KAPITULU 2
“Kumunukapwa Yela Jami”
Chize Yesu aluliekele apostolo jenyi asongwele mulimo wa kwambujola
Lusango yono kanakatuka ha Yilinga 1:1-26
1-3. Yika yalingiwile muze Yesu ayile mu malilu, yika mutuhasa kulihula?
APOSTOLO kazangile hanga yuma yacho yihwe, mumu yaakomwesa chinji! Haliapwila o kanawahilila chinji mumu Yesu hamuhindwisa. Ha matangwa 40, Yesu kasoloka yisuho yinji kuli tumbaji twenyi hanga aehe usongwelo ni kwatakamisa. Alioze, musono lili tangwa lia kasula lize malinga chuma chacho.
2 Muze anamana ha Mulundu wa Olevwe, apostolo kanapanjika kanawa Yesu muze anahanjika. Muze Yesu mahwisa kuhanjika, mazundula moko ni kwawahisa, mba maputuka kuya mwilu. Tumbaji manunga ni kutala Yesu muze anayi mwilu. Chocho lelwa limwe mulimufuka. O kechi kumumona nawa, nihindu manunga ni kutala mwilu.—Luka 24:50; Yili. 1:9, 10.
3 Yuma yino yalingiwa, apostolo kechi keza kayivulama. Haliapwila yika malinga amu Mwene wo Yesu Kristu hahiluka mu malilu? Mutuhasa kupwa ni shindakenyo ngwetu, Yesu kaaluliekele hanga anunge ni mulimo uze iye aputukile. Kuchi iye aaluliekele hanga alinge mulimo wacho ulemu? Chikwo nawa, yika apostolo alingile? Longeso lika Akwa-Kristu musono mahasa kwandaho? Mu kapitulu mutangu wa mukanda wa Yilinga, muli makumbululo a yihula yino.
“Yaasolwela Yuma Yinji Yize Yaahele Shindakenyo” (Yilinga 1:1-5)
4. Kuchi Luka anaputuka lusango wenyi mu mukanda wa Yilinga?
4 Luka kanaputuka lusango wenyi ha kuhanjika hali Teofwilu, lunga yoze anakasonekena mukanda wenyi wa Evanjelu. a Ha versu jitangu, Luka kanahanjika hakehe hakutwala ku yuma yize asonekene mu Evanjelu ha kuzachisa maliji alisa ni kuyilumbununa mu yimako-yimako. Chocho masolola zwalala ngwenyi, mukanda wa Yilinga unanunga ni kuhanjika hakutwala ku yuma yize aliangile kuhanjika mu Evanjelu.
5, 6. (a) Yika te muyikwasa tumbaji twa Yesu kupwa ni ufulielo ukolo? (b) Mumu liaka mutuhasa kwamba ngwetu, ni musono ufulielo wa Akwa-Kristu unakatuka ha “yuma yize yili ni shindakenyo”?
5 Yika te muyikolesa chinji ufulielo wa tumbaji? Ha Yilinga 1:3 twakutanga chino: “Yesu yaasolwela yuma yinji yize yaahele shindakenyo.” Mu Mbimbiliya yeswe, Luka wika mwe unazachisa liji “yuma yize yaahele shindakenyo.” (Kolo. 4:14) Liji lino kakulizachisa mu mikanda ya uwukiso lize linalumbunuka ngwo: “Yuma yize yakusoloka, yuma yamwenemwene ni yize atu mahasa kujikijila.” Yesu kasolwele shindakenyo ya mutapu au. Ha yisuho yinji, iye kasolokele kuli tumbaji twenyi, ha shimbu limwe yasoloka kuli umwe hanji aali a kuli ayo, ha shimbu likwo kuli apostolo eswe. Ha chisuho chikwo nawa, iye yasoloka kuli tumbaji kuhiana 500. (1 Kori. 15:3-6) Ayi yili yuma yize yahanyine shindakenyo kuli atu ngwo, Yesu kamuhindwishile!
6 Ni musono nawa, ufulielo wa Akwa-Kristu unakatuka ha “yuma yize yili ni shindakenyo.” Shina kuli yimwe yize yinasolola ngwo Yesu kapwile hano hashi, kafwile ha mukunda wa shili yetu ni kumuhindwisa cheka? Ewa! Sango jize asonekene yela amwenemwene twakuwana mu liji lia Zambi, jakutwaha shindakenyo yize tunafupiwa. Kulilongesa sango jacho ni kulemba, muchihasa kukolesa ufulielo wetu. Twiwulukenu ngwetu, mba tupwe ni ufulielo ukolo, tunafupiwa kupwa ni shindakenyo ya yize twafuliela. Ufulielo ukolo, muuhasa kutukwasa hanga tuzuke mwono wa mutolo.—Yoa. 3:16.
