KAPITULU 23
“Ivwenu Haliapwila Liji Liami Liakulisambisa”
Paulu makalila umwenemwene muze ali hakachi ka mbunga yili ni ufwatulo unji ni muze ali mu Chota cha Akwa-Kuyula A-Yunda
Lusango yono kanakatuka ha Yilinga 21:18–23:10
1, 2. Mumu liaka postolo Paulu ahilukile mu Yerusaleme, mba kapinda muka awanyine?
CHEKA NAWA Paulu kanende mu matapalo a mu Yerusaleme! Ha miaka yinji kunyima, mu Yerusaleme mwe apwile ni kulingila uwayilo wamwenemwene hashi heswe. Mumu lia chino, atu jamo kakuwahilila chinji ha kwiwuluka sango jacho. Paulu kananyingika ngwenyi atu anji a mu mbonge yacho machinunga ni kulikwachilila ku sango ja ku shakulu chakuhona kumona chize upale wa Zambi te unamanunuka. Kashika, Paulu mamona ngwenyi, Akwa-Kristu a mu Yerusaleme kanahono ku musunya ni ku ufulielo. (Yili. 19:21) Chipwe ngwe te kananyingika yize yinamushimbwila, nihindu kalumwine yize atesele.
2 Yipikalo yika Paulu maliwana nayo mu Yerusaleme? Yimwe muyikatuka kuli tumbaji twa Kristu amwe waze machiyambashana ni sango jimwe hakutwala kuli Paulu. Alioze, mukusoloka nawa kapinda mukwo. Paulu mamulumbila sango ja mahuza, mamulamba ni kufupa kumushiha. Chipwe chocho, malikalila. Chilweza chenyi cha kulikehesa, hamu ni ufulielo muze anapalika mu yihungumiona yacho, necho muchihasa kutukwasa musono. Mu jila yika? Tutalenu.
“Yaputuka Kuchichimieka Zambi” (Yilinga 21:18-20)
3-5. (a) Aya Paulu apwile no ha kukunguluka, mba yuma yika ahanjikileho? (b) Yika mutuhasa kulilongesa ha kukunguluka cha Paulu ni makulwana ku Yerusaleme?
3 Muze ahetele ku Yerusaleme, Paulu ni masepa jenyi yaya ni kutala makulwana waze apwile ni kusongwela chikungulwila. Ha lusango wacho keshi kutongolaho postolo niumwe. Chino kota chalingiwile mumu apostolo jacho kayile ku yihela yikwo hanga ambulwileko sango jipema. Alioze, Tiangu mwanakwo ya Yesu kapwileho. (Ngala. 2:9) Iye kota mwe unakasongwela kukunguluka muze ‘makulwana eswe a mu chikungulwila apwileho’—Yili. 21:18.
4 Paulu yameneka makulwana, chocho yaputuka “kwalumbunwina mu yimako-yimako yuma yize Zambi anakalingila akwa-mavungu, kupalikila mu mulimo wenyi.” (Yili. 21:19) Kota lusango wacho kaatakamishine chinji! Ni yetu musono, muze twakwivwa sango hakutwala ku kukutatuka cha sango jipema mu yifuchi yeka, twakuwahilila chinji.—Yishi. 25:25.
5 Muchihasa kupwa hanji muze Paulu te anahanjika, yatongola milambu yize yakatukile ku Europa. Kulihulumba cha mandumbu waze apwile kusuku, kota chakwachile ku mbunge ya waze apanjikile lusango wa Paulu, kashika Mbimbiliya yinambe ngwo: “[Makulwana a mu chikungulwila] yaputuka kuchichimieka Zambi.” (Yili. 21:20) Ni musono, atu anji kakupinda ni luyinda wa chisemewa ni yikola, nihindu kakuwahilila chinji muze akwakwasa ku musunya ni ku ufulielo kuli mandumbu jo.
