KAPITULU 6
Eshetevau—“Yoze Wapwile ni Utayizo ni Ndundo ja Zambi”
Yize mutuhasa kulilongesa ha hamu lize Eshetevau asolwele mu chota cha akwa-kuyula A-Yunda
Lusango yono kanakatuka ha Yilinga 6:8–8:3
1-3. (a) Mu kapinda muka Eshetevau ali, shina woma anevwu? (b) Yihula yika mutukumbulula mu longeso lino?
ESHETEVAU kali mu chota cha akwa-kuyula A-Yunda. Chihela chino, kota chili hakamwihi ni Yerusaleme. Ngaji 71 kalikungulula hamuwika hanga asopese Eshetevau. Ngaji jacho kali malunga a ndundo ni a lufuma, anji a kuli ayo keshi kuvumbika kambaji yono wa Yesu. Yoze waakungulula kali sasedonte wa lutwe Kayafwa, lunga yoze wasongwelele chota cha akwa-kuyula A-Yunda muze ahishile ni kushiha Yesu Kristu ha amwe tukweji kunyima. Shina Eshetevau woma anevu?
2 Atu eswe apwileho kakomokene ni yize amwene. Muze ngaji ahulikilile meso jo hali Eshetevau, “amwene chifwa chenyi chapwile ngwe chifwa cha umwe mungelo.” (Yili. 6:15) Angelo kakwambujola sango ja Yehova Zambi, kashika akwete hamu ni kulihumikiza. Chino che chalingiwile kuli Eshetevau. Chipwe ngaji waze apwile ni kumuvwila kole, kulihumikiza chacho kachimwene. Kuchi iye ahashile kuchilinga?
3 Amu tuli Akwa-Kristu, mutuhasa kulilongesa yuma yinji ha kumbululo lia chihula chino. Chikwo nawa, twatamba kunyingika mumu liaka Eshetevau amutwalile mu chota cha akwa-kuyula A-Yunda. Kuchi aliangile kukalila ufulielo wenyi kunyima? Kuchi mutuhasa kumwimbulula?
“Yasupula Mbunga” (Yilinga 6:8-15)
4, 5. (a) Mumu liaka Eshetevau apwile mulemu mu chikungulwila? (b) Mu mulali uka Eshetevau azalile too ni utayizo ni ndundo ja Zambi?
4 Ngwe chize hitwamona kulu, Eshetevau kapwile ni kukwasa chinji mu chikungulwila chaha cha Akwa-Kristu. Ha kapitulu wapalika twamona ngwetu, iye kapwile umwe wa kuli malunga shimbiali waze atayijile mulimo uze apostolo ahanyine wa kutetela mandumbu kulia. Muze twakutanga hakutwala ku kulikehesa chenyi ni utotombo uze Yehova amuhele, twakukomoka chinji. Mukanda wa Yilinga 6:8 wakusolola ngwo, iye katambwile ndundo ja Zambi hanga alinge “yilayi yinji ni yikomokeso” ngwe chize alingile apostolo amwe. Chikwo nawa, “kapwile ni utayizo ni ndundo ja Zambi.” Yika chino chinalumbunuka?
5 Chinasoloka ngwe Eshetevau kapwile ni kutwama kanawa ni akwo. Atu kapwile ni kumujikijila mumu lia yize apwile ni kuhanjika. Anji a kuli ayo kapwile ni kumumona ngwo, kapwa mutu mupema, chikwo nawa kapwile ni shindakenyo ngwo, umwenemwene uze apwile ni kwalongesa muuhasa kwakwasa. Eshetevau kazalile too ni spiritu ya Yehova. Chino chinasolola ngwo, iye kechele hanga spiritu ya Yehova yimusongwele. Shimbu alinangamise ha mukunda wa utotombo wenyi, yahana uchichimieko weswe kuli Yehova. Chino chasolwele ngwo, iye te kakulemesa akwo ha yize apwile ni kuhanjika. Kashika, kutushi kukomoka muze twakunyingika ngwetu atu anji kapwile ni kumuvwila kole!
6-8. (a) Mulonga uka asumine Eshetevau, mba mumu liaka? (b) Kuchi chilweza cha Eshetevau muchihasa kukwasa Akwa-Kristu musono?
6 Ha chisuho chimwe, malunga amwe yeza hanga alimike ni Eshetevau. “Alioze mumu lia ukwaso wa spiritu yisandu ni mana waze iye apwile ni kuhanjika no, o kahashile kulimika nenyi.” a Chocho o yevwa uli unji, mba yashinjila amwe malunga hanga amulamikize yuma ya mahuza. O nawa “yasupula mbunga” hamwe ni makulwana ni alongeshi a shimbi. Chocho yakwata Eshetevau ni kumutwala ku chota cha akwa-kuyula A-Yunda. (Yili. 6:9-12) Akwa-kole jacho yamusuma mulonga wa kushililika Zambi ni kushililika Mose. Mu mutapu uka iye te mahasa kulinga chuma chacho?
