KAPITULU 4
“Atu Waze Kajamine ha Kulilongesa”
Apostolo maawahisa kuli Yehova ha kusolola hamu
Lusango yono kanakatuka ha Yilinga 3:1–5:11
1, 2. Chikomokeso chika Petulu ni Yoano alingile ku chikolo cha tembele?
HIKWAPWA chingoloshi, A-Yunda ni tumbaji kananjila mu tembele. Kwasala hakehe mashimbu a “kulemba” ahete. a (Yili. 2:46; 3:1) Muze ali mukachi ka mbunga, Petulu ni Yoano kanayi ndo ku unjililo wa tembele uze avuluka ngwo, Chipema. Uze yikolo yawo yakulinga ni unengu wa mu mbonge ya Korindu. O mevwa liji lia umwe unechi yawana, lunga wacho kali chilema chize ku kusemuka chenyi.—Yili. 3:2; 4:22.
2 Muze Petulu ni Yoano makundama, lunga wacho meta mbongo ngwe chize akulinga matangwa eswe. Muze apostolo mamana, lunga wacho maatala ni kushimbwila ngwenyi, mamwaha chuma chimwe. Petulu mamukumbulula ngwenyi, “Prata ni oru chishi nayo,” mba mamba nawa ngwenyi, “alioze mungukwaha yize nguli nayo. Mu jina lia Yesu Kristu Ka-Nazare, katuka wende!” Chocho Petulu mamukwata ku kwoko hanga amukwase kukatuka! Atu waze apwileho kota kakomokene chinji muze amwene lunga yoze wapwile chilema, makatuka hanga ende ha chisuho chenyi chitangu! (Yili. 3:6, 7) Muhasa kunyonga hali lunga wacho muze anatala ku molo jenyi aku kanakomoka, ni kweseka kwenda ha chisuho chitangu! Lunga wacho kanawahilila chinji ni kutumbwoka sali ni sali, chikwo nawa kanahalisa Zambi ni liji mwilu!
3. Chawana chika chipema atambwile mbunga ni lunga yoze wapwile chilema?
3 Mbunga kanakomoka, kashika mazombokela kuli Petulu ni Yoano, ku chilumbilo cha Solomone. Ha chihela hazehene Yesu apwile ni kumana yisuho yinji hanga alongese atu, Petulu maalumbunwina kanawa yize yalingiwa. (Yoa. 10:23) Chawana chize mahana kuli mbunga ni kuli lunga yoze wapwile chilema, chinahiana prata ni oru. Chawana chacho kuchatalile wika ha kupwa ni mujimba upema, alioze chinatale nawa ha kulikonyeka ni kujimuna shili yo, ni kupwa tumbaji twa “Kasongo wa ufulielo wetu” yoze Yehova asakwile, Yesu Kristu.—Yili. 3:15.
4. (a) Chikomokeso chize Petulu ni Yoano alingile chaaluliekele ha yika? (b) Yihula yika yaali mutukumbulula?
4 Yuma yize yalingiwa, atu kechi keza kayivulama! Lunga yoze awuka, haliapwila mahasa kwenda. Tununu a tununu twa atu no kapwa ni uhashi wa kwawuka ku ufulielo ahase kwenda kulita ni upale wa Zambi. (Kolo. 1:9, 10) Chikwo nawa, yuma yize yalingiwa yalulieka tumbaji twa Kristu mumu lia mianangana waze te maakinda kumanununa shimbi ya Yesu, ya kwambujola sango ja Wanangana. (Yili. 1:8) Longeso lika mutuhasa kuwana ha majila ni yitanga yize Petulu ni Yoano, malunga waze “kajamine ha kulilongesa” azachishile hanga ambujole sango jipema? b (Yili. 4:13) Kuchi mutuhasa kwimbulula jila yize ayo ni tumbaji azachishile hanga akumbe yihungumiona?