A-Yunda Anji te ‘Machifunga Shimbi jo’ (Yilinga 21:20, 21)
6. Mulonga uka makulwana alwezele Paulu?
6 Makulwana yalweza Paulu ngwo, ku Yundeya kwapwile umwe mulonga uze te unatale hali iye. O yamba ngwo: “Ndumbwetu, unanyingika ngwe A-Yunda anji apwa akwa-kufuliela, chikwo nawa, kakufunga Shimbi ni mbunge yo yeswe. Alioze kevwa sango ngwo, wakulongesa A-Yunda eswe waze atwama mukachi ka akwa-mavungu hanga ehuke Shimbi ya Mose, wakwamba nawa ngwe, kanda nupwisa ana jenu ngalami, chipwe kukaula mianda ya tulamba two.” a—Yili. 21:20, 21.
7, 8. (a) Nyonga lika Akwa-Kristu amwe ku Yundeya apwile nalio? (b) Mumu liaka kunyonga chacho kuchakalumbunukine ngwo, ayo kapwile yitanganyanyi?
7 Te hikwapalika yimwe miaka 20 chize haze shimbi ya Mose yahwile. Mba mumu liaka Akwa-Kristu anji te machinunga ni kuyifunga? (Kolo. 2:14) Ha mwaka 49 M.J, apostolo ni makulwana waze alikungulwile ku Yerusaleme katumine mukanda mu yikungulwila uze walumbunwine ngwo, Akwa-Kristu akwa-mavungu te katambile nawa kwapwisa ngalami hanji kwashinjila kukaula shimbi ya Mose. (Yili. 15:23-29) Alioze, mukanda wacho kuwakahanjikile hali Akwa-Kristu A-Yunda. Anji a kuli ayo te kanyingikine ngwo, shimbi ya Mose kuyishiko nawa.
8 Shina kunyonga chacho chalumbunukine ngwo, tumbaji A-Yunda te katelele kupwa Akwa-Kristu? Ka, hi chocho ko. Ayo te keshi kuwayila tuzambi a mahuza chipwe muze te kanda achipwa Akwa-Kristu, chikwo nawa, chipwe muze apwile Akwa-Kristu o yanunga ni kulikwachilila ku ufulielo wo. Yehova mwe wahanyine shimbi yize A-Yunda apwile ni kuvumbika chinji, kashika ayo kakavulumwine. Alioze, shimbi yacho te yinatale ha usendo ukulu, mumu haliapwila Akwa-Kristu te kali mu usendo waha. Kashika, A-Yunda katambile kukaula usongwelo waha mumu Shimbi te kuyishiko nawa. Akwa-Kristu A-Hepreu kapwile ni kuzanga chinji shimbi ya Mose, kashika te keshi kutayiza ngwo, haliapwila Zambi halulieka jila yaha ya kumuwayilamo. O katambile kwalumuna kunyonga cho hanga chilite ni usongwelo waha wa Yehova. b—Jere. 31:31-34; Luka 22:20.
“Yuma Yize Ambile Hakutwala Kuli Yena hi Yamwenemwene ko” (Yilinga 21:22-26)
9. Yika Paulu apwile ni kulongesa hakutwala ku Shimbi ya Mose?
9 Mba yika mutwamba hakutwala ku yize aliongelele Paulu ngwo, kanalongesa atu hanga ahone ‘kupwisa ana jo ngalami, chipwe kukaula mianda ya tulamba two’? Paulu kapwile apostolo wa akwa-mavungu kashika, kuli ayo chapwile ngwe Paulu te kanashinjila akwa-mavungu hanga ehuke Shimbi ya Mose. Iye nawa kapwile ni kukumika waze apwile ni kushinjila Akwa-Kristu akwa-mavungu alipwise ngalami ngwe chilayi cha kukaula Shimbi ya Mose. (Ngala. 5:1-7) Mu mambonge waze Paulu apwile ni kuya, iye te kakwambujola kuli A-Yunda. Kwamba pundu, Paulu kapwile ni kulweza A-Yunda waze apwile ni kumupanjika ngwo, kufwa cha Yesu chahwishile Shimbi ya Mose, chikwo nawa mutu mahasa kupemena kuli Zambi kupalikila ku ufulielo hi kupalikila mu yilinga ya Shimbi ko.—Roma 2:28, 29; 3:21-26.