7 Yela a mahuza kalamikijile Eshetevau ha kwamba ngwo, kashililikile Zambi ha kushililika tembele, “chihela chisandu” chize chapwile mu Yerusaleme. (Yili. 6:13) Ayo kambile nawa ngwo, iye kashililikile Mose ha kuhanjika yuma yize yalisele ni yize Mose alongesele. Au wapwile mulonga unene, mumu ha mashimbu jacho A-Yunda kapwile ni kuvumbika chinji tembele, Shimbi ya Mose ni mianda yikwo yize apwile ni kukaula. Kashika, kuli ayo Eshetevau te katela kufwa mumu lia mulonga uze amusumine!
8 Chaluyinda, ni musono nawa mangana a mayingeleja kakuzachisa miheto yino yene hanga apinjise tuvumbi twa Zambi. Ayo kakushinjila akwa-mafwefwe hanga akaujole Yela ja Yehova. Yika mutulinga nyi matulamikiza yuma ya mahuza? Chilweza cha Eshetevau muchihasa kutukwasa kumona yize twatamba kulinga.
Kwambujola ni Hamu Hakutwala Kuli “Zambi ya Uhenya” (Yilinga 7:1-53)
9, 10. Yika atu amwe akwamba hakutwala ku yize Eshetevau ahanjikile, mba yika twatamba kwiwuluka?
9 Ngwe chize hitwamona ku uputukilo wa kapitulu yono, muze Eshetevau amulamikijile, iye yanunga ni kulihumikiza. Chifwa chenyi chapwile ngwe cha umwe mungelo. Kayafwa yatewuluka kuli iye ni kumuhula ngwenyi: “Shina yuma yino yamwenemwene?” (Yili. 7:1) Ali liapwile shimbu lia Eshetevau kuhanjika, chocho yahanjika lume!
10 Atu amwe kakwamba ngwo, chipwe ngwe Eshetevau kahanjikile chinji, nihindu yize ambile kuyakahwishile mulonga uze amusumine. Kwamba umwenemwene, Eshetevau katuhichikilile chilweza chipema cha chize “mutuhasa kukalila” sango jipema. (1 Petu. 3:15) Twiwulukenu ngwetu, Eshetevau kamulamikijile ngwo, kashililikile Zambi, tembele ni shimbi ya Mose. Yuma yize Eshetevau ahanjikile te yinatale ha yikuma yilemu yize yalingiwile mu Izalele ku mashimbu a kunyima. Tuhengwolenu yikuma yacho.
11, 12. (a) Kuchi Eshetevau azachishile kanawa chilweza cha Apalahama? (b) Mumu liaka Eshetevau atongwele Yosefwe ha pande jenyi?
11 Mashimbu a tulamba twa A-Izalele. (Yili. 7:1-16) Eshetevau kaputukile kuhanjika hakutwala kuli Apalahama, yoze A-Yunda apwile ni kuvumbika mumu lia ufulielo wenyi. Ha kuhanjika ha chikuma chino, Eshetevau yashindakenya ngwenyi, Yehova “Zambi ya uhenya,” kasolokele chisuho chitangu kuli Apalahama ku Mesopotamia. (Yili. 7:2) Kwamba umwenemwene, Apalahama kapwile chilambala mu chifuchi cha chilakenyo. Iye kakapwile ni tembele chipwe ni shimbi ya Mose. Chekwamba, ha mashimbu jacho mutu te kafupiwile tembele hanji shimbi jinji mba ashishike kuli Zambi.
12 Ha mashimbu ja Eshetevau, atu kapwile ni kuvumbika chinji Yosefwe yoze neye wapwile wa ku munyachi wa Apalahama. Alioze Eshetevau yewulula ngwenyi, mandumbu ja Yosefwe kamukaujolele ni kumulanjisa ngwe kapinji. Chipwe chocho, Zambi kamuzachishile hanga alamwine A-Izalele ku zala. Kwamba pundu, Eshetevau kanyingikine ngwenyi, yuma yize Yesu Kristu apalikile, yalifwile ni yize Yosefwe apalikile. Alioze, yehuka kuyitesa ha shimbu lize mumu kazangile hanga atu anunge ni kumupanjika.