Hi “ku Tachi ja Yetu ene” Ko (Yilinga 3:11-26)
5. Yika mutuhasa kulilongesa ha chize Petulu ahanjikile ni mbunga?
5 Petulu ni Yoano yamana kulutwe lia mbunga chipwe ngwe kanyingikine ngwo, kota amwe a kuli ayo e akunjikile Yesu. (Marku 15:8-15; Yili. 3:13-15) Achinyonga ha hamu lize Petulu asolwele muze ahanjikile chakuhona kwivwa woma ngwenyi, lunga chilema kamuwuka mu jina lia Yesu. Petulu kahanjikile umwenemwene, kasolwele ngwenyi amwe a kuli waze apwile ha mbunga no kakwashile kukunjika Yesu. Chipwe chocho, Petulu te keshi kwatulikila toto mumu kanyingikine ngwenyi, amwe a kuli ayo kachilingile hamukunda wa “kwalajala” cho. (Yili. 3:17) Petulu kesekele kwakwata ku mbunge ha kwasanyika ngwenyi mandumbu ni kwambulwila sango ja Wanangana. Atu jacho te mapwa ha “miaka ya kuhuzuluka ya kuli Yehova” muze malikonyeka ni kufuliela muli Kristu. (Yili. 3:19) Chizechene nawa, ni yetu twatamba kusolola hamu ha kuhanjika umwenemwene hakutwala ku upatwilo wa Zambi, uze kwasala hakehe wize. Muze mutuchilinga, kutwatambile kupwa atu akalu, alioze twatamba kusolola vumbi. Twatamba kumona atu waze twakwambulwila ngwe atu waze kulutwe makapwa mandumbu jetu, ngwe Petulu, twatamba kulihulikila chipi-chipi ha sango ja Wanangana.
6. Kuchi Petulu ni Yoano asolwele ngwo kakulikehesa?
6 Apostolo kapwile atu waze alikehesa, o kakalingile chikomokeso hanga achichimieke. Petulu yahula mbunga ngwenyi: “Mumu liaka nunahulikila meso jenu hali yetu, shina ku tachi ja yetu ene hanji mumu ngwetu twakuwayila Zambi kashika lunga yono enda?” (Yili. 3:12) Petulu ni apostolo akwo kanyingikine ngwo, chuma cheswe chize apwile ni kulinga mu mulimo wa kwambujola, Zambi mwe wapwile ni kwakwasa hi ene ko. Kashika o apwile ni kulikehesa ni kuhana uchichimieko weswe kuli Yehova ni Yesu ha yeswe yize alingile.
7, 8. (a) Chawana chika mutuhasa kuhana kuli akwetu? (b) Kuchi uprofeto wa ‘kululieka yuma yeswe’ unamanunuka musono?
7 Ni yetu musono twatamba kulikehesa muze tuli mu mulimo wa kwambujola. Tunanyingika ngwetu, musono spiritu ya Zambi kuyishi kukwasa Akwa-Kristu kulinga yikomokeso. Alioze, mutuhasa kukwasa atu afuliele muli Zambi ni Kristu ni kwaha uhashi wa kwakonekena shili yo ni kwatakamisa kuli Yehova ngwe chize Petulu alingile. Hita mwaka, tununu a tununu twa atu kakutayiza uhashi wacho ni kupwa tumbaji twa Kristu akupapachisa.
8 Kwamba pundu, tuli ha mashimbu waze Petulu avulukile ngwenyi, mashimbu ‘akululieka yuma yeswe yize ahanjikile kupalikila muli aprofeta jenyi asandu a ku shakulu.’ Maliji jacho kamanunukine muze Wanangana wa Zambi waputukile kuyula mu malilu ha mwaka 1914. (Yili. 3:21; Samu 110:1-3; Danie. 4:16, 17) Ha kupalika cha mashimbu akehe, Kristu yakwasa tumbaji twenyi kuhilwisa cheka uwayilo wamwenemwene. Chino chakukwasa tununu a tununu twa atu eze mu umwenemwene ni kupwa mu chiyulo cha Wanangana wa Zambi. O kakuzula mutu mukulu hanga azale “mutu mwaha” yoze hanamutange nikulita ni Zambi. (Efwe. 4:22-24) Ngwe chize chalingiwile kuli lunga yoze wapwile chilema, mulimo uno wakukomwesa kutushi kuulinga ku tachi jetu, alioze twakuhasa kuulinga ni ukwaso wa spiritu yisandu. Ngwe chizechene Petulu alingile, ni yetu twatamba kuzachisa kanawa Liji lia Zambi hamwe ni hamu muze tunalongesa akwetu. Kashika, muze mutukwasa mutu umwe kupwa kambaji ka Kristu, twatamba kuchichimieka Zambi, hi yetwene ko.