10. Nyonga lika Paulu apwile nalio ha chikuma cha ungalami ni Shimbi ya Mose?
10 Paulu kapwile nawa ni kusolola vumbi kuli waze apwile ni kulivwa kanawa ha kukaula ndako jimwe ja A-Yunda ngwe, kuhona kukalakala ha tangwa lia Sambata hanji kulituna kulia chimwe. (Roma 14:1-6) Paulu kakapwile ni kusela akwo shimbi chipwe ha chikuma cha ungalami. Kwamba umwenemwene, iye kapwishile Timoteu ngalami mumu tato kapwile Ka-Ngregu ni mumu lia mandumbu amwe kutalinga. (Yili. 16:3) Chikuma cha ungalami chapwile chiyulo cha mutu mwene. Paulu kalwezele A-Ngalashia ngwenyi: “Chipwe ungalami, chipwe ulima, kuyishi ni ulemu niumwe. Alioze, chuma chilemu chili ufulielo uze wakwiza mumu lia zango.” (Ngala. 5:6) Kashika, kupwisa mutu ngalami hanga akaule Shimbi ya Mose ni kushinjila atu akwo no achilinge mba apwe ni utayizo wa Yehova te muchisolola kuhona ufulielo.
11. Usongwelo uka makulwana ahanyine kuli Paulu, alioze yika te katambile kulinga? (Tala nawa maliji mushi.)
11 Chipwe ngwe yuma yize ambile hali Paulu yapwile ya mahuza, nihindu yanungine ni kupinjisa Akwa-Kristu A-Yunda. Kashika, makulwana yalweza Paulu ngwo: “Tuli ni malunga awana waze ali ni chilakenyo chize atamba kumanununa. Yako hamwe no hanga nukalipemese, ni kwakwasa ha yize mafupiwa hanga akatewule kambu ku mitwe yo. Mba atu eswe manyingika ngwo, yuma yize ambile hakutwala kuli yena hi yamwenemwene ko, alioze mamba ngwo ni yena nawa wakwononokena Shimbi ya Mose.” c—Yili. 21:23, 24.
12. Kuchi Paulu akalakalile hamuwika ni makulwana a mu Yerusaleme?
12 Paulu kachi kambile ngwenyi, mulonga kuushi kuli yami, uli kuli Akwa-Kristu A-Yunda waze machinunga ni kukaula Shimbi ya Mose. Alioze, Paulu kapwile mwashi, kamwene ngwenyi te kechi kulimika ni shimbi ja Zambi. Ha amwe mashimbu kunyima kasonekene ngwenyi: “Kuli waze atwama kushi lia shimbi, nalisele kushi lia shimbi hanga ngukazuke waze ali kushi lia shimbi, chipwe ngwe yami mwene chishi kushi lia shimbi.” (1 Kori. 9:20) Chino chakwashile Paulu kukalakala hamuwika ni makulwana a mu Yerusaleme ni kulisa “kushi lia shimbi.” Ha kulinga chino, Paulu yatuhichikila chilweza chipema cha kukalakala hamuwika ni makulwana ni kuhona kulinga yuma kulita ni chize twakuzanga.—Hepre. 13:17.
Paulu kalingile yize makulwana amwichile mumu kamwene ngwenyi, yuma yacho te kuyichi kulimika ni shimbi ja Zambi. Shina ni yena che wakulinga?
“Katambile Kutwama ni Mwono!” (Yilinga 21:27–22:30)
13. (a) Mumu liaka A-Yunda amwe anehene vunda mu tembele? (b) Kuchi Paulu amulamwinyine?