13. Chilumbu chaka Eshetevau atongwele chilweza cha Mose, mba yika azangile kwamba?
13 Mashimbu ja Mose. (Yili. 7:17-43) Eshetevau kahanjikile chinji hali Mose, chino chapwile chipema mumu anji a kuli waze apwile mu Chota cha Akwa-Kuyula A-Yunda, kapwile A-Satuseu, atu waze te akulituna mikanda ya Mbimbiliya yize Mose kasonekene. Iwuluka ngwe, Eshetevau kamusumine mulonga wa kushililika Mose. Kashika, yuma yize ahanjikile yasolwele ngwo, kapwile ni kuvumbika Mose ni shimbi. (Yili. 7:38) Eshetevau kasolwele nawa ngwenyi, chipwe Mose muze apwile ni miaka 40, kalitunyineye kuli atu waze azangile kulamwina. Hakupalika cha miaka 40, nihindu o yanunga ni kulituna chiyulo chenyi. b Eshetevau yasolola zwalala yize azangile kwamba: A-Izalele kalitunyine atu waze Yehova atumine hanga aasongwele.
14. Chikuma chika Eshetevau ashindakenyene muze atongwele chilweza cha Mose?
14 Eshetevau kewulwile atu waze te anamupanjika ngwenyi, Mose mwene kaprofetezele ngwenyi, mu Izalele te mumusoloka profeta walifwa nenyi. Iya te mapwa profeta wacho? Chikwo nawa, kuchi te mamutambula? Eshetevau te makumbulula yihula yino ha pande jenyi. Iye kashindakenyene chikuma chikwo chilemu: Mose kalilongesele ngwenyi, chihela cheswacho muchihasa kupwa chisandu, ngwe chize chalingiwile ku chiputa chize chalekwokele ni kahia muze Yehova ahanjikile nenyi. Shina Yehova kanazange tumuwayile ha chihela chimuwika, ngwe chize chapwile mu tembele yize yapwile mu Yerusaleme? Tutalenu.
15, 16. (a) Chilumbu chaka kutongola chikuma cha tabernakulu chapwile chilemu? (b) Chilumbu chaka Eshetevau atongwele tembele ya Solomone?
15 Tabernakulu ni tembele. (Yili. 7:44-50) Eshetevau kewulwile ngaji ngwenyi, muze te kanda muchipwa tembele mu Yerusaleme, Zambi kalwezele Mose hanga atunge tabernakulu, hanji mbalaka ya kuwayilamo Zambi yize mahasa kututulula. Kashika, niumwe te kechi kuhasa kwamba ngwenyi, tembele yahianyine tabernakulu mumu, Mose mwenamo awayililile Zambi.
16 Solomone katongwele chikuma chimwe chilemu mu yilemba muze te hahwisa kutunga tembele mu Yerusaleme. Eshetevau yamba maliji waze-ene Solomone ambile ngwenyi: “Mwe Chitunda keshi kutwama mu mazuwo a kutunga ni moko ja atu.” (Yili. 7:48; 2 Sango 6:18) Yehova mahasa kuzachisa tembele hanga amununune upale wenyi. Hindu, iye kafupiwile tembele mba alingilemo yize anapale. Kashika, tuvumbi twenyi kafupiwile chihela cha kutunga ni moko mba amuwayile. Kusongo, Eshetevau matongola maliji a Izaia anambe ngwo: “Lilu ye ngunja yami, hashi he homa haze nakunangika molu jami. Zuwo lika munukangutungila? Chocho anambe Yehova. Kulihi mukukapwa chihela chami cha uhwimino? Hi kwoko liami ko lialingile yino yuma yeswe nyi?”—Yili. 7:49, 50; Iza. 66:1, 2.
17. Kuchi yuma yize Eshetevau ambile yasolwele manyonga ja akwa-kole jenyi ni kukumbulula mulonga uze amusumine?
17 Ndo hano twamona ngwetu, akwa-kole ja Eshetevau kazangile kumulinga wika upi. Eshetevau kasolwele ngwenyi Yehova kapwa mwashi, keshi kulikwachilila ku mianda, kakulinga cheswacho mazanga hanga amanunune upale wenyi. Atu waze te anapanjika Eshetevau, kapwile ni kuzanga chinji tembele ni mianda ya atu. Alioze, o te kanyingikine mumu liaka Yehova ahanyine shimbi jenyi, ni mumu liaka atumine kutunga tembele. Chekwamba, chapwile ngwe Eshetevau kazangile kwahula ngwenyi, shina kwatama jila yikwo yipema yakuhalishilamo shimbi ni tembele, kuhiana kwononokena Zambi? Yuma yize Eshetevau ambile yasolwele ngwo, iye kakalingile upi niumwe mumu kononokene Yehova.