“Kutwahashile Kulitwamina Kwambujola” (Yilinga 4:1-22)
9-11. (a) Yika mangana A-Yunda alingile muze evwile sango ja Petulu ni Yoano? (b) Yika apostolo atesele kulinga?
9 Atu te kanawahilila chinji mumu lia pande jize Petulu ahanjikile, ni mumu lia lunga yoze awukile te unatumbwoka ni uwahililo. Kashika, kapitau ka tembele ni asasendote kawashi-washi yafupa kunyingika yize te yinalingiwa. Kota malunga jacho kapwile A-Saduseu, atu pichi waze apwile ni kulinga chuma cheswacho hanga alivwashane ni A-Roma. A-Saduseu kapwile ni kulituna shimbi ja A-Fwariseu, chikwo nawa, o te keshi kufuliela ha longeso lia uhindukilo. c Chinasoloka ngwe muze A-Saduseu awanyine Petulu ni Yoano mu tembele kanalongesa ni hamu ngwo, Yesu kamuhindwisa, kota uli unji evwile!
10 Akwa-kole jacho yasa Petulu ni Yoano mu zuwo lia ususu, mukwachako, yaatwala ku chihela chize A-Yunda akusopesela. Kuli akwa-kuyula, Petulu ni Yoano kapwile ngwe atu waze “kajamine ha kulilongesa,” chikwo nawa te katambile kulongesa mu tembele. O kakalilongesele ku shikola yize atu te ananyingika chinji a mashimbu jacho. Alioze, hamu ni shindakenyo yize asolwele yakomwesele akwa-kuyula. Yika yakwashile Petulu ni Yoano kuhanjika kanawa? Chuma chimwe chaakwashile chili ngwo, “kapwile hamwe ni Yesu.” (Yili. 4:13) Mwata wo kaalongesele ngwe yoze uli ni chiyulo hi ngwe alongeshi a shimbi ko.—Mateu 7:28, 29.
11 Akwa-kuyula yalweza apostolo hanga alitwamine kwambujola. Ha mashimbu jacho, atu kapwile ni kulemesa chinji yuma yize akwa-kuyula apwile ni kuhanjika. Atu jacho e ambile nawa ngwo, Yesu “kanatela kufwa.” (Mateu 26:59-66) Chipwe chocho, Petulu ni Yoano kakevwile woma. Chipwe ngwe homa hacho hapwile pichi, atu alongoloka ni akwa-lufuma, nihindu Petulu ni Yoano yahanjika ni hamu hamwe ni vumbi ngwo: “Patulenu yenwene nyi chinalite kumeso ja Zambi kwononokena yenu kuhiana Zambi. Mumu yetu kutwahashile kulitwamina kwambujola yuma yize twamwene ni yize twevwile.”—Yili. 4:19, 20.
12. Yika muyitukwasa kupwa ni hamu hamwe ni shindakenyo?
12 Shina ni yena ukwete hamu lia mutapu au? Kuchi wakwivwa muze wakupwa ni uhashi wa kwambujola sango jipema kuli pichi, atu alongoloka ni akwa-lufuma atwama mu mbonge ye? Yika wakulinga muze asoko je ni alongi ni akwenu akukuhepwisa mumu lia yize wafuliela? Shina woma wakwivwa? Nyi woma wakwivwa nyingika ngwe, woma wacho muhasa kuukumba. Muze Yesu apwile hano hashi, kalongesele tumbaji twenyi akalile ufulielo wo ni hamu hamwe ni vumbi. (Mateu 10:11-18) Mba muze amuhindwishile yalakenya tumbaji twenyi ngwenyi, manunga ni kupwa no “matangwa eswe, ndo ku songo lia miaka yino.” (Mateu 28:20) Musono, Yesu kakutulongesa chize mutuhasa kukalila ufulielo wetu kupalikila muli “ndungo washishika, wakanyama.” (Mateu 24:45-47; 1 Petu. 3:15) Chino chakulingiwa ha usongwelo uze twakutambula ha kukunguluka cha chikungulwila ngwe, Mwono Wetu ni Mulimo Wetu, mikanda yize yakulumbununa Mbimbiliya, ni yikuma yize yakusoloka ha jw.org yakwamba ngwo, “Kumbululo lia Yihula ya Mbimbiliya.” Shina tunazachisa kanawa ukwaso wacho? Nyi twazachisa kanawa ukwaso wacho, shindakenyo ni hamu lietu muyoka. Chizechene ngwe apostolo, ni yetu kutwatambile kwecha hanga chuma nichimwe chitukwike kwambujola yuma yipema yize twakulilongesa.