13 Yuma mu tembele kuyendele kanawa. A-Yunda waze akatukile ku Azia yamona Paulu, chocho yamuliongela ngwo, kanatwala Akwa-Mavungu mu tembele, kashika, chino yichineha vunda. Nyi mwata wa maswalale kakaheteleho ni kawashi, kachi Paulu kamulambile ndo ku kufwa. Chipwe chocho, mwata wacho yasa Paulu mu zuwo lia ususu. Kukatuka haze, te mukupalika miaka yiwana mba Paulu apwe cheka ni utuswilo. Muze mwata wa maswalale ahulile kuli A-Yunda chilumbu chaka te analambe Paulu, o yamulamikiza yuma yinji. Ha mukunda wa chizungozungo mwata wa maswalale kahashile kwivwa nichimwe, kashika Paulu yamutwala ku chihela kuze te kunalihumikiza. Mba muze te anayi mu chilombo cha maswalale, Paulu yeta kuli mwata wa maswalale ngwenyi: “Ngunaliumbu . . ngutayize kama nguhanjike kuli atu.” (Yili. 21:39) Mwata wa maswalale yatayiza, chocho Paulu yaputuka kukalila ufulielo wenyi.
14, 15. (a) Yika Paulu alumbunwine kuli A-Yunda? (b) Yika mwata wa maswalale alingile hanga anyingike mumu liaka A-Yunda te anevwila Paulu kole?
14 Paulu yaputuka ni maliji a kwamba ngwo: “Ivwenu haliapwila liji liami lia kulisambisa kuli yenu.” (Yili. 22:1) Iye kahanjikile ni mbunga mu limi lia Hepreu, kashika chino chakwashile atu hanga alihumikize. Paulu yalumbununa mumu liaka atayijile kupwa kambaji ka Kristu. Ha kulinga chino, iye yasolola yikuma yimwe yize A-Yunda te mahasa kuhengwola nyi ene mazanga. Paulu kamufumbile kuli Ngamaliele, chikwo nawa kahungumionene Akwa-Kristu ngwe chize amwe a kuli ayo anyingikine. Alioze, muze te anayi ku Ndamaseku Paulu yamona Yesu mu usolwelo yoze wahanjikile nenyi. Waze apwile no mu wenyi yevwa liji liacho ni kumona pangu, alioze yize evwile kuyaakalumbunukine. (Yili. 9:7; 22:9) Kulutwe, Paulu yamutwala ku Ndamaseku kuli waze apwile no mu wenyi mumu te hapwa kapuputa mumu lia usolwelo uze amwene. Ku Ndamaseku, kwenako amuwukile kuli umwe lunga yoze te anyingika chinji kuli A-Yunda, Ananiya.
15 Paulu yamba nawa ngwenyi, muze afunyine mu Yerusaleme Yesu yamusolokela mu tembele. Ha kwivwa chino, A-Yunda yevwa uli unji mba yakololoka ni liji linene ngwo: “Shihenu mutu yono, mumu katambile kutwama ni mwono!” (Yili. 22:22) Mwata wa maswalale yatuma kutwala Paulu mu chilombo cha maswalale hanga amulamwine. Amu mwata wacho azangile kunyingika mumu liaka A-Yunda te anamuvwila kole yinji, yatuma hanga amwihujole ni kumulamba. Paulu yazachisa uhashi wacho hanga alweze mwata wacho ngwenyi, iye kali Ka-Roma. Ni musono nawa, Yela ja Yehova kakuzachisa ufunge uze akwete kulita ni shimbi hanga akalile ufulielo wo. (Tala mushete unambe ngwo, “ A-Roma ni Shimbi jo” ni “ Kukumba mu Yota ya Usopelo ha Matangwa Jetu.”) Muze mwata wa maswalale anyingikine ngwenyi Paulu kali Ka-Roma, yamona ngwenyi te katamba kuwana jila yikwo yakunyingikinamo mumu liaka Paulu anamuvwila kole kuli A-Yunda. Kashika, mukwachako yatwala Paulu mu Chota cha Akwa-kuyula A-Yunda hanga amusopese.