7. Chilweza chika Yesu ahichikilile tumbaji twenyi hakutwala ku kwambujola ni kulongesa?
7 Yesu ‘kalwezele tumbaji hakutwala ku Wanangana wa Zambi.’ Chakutalilaho, iye kaalwezele hakutwala ku uprofeto uze te wakusolola ngwo Mesaya katamba kumona lamba ni kufwa. (Luka 24:13-32, 46, 47) Ha kwasolwela chino, Yesu yaaha shindakenyo hakutwala ku Wanangana wa Zambi, mumu iye kapwile Mwanangana mu Wanangana wacho. Muze apwile ni kwambujola, Yesu kapwile ni kuhanjika chinji hakutwala ku Wanangana wa Zambi, ni tumbaji twenyi musono che akulinga.—Mateu 24:14; Luka 4:43.
“Ndo ku Masongo a Hashi” (Yilinga 1:6-12)
8, 9. (a) Manyonga aka apostolo ja Yesu apwile no? (b) Kuchi Yesu aakwashile kwalumuna manyonga jo? (c) Yika chino muchihasa kulongesa Akwa-Kristu musono?
8 Apostolo kalikungulwile ni Yesu chisuho cha kasula ha Mulundu wa Olevwe. O yaahula Yesu ngwo: “Mwene, shina haliapwila muhilwisa wanangana kuli a Izalele?” (Yili. 1:6) Chihula chino chasolwele ngwo, ayo kapwile ni manyonga waze kalitele. Chitangu, kapwile ni kunyonga ngwo, Wanangana wa Zambi te maufunyisa mu Izalele ha matangwa jo. Chamuchiali, kapwile ni kushimbwila ngwo, Wanangana wa Zambi muuputuka kuyula mashimbu aze ene. Kuchi Yesu aakwashile kwalumuna manyonga jacho?
9 Yesu kota te kananyingika ngwenyi, kwasala hakehe akwase tumbaji twenyi kwalumuna nyonga lio litangu. Mumu o te mamona kusemuka cha munyachi waha, Izalele ya ku spiritu muze te mukupalika matangwa kumi! Te kwasala hakehe munyachi wa A-Izalele wa ku musunya muwecha kumanyinako Zambi. Hakutwala ku nyonga lio liamuchiali, Yesu yaewulula ni zango ngwenyi: “Kunwatambile kunyingika tungonde ni miaka, yize Tata asele mu chiyulo chenyi.” (Yili. 1:7) Yehova wika mwe uli ni ulite wakutesa mashimbu waze upale wenyi muulingiwa. Shimbu te kanda achifwa, Yesu kahanjikile ngwenyi, hakutwala ku “tangwa lize ni ola yize” songo muliza chipwe mwe Mwana kanyingikine, alioze “Tata wika.” (Mateu 24:36) Ni musono nawa, muze Akwa-Kristu akulihulumba chinji hakutwala ku mashimbu waze Zambi makaneha songo, kwamba umwenemwene, o kakulihulumba ni chuma chize kuchaatalile.
10. Nyonga lika lia apostolo lize twatamba kwimbulula, mumu liaka?
10 Chipwe chocho, twatamba kukanyama hanga tuhone kupwa ni manyonga api hakutwala kuli apostolo ja Yesu, malunga waze apwile ni ufulielo ukolo. O yalikehesa ni kutayiza ukwaso wa Yesu. Chikwo nawa, chipwe ngwe yihula yo yatalikishile mweka, nihindu yasolwele nyonga lialita lize apwile nalio. Yesu katowezele tumbaji twenyi yisuho yinji ngwenyi: “Nungenu ni kulaula.” (Mateu 24:42; 25:13; 26:41) O kapwile ni kulaula ku ufulielo ni kulihulikila ha yuma yize te yinasolola ngwo, kwasala hakehe Yehova alulieke yuma. Ni yetu musono che twatamba kulinga, mumu hitwakundama chinji ku songo lia “matangwa a kusula.”—2 Timo. 3:1-5.