18. Mu mutapu uka mutuhasa kwimbulula Eshetevau?
18 Yika twalilongesa ha pande ja Eshetevau? Twamona ngwetu, Eshetevau kapwile longi mupema wa Mbimbiliya. Chizechene nawa, ni yetu twatamba kupwa alongi apema a Mbimbiliya nyi tunazange kupwa ‘akwa-kupatula kanawa mu liji lia Zambi.’ (2 Timo. 2:15) Chikwo nawa, mutuhasa kulilongesa ha mutapu uze Eshetevau ahanjikile ni atu waze te anamupanjika. Chipwe ngwe, anji a kuli atu jacho kapwile yitenu, nihindu Eshetevau yahanjika yuma yize ayo azangile kwivwa ni yize apwile ni kulemesa. Eshetevau kasolwele nawa vumbi kuli atu jacho, ha kuvuluka waze apwile ni chiyulo ngwenyi, “atata.” (Yili. 7:2) Ni yetu twatamba kuhanjika hakutwala ku Liji lia Zambi ni “kulihumikiza cheswe ni vumbi linji.”—1 Petu. 3:15.
19. Kuchi Eshetevau ambujolele ni hamu upatwilo wa Zambi mu chota cha akwa-kuyula A-Yunda?
19 Kutushi kulitwamina kwambujola umwenemwene wa mu Liji lia Zambi mumu ngwo, kutwazangile kuvwisa atu kupiha. Chikwo nawa, kutushi kulengulula sango ja upatwilo wa Yehova. Hakutwala ku chikuma chino, Eshetevau kali chilweza chipema. Kwamba pundu, iye kanyingikine ngwenyi, yuma yeswe yize te anahanjika mu chota cha akwa-kuyula A-Yunda, te kuyichi kwalumuna manyonga ja ngaji. Kashika, ni ukwaso wa spiritu yisandu iye yasolola zwalala ngwenyi, ngaji jacho kapwile ngwe tulamba two waze alitunyine Mose, Yosefwe ni aprofeta akwo. (Yili. 7:51-53) Ewa, ngaji jacho e ashihile Yesu, yoze kwiza chenyi achiprofetezele kuli Mose ni aprofeta eswe. Kwamba pundu, ngaji jacho kehukile chinji Shimbi ya Mose!
“Mwene Yesu, Tambula Kama Mwono Wami” (Yilinga 7:54–8:3)
“Ha kwivwa yuma yino, yatenuka mu mbunge ni kuputuka kulikeleketa ku mazo hali iye.”—Yilinga 7:54
20, 21. Kuchi ngaji a mu Chota cha Akwa-Kuyula A-Yunda alivwile ha yize Eshetevau ambile, mba kuchi Yehova amutakamishile?
20 Yuma yize Eshetevau ahanjikile mu chota cha akwa-kuyula A-Yunda, yevwishile ngaji uli unji. Chocho, chakuhona kulihumikiza ni “kulikeleketa ku mazo” yalukukila Eshetevau. Lunga yono washishika kanyingikine ngwenyi, kechi kumusolwela keke ngwe chizechene kachilingile hali Mwene wenyi Yesu.
21 Eshetevau te mafupiwa hamu hanga ahase kukumba yize muyisoloka kulutwe. Kwamba umwenemwene, iye katakamine ni usolwelo uze amwene. Eshetevau kamwene uhenya wa Zambi ni Yesu kanamana ku chindume cha Tato. Muze te analumbununa usolwelo uze amona, ngaji yajika mwatwi jo. Mumu liaka? Ha shimbu likepe kunyima, mu chota chizechene cha akwa-kuyula A-Yunda Yesu kambile ngwenyi, kali Mesaya, chikwo nawa kwasala hakehe matwama ku chindume cha Tato. (Marku 14:62) Usolwelo uze Eshetevau amwene washindakenyene ngwo, yize Yesu ambile yapwile yamwenemwene. Kwamba pundu, asasendote jacho kakunjikile Mesaya ni kumushiha! Chocho eswe alukukilile Eshetevau ha shimbu limuwika, ni kumwasa mawe ndo ha kufwa chenyi. c
22, 23. Mu mulali uka kufwa cha Eshetevau chalifwile ni cha Mwene wenyi, kuchi Akwa-Kristu musono mahasa kupwa ni ujikijilo ngwe wa Eshetevau?