“Ami Nguli Ka-Fwariseu” (Yilinga 23:1-10)
16, 17. (a) Yika yalingiwile muze Paulu ahanjikile mu Chota cha Akwa-Kuyula A-Yunda? (b) Kuchi Paulu alikehesele muze amulambile?
16 Paulu yaputuka kulikalila mu Chota Cha Akwa-Kuyula A-Yunda ha kwamba ngwenyi: “Mandumbu, hingunende ni mbunge yitoma ku meso ja Zambi ndo ha tangwa lia musono.” (Yili. 23:1) Paulu kakahanjikile yuma yinji, alioze lusango kanambe ngwo: “Mwata wa asasendote Anania yambila waze te ali hamwe nenyi amulambe ku kanwa.” (Yili. 23:2) Chuma chize alingile chapwile chipi chinji, chikwo nawa chasolwele katonde, kuchi te mahisa Paulu chakuhona kusolola mumu liaka amusuma mulonga! Chocho Paulu yamukumbulula ngwenyi: “Chilembekese, Zambi makakulamba. Unatwama hanga ungusopese kulita ni shimbi, alioze yena mwene unashihi shimbi ha kutuma hanga angulambe, nyi?”—Yili. 23:3.
17 Atu amwe waze apwileho yevwa uli mumu lia yize Paulu ambile. Kashika yamba ngwo: “Yena unatuku mwata wa asasendote wa Zambi, nyi?” Paulu yaakumbulula ni kulikehesa cheswe ngwenyi: “Mandumbu jami, te chanyingikine ngwami kali mwata wa asasendote. Mumu hichinasonewa ngwo: ‘Kanda ukahanjika chipi hali mukwa-kuyula atu je.’” d (Yili. 23:4, 5; Kutuhu. 22:28) Muze amwene ngwenyi mu Chota Cha Akwa-Kuyula A-Yunda mwapwile A-Fwariseu ni A-Satuseu, Paulu yalumuna mutapu wa kulikalila ha kwamba ngwenyi: “Mandumbu, ami nguli Ka-Fwariseu, mwana wa A-Fwariseu. Kanangusopesa mumu lia kutalatala cha uhindukilo wa afu.”—Yili. 23:6.
Ngwe Paulu, ni yetu twakuhanjika yuma yize akwetu no akufuliela
18. Mumu liaka Paulu ambile ngwenyi, kali Ka-Fwariseu, mba kuchi mutuhasa kumwimbulula?
18 Mumu liaka Paulu ambile ngwenyi kali Ka-Fwariseu? Mumu iye kapwile “mwana wa A-Fwariseu” ni asoko jenyi kapwile A-Fwariseu. Kashika, atu anji te machimumona ngwe Ka-Fwariseu. e Mba kuchi Paulu te malumbununa ufulielo wa uhindukilo ni yize A-Fwariseu apwile ni kufuliela? Amwe kakutayiza ngwo, A-Fwariseu kapwile ni kufuliela ngwo, alma ya mutu yakununga ni mwono muze mutu akufwa chikwo nawa ngwo, muze mukwa-ululi akufwa, alma yenyi yakununga ni mwono mu mujimba wa mutu mweka. Paulu te keshi kutayiza malongeso jacho. Iye kapwile ni kufuliela ha uhindukilo kulita ni chize Yesu alongesele. (Yoa. 5:25-29) Chipwe chocho, Paulu te kakutayiza longeso lia A-Fwariseu liakwamba ngwo, kuli kutalatala cha mwono muze mutu akufwa, alioze A-Satuseu te kakulongesa ngwo, kwatwamine kutalatala nichimwe. Ni yetu mutuhasa kwimbulula Paulu muze mutuhanjika ni Akwa-Katolika hanji Akwa-Protestante. Mutuhasa kwalweza ngwetu, tulieswe twakufuliela muli Zambi. Ewa, chipwe ngwe ayo kakufuliela ha longeso lia tuzambi atatu, hindu yetu twakufuliela muli Zambi wamwenemwene. Kashika, yetweswe twakufuliela ngwetu, Zambi kwali.