11, 12. (a) Mulimo uka Yesu ahanyine kuli tumbaji twenyi? (b) Mumu liaka Yesu atongwele spiritu yisandu muze ahanjikile hakutwala ku mulimo wa kwambujola?
11 Yesu katowezele apostolo jenyi hakutwala ku chuma chize te atamba kulipikala nacho. Iye kaalwezele ngwenyi: “Muze spiritu yisandu muyikeza hali yenu, munukatambula ndundo mba kumunukapwa yela jami mu Yerusaleme, ni mu Yundeya mweswe, ni mu Samaria, ndo ku masongo a hashi.” (Yili. 1:8) Uhindukilo wa Yesu te kumawambujola chitangu mu Yerusaleme muze mwapwile atu waze amukunjikile ni kumushiha. Mba sango jacho te kumajambujola nawa mu Yundeya, Samaria ni ku yihela yikwo.
12 Muze ahanjikile cheka hakutwala ku chilakenyo cha kutuma spiritu yisandu yikwase tumbaji twenyi, henaho Yesu ahanjikile hakutwala ku mulimo wa kwambujola. Chino chili chisuho chimwe cha yisuho 40 chize twakuwana liji “spiritu yisandu” mu mukanda wa Yilinga. Ha yisuho yinji, mukanda uno wakusolola ngwo, kutuchi kuhasa kulinga upale wa Zambi nyi ngwe kutwapwile ni ukwaso wa spiritu yisandu. Kashika chili chilemu kulemba mashimbu eswe hanga twite spiritu yacho! (Luka 11:13) Musono, tunafupiwa chinji spiritu yisandu kuhiana ku mashimbu akunyima.
13. (a) Kwambujola ndo ku masongo a hashi kulihi chinaheta musono? (b) Mumu liaka twatamba kutayiza mulimo wacho ni mbunge yetu yeswe?
13 Chize ha mashimbu ja apostolo, ulumbunwiso wa maliji “ndo ku masongo a hashi” walumuka chinji. Chipwe chocho, ngwe chize twamona ha kapitulu wapalika, Yela ja Yehova hanatayiza ni mbunge yo yeswe kulinga mulimo wa kwambujola sango jipema mumu kananyingika ngwo, Zambi kanazange hanga atu eswe ajipanjike. (1 Timo. 2:3, 4) Shina ni yena unalingi mulimo wacho wakulamwina atu? Kukushi mulimo ukwo uze wakuneha uwahililo unji ngwe uno. Yehova makwaha tachi jize mufupiwa hanga uulinge. Chikwo nawa, mukanda wa Yilinga muukukwasa kumona majila waze watamba kuzachisa ni yitanga yize watamba kupwa nayo hanga uulinge kanawa.
14, 15. (a) Yika angelo ambile hakutwala ku kuhiluka cha Kristu, chikwo nawa, maliji jacho yika analumbunuka? (Tala nawa maliji a mushi.) (b) Kuchi kuhiluka cha Kristu chalingiwile?
14 Ngwe chize hitwamona kulu ha kapitulu wapalika, Yesu kayile mu malilu, mba atu kamumwene nawa. Chipwe chocho, apostolo 11 yanunga ni kumana hazehene ni kutala mwilu. Chocho yikusoloka angelo aali waze alwezele apostolo ngwo: “Yenu malunga a ku Ngalileya, mumu liaka nunamana hano ni kuhulikila meso jenu mwilu? Yono Yesu achiza mukachi kenu ni kuzezuka mwilu, makeza chizechene ngwe nwamumona anayi mwilu.” (Yili. 1:11) Shina angelo kanyongene ngwo, Yesu te mahiluka ni mujimba uzewene apwile nawo hano hashi ngwe chize mangana a yingeleja apwile ni kulongesa? Ka, hi chocho ko. Kuchi tunachinyingika?
15 Angelo kambile ngwo, Yesu te mahiluka chizechene, hi mu mulali uzewene ko. b Mba kuchi Yesu azezukile malilu? Muze angelo ahanjikile Yesu te hanayi kulu mu malilu. Apostolo e wika ahashile kumona ngwo, ha shimbu liacho te haya mu malilu, chikwo nawa, te kumahiluka chizechene. Chino chalingiwile lume. Musono, atu waze akwete ufulielo e akuhasa kumona ngwo Yesu kwali, kanayulu mu Wanangana wa Zambi. (Luka 17:20) Twatamba kunyingika yilayi yize yakusolola ngwo, ha shimbu lino Yesu kanayulu ni kwambujola yilayi yacho kuli atu akwo hanga amone ngwo, songo linakundama.