22 Mutuhasa kwamba ngwetu, Eshetevau kafwile ngwe Mwene wenyi. Kafwile ni sambukila, ni kujikijila muli Yehova, yakonekena atu waze te anamulingi upi. Yalemba ngwenyi: “Mwene Yesu tambula kama mwono wami.” Kota kambile chino mumu te machimona Yesu hamwe ni Tato mu usolwelo. Kwamba pundu, Eshetevau kanyingikene kanawa maliji a Yesu akwamba ngwo: “Yami nguli uhindukilo ni mwono.” (Yoa. 11:25) Kusulaho, Eshetevau yalemba kuli Zambi ni liji mwilu ngwenyi: “Yehova, kanda waahisa kama ha shili yino.” Mba muze te hamba maliji wano, yafwa.—Yili. 7:59, 60.
23 Hachino, Eshetevau yapwa mártir, hanji ngwetu, kambaji mutangu wa Kristu yoze ashihile kuli akwa-kole jenyi. (Tala mushete unambe ngwo, “ Kapwile ‘Mártir’ mu Mutapu uka?”) Chaluyinda, Eshetevau te kechi kupwa kambaji wakasula yoze mashiha kuli akwa-kole. Ni musono nawa, tuvumbi anji a Yehova kakwashiha kuli mangana a mayingeleja, akwa-mafwefwe, ni akwa-kole akwo. Chipwe chocho, ni yetu mutuhasa kujikijila muli Yehova. Haliapwila Yesu kali Mwanangana, chikwo nawa makazachisa ndundo jize amuhele kuli Tato hanga ahwise yihungumiona yeswe. Kukushi nichimwe chize muchikamukwika kuhindwisa tumbaji twenyi ashishika waze hanafwu.—Yoa. 5:28, 29.
24. Kuchi Saulu akwashile kushiha Eshetevau, mba kuchi kufwa cha lunga yono washishika chakwashile Akwa-Kristu akwo?
24 Mukweze Saulu, kamwene yuma yeswe yize te yinalingiwa. Iye kapwile umwe wa kuli waze atayijile kushiha Eshetevau. Iye mwe wafungile mazalo ja waze ashile mawe Eshetevau. Ha kupalika cha shimbu likepe yasongwela chimwe kuhungumiona chinene. Alioze, kufwa cha Eshetevau te muchikwasa atu anji. Chilweza chenyi chatakamishine Akwa-Kristu akwo hanga anunge ni kunyongonona ni kufuliela ngwo, no mahasa kukumba ngwe chize iye akumbile. Ha kupalika cha miaka, Saulu te maliseha mumu lia kukwasa waze ashihile Eshetevau. (Yili. 22:20) Chipwe ngwe Saulu kakwashile waze ashihile Eshetevau, hindu, ha kupalika cha mashimbu yatayiza ngwenyi: “Napwile kunyima mukwa kushililika Zambi, mukwa kuhungumiona, mukwa kupopolola.” (1 Timo. 1:13) Kwamba pundu, Paulu kakavulamine pande jize Eshetevau ahanjikile. Yuma yinji yize Paulu ahanjikile ha kupalika cha mashimbu, yalifwile ni yize Eshetevau ahanjikile ha pande jenyi. (Yili. 7:48; 17:24; Hepre. 9:24) Ha kupalika cha mashimbu, Paulu yalilongesa ni chilweza cha Eshetevau, lunga washishika yoze wazalile too ni “utayizo ni ndundo ja Zambi.” Kashika, tulihulenu ngwetu: Shina ni yetu mutukaula chilweza cha Eshetevau?
a Amwe a kuli akwa-kole jacho kapwile a ku “Sunangonga ya A-Libertino.” Muchihasa kupwa ngwe atu jacho kali waze akwachile kuli A-Roma, mba kulutwe yaatusula. Hanji muchihasa kupwa nawa, waze alipwishile ene A-Yunda. Amwe a kuli ayo kapwile a ku Selishia ngwe chize Saulu apwile. Lusango keshi kusolola nyi Saulu kapwile hamuwika ni atu waze kakahashile kulimika ni Eshetevau.
b Ha pande ja Eshetevau, twakuwanaho sango jize kujishi kusoloka mu yihanda yikwo ya mu Mbimbiliya ngwe, fumbo lize Mose atambwile ku Engitu, miaka yize apwile nayo muze achinyine mu Engitu ni mashimbu waze alingile ku Mindiane.
c Kutushi ni shindakenyo nyi chamwenemwene Chota cha Akwa-Kuyula A-Yunda chapwile ni utayizo wa A-Roma wa kushiha mutu. (Yoa. 18:31) Alioze, chakusoloka ngwe chiyulo cha kushiha Eshetevau chakatukile kuli mbunga waze apwile ni ufwatulo unji. Kuchakapwile chiyulo chize ngaji a mu chota chacho akwachile.