19. Mumu liaka kukunguluka chize chalingiwile mu Chota Cha Akwa-Kuyula A-Yunda chahwile ni chizungozungo?
19 Yuma yize Paulu ambile yahandunwine Chota Cha Akwa-Kuyula A-Yunda. Lusango kanambe ngwo: ‘Kwapwile zungo linji, mba amwe alongeshi a shimbi a kuli A-Fwariseu, yakatuka ni kulihangulula chikolo ngwo: “Kutwawanyine upi muli mutu yono, nyi spiritu hanji mungelo hanahanjika nenyi—.’” (Yili. 23:9) A-Satuseu te keshi kutayiza ngwo kwatwama angelo, kashika muze evwile ngwo, mungelo hahanjika ni Paulu yaapihilila! (Tala mushete unambe ngwo, “ A-Fwariseu ni A-Satuseu.”) Chizungozungo chokele chinji, kashika cheka nawa mwata wa maswalale yalamwina Paulu. (Yili. 23:10) Chipwe chocho, Paulu te uchili mu ponde. Yika te muyilingiwa nawa kuli iye? Yino ye mutumona ha longeso mulihataho.
a Amu kwapwile A-Yunda anji Akwa-Kristu, chinasoloka ngwe yikungulwila yinji kota yapwile ku mazuwo ja mandumbu.
b Ha kupalika cha miaka yikepe, postolo Paulu yasolola chilumbu chaka usendo waha wahianyine usendo ukulu. Ha mukanda wa A-Hepreu Paulu yasolola zwalala ngwenyi, usendo waha wahwishile usendo ukulu. Kashika, yuma yize iye asonekene yakolesele ufulielo wa Akwa-Kristu A-Yunda waze apwile ni kulikwachilila chinji ku shimbi ya Mose.—Hepre. 8:7-13.
c Atu amwe kakwamba ngwo, malunga jacho kota kalingile chilakenyo cha kupwa Kanazireu. (Kwa. 6:1-21) Alioze, Shimbi ya Mose te kuyishiko nawa. Chipwe chocho, Paulu kota kanyongene ngwenyi, malunga jacho te katamba kumanununa chilakenyo chize alingile kuli Yehova. Kashika, te hi shili ko kuli Paulu kufweta wenyi wa malunga jacho ni kuya no hamuwika. Kutwanyingikine kanawa chilakenyo cha mutapu uka malunga jacho alakenyene. Chipwe chocho, Paulu kota kakaakwashile kulambula tushitu (ngwe yitapo yize A-Nazireu apwile ni kulambula), mumu kapwile ni kufuliela ngwo, chino chakupemesa atu ku shili yo. Chitapo cha ukuule wa Yesu chasalakanyine chitapo cha kulambula tushitu. Chipwe ngwe Paulu kalingile chuma cheswacho, nihindu mutuhasa kupwa ni shindakenyo ngwetu, iye kakalingile chuma nichimwe chize te muchisopesa mbunge yenyi.
d Atu amwe kakwamba ngwo, Paulu kakahashile kumona sasendote wa lutwe mumu meso jenyi te hahonga. Eka ngwo, iye kota te kanyingikine sasendote wacho mumu kalingile mashimbu anji chakuhona kufuna ku Yerusaleme. Amwe nawa ngwo, hamukunda wa mbunga waze te anamujingilika, Paulu kakamwene mutu yoze watumine hanga amulambe.
e Ha mwaka 49 M.J, muze apostolo ni makulwana alikungulwile hanga atale nyi akwa-mavungu katamba kukaula Shimbi ya Mose, Akwa-Kristu amwe waze apwileho kaavulukile ngwo, “A-Fwariseu waze te hafuliela.” (Yili. 15:5) Chinasoloka ngwe Akwa-Kristu jacho, ha mashimbu aze te machamona ngwe A-Fwariseu.