“Tulweze Kama . . . Yoze Wasakula” (Yilinga 1:13-26)
16-18. (a) Muze twakutanga Yilinga 1:13, 14, yika twakulilongesa hakutwala ku kukunguluka cha Akwa-Kristu? (b) Yika twalilongesa ha chilweza cha Maria naye ya Yesu? (c) Mumu liaka kupwa ha kukunguluka cha Akwa-Kristu chakutuyukisa musono?
16 Chipwe ngwe kwalingiwile yuma yeswe ayi, nihindu kutushi kukomoka muze twakutanga ngwetu, apostolo ‘kahilukile mu Yerusaleme ni uwahililo unji.’ (Luka 24:52) Shina te maakaula usongwelo ni yiyulo ya Kristu? Ha Yilinga kapitulu 1 versu 13 ni 14 twakutangaho ngwo, apostolo kalikungulwile ku chipatulo cha kwilu. Ha lusango yono, twakuwanaho malongeso alemu hakutwala ku kulikungulula cha Akwa-Kristu a ku sekulu yitangu. Ha mashimbu jacho, mazuwo anji mu Palestina kapwile ni kwatunga ni yipatulo ya kwilu. Shina chipatulo chize anatongola ha Yilinga 12:12, chenacho chapwile mu zuwo lia naye ya Marku? Chipwe ngwe chapwile hanji ka, nihindu tuli ni shindakenyo ngwetu, chipatulo chacho chapwile chipema kashika tumbaji twa Yesu ahashile kulikungulwilamo. Mba iya wapwile ha kukunguluka chacho, yika yalingiwileho?
17 Twiwulukenu ngwetu, ha kukunguluka chacho kuhakapwile wika apostolo, hanji malunga wika, alioze hapwile nawa “mapwo,” ngwe Maria naye ya Yesu. Chino chili chisuho cha kasula mu Mbimbiliya chize anatongola ndusu jina lia Maria. Maria kapwile ha kukunguluka chacho hanga awayile Zambi hamuwika ni mandumbu jenyi a ku ufulielo, hi mumu lia kufupa ko kumunangamisa. Maria kota kawahililile chinji ha kumona anenyi akwo awana waze te keshi kufuliela muli Kristu, kanakunguluka hamuwika nenyi. (Mateu 13:55; Yoa. 7:5) Ana-kwo a Yesu kalumwine yitanga yo muze Yesu amushihile ni kumuhindwisa.—1 Kori. 15:7.
18 Talenu mumu liaka tumbaji wano alikungulwile: “Wano eswe anungine ni kulemba ni mbunge yimuwika.” (Yili. 1:14) Chize ku mashimbu akunyima, kukunguluka chapwa chuma chilemu chinji mu uwayilo wa Akwa-Kristu. Twakulikungulula hanga tulitakamise umwe ni mukwo, kutambula usongwelo ni yiyulo, chahiana ulemu, twakukunguluka hanga tuwayile Tata yetu wa mu malilu, Yehova hamwe ni mandumbu jetu. Kulemba ni miaso yize twakwimbila Yehova yakumuvwisa chinji kuwaha, chikwo nawa, chakutuyukisa yetwene. Kashika, kanda tulitwamina kulikungulula hamuwika!—Hepre. 10:24, 25.
19-21. (a) Yika twalilongesa ha kumona chize Petulu alihanyine mu chikungulwila? (b) Mumu liaka Yundase amusalakanyine? (c) Yika twalilongesa ha chize kapinda wacho amuhwishile?
19 Ha shimbu liacho tumbaji twa Kristu te kanafupu kuhwisa umwe kapinda, chocho postolo Petulu yaakwasa kuhwisa kapinda wacho. (Versu 15-26) Petulu kalitunyine Mwene wenyi ha yisuho yitatu. Shina kutushi kutakama ha kumona tachi jize asele apwe cheka ni ufulielo ukolo? (Marku 14:72) Tulieswe tuli yivulumunyi, kashika twakufupiwa sango ngwe jino hanga jitwiwulule ngwetu: “Yehova kapwa mupema,” chikwo nawa kanazange kukonekena eswe waze akulikonyeka ni mbunge yeswe.—Samu 86:5.
