 Kori. 1:8) Alioze, hanji muchihasa kupwa iye kewulukile mashimbu eka muze apwile mu ponde yikalu chinji. Paulu kasonekene ngwenyi, ‘kalitachikile ni ngongo’ mu Efwesu. Muchihasa kupwa hanji kalitachikile ni tushitu a mu yambu hanji ni atu api. (1 Kori. 15:32) Kashika, chinasoloka ngwe Paulu kota kapalikile mu yimwe ya ku yuma yacho.
f Chizavu cha akwa-milimo avuluka ngwo, guildas chapwile ni kupiangula atu anji. Ngwe chilweza, muze te hikwapalika sekulu yimuwika, chizavu hanji guilda ya akwa-kulinga mbolo no yaneha kapinda yozemwene walingiwile mu Efwesu.