Kanda wecha chuma nichimwe chikukwike kwambujola yuma yize wakulilongesa
“Yalemba Kuli Zambi” (Yilinga 4:23-31)
13, 14. Yuma yika twatamba kulinga muze anatuhungumiona, mba mumu liaka?
13 Muze Petulu ni Yoano aatuswile mu zuwo lia ususu, kawashi-washi yalikungulula ni mandumbu akwo. Eswe “yaalemba kuli Zambi” ete hamu hanga anunge ni kwambujola. (Yili. 4:24) Petulu kanyingikine ngwenyi, mutu katambile kulijikijila mwene muze anafupu kulinga upale wa Zambi. Ha chisuho chimwe kalwezele Yesu ngwenyi: “Chipwe ngwe eswe matalinga hali yena, yami chichi kutalinga nilimwe tangwa!” Alioze, ngwe chizechene Yesu ambile, Petulu yevwa woma wa atu, mba yalituna sepa lienyi, kanda longeshi yenyi. Chipwe chocho, iye kalilongesele yimwe ha uhenge wenyi.—Mateu 26:33, 34, 69-75.
14 Nyi unazange kulinga kanawa mulimo wa kwambujola ngwe kambaji ka Kristu, kuwatambile kusolola wika hamu, watamba kulinga nawa yimwe. Imbulula Petulu ni Yoano muze akwa-kole je meseka kupihisa ufulielo we hanji kukukanjisa kwambujola. Lemba kuli Yehova akwehe tachi, fupa ukwaso wa mandumbu je a mu chikungulwila, lweza makulwana a mu chikungulwila ni mandumbu akwo ajama yuma yize unapalika ku mwono. Yilemba ya mandumbu jetu muyihasa kutwaha hamu hanga tununge ni kunyongonona.—Efwe. 6:18; Tia. 5:16.
15. Mumu liaka atu waze echele kwambujola ha shimbu limwe katambile kuhonga?
15 Kanda unenganyana nyi hiunalitwamina kwambujola ha shimbu limwe. Iwuluka ngwe, apostolo no kechele kwambujola ha shimbu limwe muze Yesu afwile, alioze ha kupalika cha mashimbu yaputuka kwambujola cheka. (Mateu 26:56; 28:10, 16-20) Shimbu ulihulikile ha uhenge uze walingile, zachisa longeso lize walilongesa ha uhenge wacho hanga utakamise akwenu.
16, 17. Kulemba chize tumbaji twa Yesu alingile mu Yerusaleme yika chinatulongesa?
16 Yika twatamba kutongola mu yilemba muze manguvulu anatuhungumiona? Tumbaji kakechile hanga ahone kupalika mu yihungumiona, o kanyingikine kanawa maliji a Yesu akwamba ngwo: “Nyi hanguhungumiona yami, ni yenu nawa kumanuhungumiona.” (Yoa. 15:20) Tumbaji wano ashishika, kechile kuli Yehova amone “kukanjisa” cha akwa-kole jo. (Yili. 4:29) Kashika, chinasoloka zwalala ngwo, tumbaji twa Yesu kakapwile ni kulihulikila wika ha yihungumiona yo, alioze kapwile nawa ni kulihulikila ha umanunuko wa uprofeto. Kulita ni chize Yesu aalongesele, tumbaji kanyingikine ngwo, upale wa Zambi “hano hashi” te muulingiwa chipwe ngwe manguvulu malinga chuma cheswacho.—Mateu 6:9, 10.
17 Tumbaji twa Yesu kazangile kulinga upale wa Zambi, kashika alembele kuli Yehova ngwo: “Hana kama hamu kuli tuvumbi twe hanga anunge ni kwambujola liji lie.” Shina Yehova kakumbulwile kulemba chino? “Zuwo lize te analikungulwila lianyikine, chocho eswe azalile too ni spiritu yisandu, mba yaputuka kwambujola liji lia Zambi ni hamu.” (Yili. 4:29-31) Kwatwamine chuma nichimwe chize muchihasa kukwika upale wa Zambi. (Iza. 55:11) Chipwe ngwe yikwiko yetu muyihasa kusoloka ngwe yinene chinji, chipwe ngwe mukwa-kole wetu mahasa kusoloka ngwe kutuchi kuhasa kumukumba, nihindu nyi twalemba kuli Zambi, mutuhasa kupwa ni shindakenyo ngwetu, iye matwaha tachi jize tunafupiwa hanga tununge ni kwambujola Liji lienyi ni hamu.