20 Petulu kanyingikine ngwenyi, Yundase yoze wakunjikile Yesu, katamba kumusalakana. Iya te watamba kumusalakana? Petulu kambile ngwenyi, postolo yoze te watamba kusalakana Yundase, katamba kupwa yoze wendele hamuwika ni Yesu, yoze wamwene uhindukilo wenyi. (Yili. 1:21, 22) Chino chinalite ni chilakenyo chize mwene alakenyene ngwenyi: “Yenu waze nwangukaula, munukatwama ha ngunja 12 ni kusopesa minyachi 12 ya Izalele.” (Mateu 19:28) Chinasoloka ngwe Yehova kazangile hanga apostolo 12 waze endele hamuwika ni Yesu, atunge “kumi ni fundamentu jiali” ya Yerusaleme yaha. (Uso. 21:2, 14) Chocho Zambi yakwasa Petulu anyingike uprofeto unatale hali Yundase wakwamba ngwo: “Mukwo akatambule chitwamo chenyi.”—Samu 109:8.
21 Kusakula chacho kuchi achilingile? Kachilingile ha kuta chela, chuma chize apwile ni kulinga chinji ku mashimbu akunyima. (Yishi. 16:33) Chino chili chisuho cha kasula chize Mbimbiliya yakuhanjika hakutwala ku kuta chela mu mulali uno. Chinasoloka ngwe, chitanga chacho kachechele, muze apostolo atambwile spiritu yisandu. Tutalenu mumu liaka atele chela. Apostolo kalembele ngwo: “Yehova, Yena unanyingika mbunge ja atu eswe, tulweze kama hakachi ka malunga wano aali yoze wasakula.” (Yili. 1:23, 24) O kechele hanga kusakula chacho achilinge kuli Yehova. Mataya yoze kota wapwile umwe wa kuli 70 a tumbaji waze Yesu atumine hanga aye ni kwambujola, mwenawo asakwile. Chocho Mataya yapwa umwe wa kuli “Kumi ni Aali.” c—Yili. 6:2.
22, 23. Mumu liaka twatamba kwononokena waze akusongwela mu chikungulwila musono?
22 Lusango yono kanatwiwulula ngwetu: Yuma mu ululikiso wa Zambi yatamba kupwa ya kululieka kanawa. Ndo musono, malunga ajama kakwatongola hanga apwe tulayi mu yikungulwila. Makulwana kakuhengwola hanga amone yize Mbimbiliya yakwamba hakutwala kuli atu waze matongola hanga apwe tulayi. Chikwo nawa, kakwita spiritu yisandu mu yilemba. Twakulinga chihanda chetu hanga tukwase chikungulwila chilinunge, ha kwononoka ni kukaula usongwelo wa malunga wano.—Hepre. 13:17.
Twakwononokena atu waze atongwele hanga atusongwele
23 Tumbaji twa Yesu katakamine muze Yesu amuhindwishile ni muze alumwine yuma mu ululikiso wa Zambi. Chino chaaluliekele hakutwala ku yuma yize te muyiza kulutwe. Kapitulu mahataho malumbununa chikuma chino.
a Mu Evanjelu yenyi, Luka kanatongola Teofwilu ngwe “mutu mulemu.” Chino chatwalile amwe hanga anyonge ngwo, Teofwilu kota kapwile umwe lunga mulemu yoze te kanda achipwa Mukwa-Kristu. (Luka 1:3) Kashika, mu mukanda wa Yilinga, Luka kanamutongola ha kuzachisa maliji wano, “Yena Teofwilu.” Amwe akwa-kuhengwola kakwamba ngwo, Teofwilu kapwile Mukwa-Kristu muze atangile Evanjelu ya Luka, kashika Luka kakamuvulukile nawa ngwo “mutu mulemu” alioze yamuvuluka ngwo ndumbu wa ku ufulielo.
b Mbimbiliya yinazachisa liji lia Ngregu troʹpos, lize linalumbunuka “chizechene,” alioze kuliazachishile liji mor·pheʹ lize linalumbunuka “mulali uzewene.”
c Paulu kamutongwele ngwe “apostolo wa akwa-mavungu,” alioze keshi kumwalula ngwe umwe wa kuli apostolo 12. (Roma 11:13; 1 Kori. 15:4-8) Iye kakendele ni Yesu. Kashika, te kuchalitele kumwaha chawana chino chalipwila.