“Kuwahanjikile Mahuza Kuli Atu, Alioze Kuli Zambi” (Yilinga 4:32–5:11)
18. Yika mandumbu mu chikungulwila cha Yerusaleme apwile ni kulinga hanga alikwase umwe ni mukwo?
18 Chikungulwila chaha mu Yerusaleme, te hichapwa ni unji wa tumbaji 5,000. d Chipwe ngwe tumbaji jacho kapwile ni utotombo walisa, nihindu kapwile ni “mbunge yimuwika ni alma yimuwika,” kapwile ni kunyonga chimuwika. (Yili. 4:32; 1 Kori. 1:10) O kakapwile wika ni kwita kuli Yehova hanga awahise tachi jize apwile ni kusa, alioze kapwile kulikwasa umwe ni mukwo ku ufulielo ni ku musunya. (1 Yoa. 3:16-18) Chilweza chimwe chili cha kambaji Yosefwe, yoze apostolo asanyikine ngwo, Mbarnabe. Iye kalanjishile munda wenyi ni kuhana mbongo hanga akwase mandumbu waze akatukile kusuku, chino te muchaakwasa kupalikisa matangwa amwe mu Yerusaleme hanga akolese ufulielo wo.
19. Mumu liaka Yehova ashihile Ananiya ni Safira?
19 Ananiya ni Safira no kalanjishile munda wo hanga akwase mandumbu. Ayo kambile ngwo kahanyine mbongo jeswe, alioze “yasweka chihanda chikwo cha mbongo.” (Yili. 5:2) Yehova kaashihile mumu kahanjikile mahuza, hi mumu lia kuhana ko mbongo jikehe. O kakahanjikile “mahuza kuli atu, alioze kuli Zambi.” (Yili. 5:4) Ananiya ni Safira kazangile kwachichimieka kuli atu hi kupwa ko ni utayizo wa Zambi, ni yilembekese waze Yesu ahishile che alingile.—Mateu 6:1-3.
20. Nyonga lika twatamba kupwa nalio muze tunalingila Yehova?
20 Musono, tununu a tununu twa Yela ja Yehova kakukwasa mulimo wa kwambujola hashi heswe ha kuhana milambu ni kwimbulula chilweza cha Akwa-Kristu ashishika a ku sekulu yitangu. O keshi kushinjila mutu niumwe azachise mbongo jenyi ni tachi hanga akwase mulimo wacho. Yehova keshi kuzanga tumulingile ni uli, kakuzanga hanga tumulingile ni zango. (2 Kori. 9:7) Muze twakuhana chuma chimwe kuli Yehova, iye kakutala ha nyonga lize twamwehelacho, hi ha utohwe ko wa chuma chize twamwaha. (Marku 12:41-44) Kutwazangile kupwa ngwe Ananiya ni Safira, waze afupile uchichimieko wa atu ha kulingila Zambi. Alioze, tunazange kwimbulula chilweza cha Petulu, Yoano ni Mbarnabe, waze alingilile Yehova mumu lia kumuzanga ni kuzanga enyembo jo.—Mateu 22:37-40.
a Atu kapwile ni kulembela mu tembele ha mashimbu a chimene ni ufuku muze apwile ni kulambula yitapo. Chitapo cha ufuku kapwile ni kuchilambula ha “ola yamuchilivwa” hanji ngwetu, ha ola 15.
b Tala mishete yinambe ngwo, “ Petulu—Lunga Yoze Wapwile ni Kuta Yishi Haliapwila Hapwa Postolo” ni “ Yoano—Kambaji Yoze Yesu Azangile Chinji.”
c Tala mushete unambe ngwo, “ Sasendote wa Lutwe ni Asasendote a Lutwe.”
d Ha mwaka 33 M.J, chinasoloka ngwe mu Yerusaleme mwapwile A-Saduseu akehe ni unji wa A-Fwariseu 6,000, kashika kota o evwile woma wa malongeso a Yesu.