KAPITULU 5
“Twatamba Kwononokena Zambi ngwe Nguvulu Wetu”
Apostolo mahana chilweza chipema kuli Akwa-Kristu eswe amwenemwene
Lusango yono kanakatuka ha Yilinga 5:12–6:7
1-3. (a) Mumu liaka apostolo aatwalile mu chota cha usopelo? (b) Mumu liaka tunazange kunyingika kumbululo lize apostolo ahanyine?
NGAJI a mu chota cha akwa-kuyula A-Yunda uli anevu! Apostolo ja Yesu kanaasopesa mu chota chacho. Mumu liaka? Yosefwe Kayafwa sasendote wa lutwe ni kasongo wa chota cha akwa-kuyula A-Yunda, malweza apostolo ni uli ngwenyi: “Tunakanukanjisa ngwetu kanda nulongesa nawa mu jina lino.” Kasongo yono chipwe jina lia Yesu kazangile kulivuluka, mba manunga nawa ngwenyi, “Alioze yenu hinwazalisa Yerusaleme ni malongeso jenu mumu nunazange kutukokela uhiso wa manyinga ja mutu yono.” (Yili. 5:28) Lusango te kali zwalala, apostolo te katamba kulitwamina kwambujola, nyi ka te maamwesa lamba!
2 Yika apostolo malinga? Yesu mwe wahanyine mulimo wa kwambujola kuli apostolo kulita ni chiyulo chize amuhele kuli Zambi. (Mateu 28:18-20) Shina apostolo te malitwamina kwambujola hamukunda wa kuvwila woma atu? Nyi hanji maasolola hamu ha kununga ni kwambujola? Chuma tunazange kunyingika chili chino: Aya apostolo mononokena, shina Zambi nyi atu? Kawashi-washi, Petulu makumbulwila apostolo eswe. Kumbululo lize mahana mulisolola hamu.
3 Amu tuli Akwa-Kristu amwenemwene, tunazange chinji kunyingika yize apostolo alingile muze apwile mu chota cha akwa-kuyula A-Yunda, mumu mulimo wa kwambujola unatale ni hali yetu musono. Ni yetu mahasa kutuhungumiona mumu lia kulinga mulimo uze Zambi atuhele. (Mateu 10:22) Akwa-kole mahasa kukanjisa mulimo wetu wa kwambujola. Yika mutulinga? Nyi tunazange kuwana ukwaso, muchilita tuhengwole yuma yize apostolo alingile, ni yuma yize yalingiwile mba aatwale mu chota cha akwa-kuyula A-Yunda. a
“Mungelo wa Yehova Yazulula Mapito” (Yilinga 5:12-21)
4, 5. Mumu liaka Kayafwa ni A-Saduseu evwile “ukwa unji”?
4 Twiwulukenu ngwetu ha chisuho chitangu, muze Petulu ni Yoano aakanjishile kwambujola, o kakumbulwile ngwo: “Yetu kutwahashile kulitwamina kwambujola yuma yize twamwene ni yize twevwile.” (Yili. 4:20) Petulu ni Yoano kanungine ni kwambujola mu tembele chipwe ngwe kaapinjishile mu chota cha akwa-kuyula A-Yunda. Apostolo kalingile yikomokeso yinji ngwe, kuwuka mieji ni kutuhwisa andemoniu. O kalingile yuma yacho mu senge lia Solomone chihela chize chapwile ku chivumbuko ya tembele, kuze A-Yunda anji apwile ni kulikungulwila. Chinasoloka ngwe chipwe chizulie cha Petulu chapwile ni kuwuka atu. Anji a kuli atu waze awukile, katayijile sango jipema, kashika ‘atu anji, malunga ni mapwo waze afulielele muli Mwene yalichinga no.’—Yili. 5:12-15.
5 Kayafwa ni A-Saduseu, atu waze apwile mu ulembelo umuwika, yevwa “ukwa unji” chocho yatuma kusa apostolo mu zuwo lia ususu. (Yili. 5:17, 18) Mumu liaka A-Saduseu evwile uli? Apostolo kapwile ni kulongesa ngwo Yesu kamuhindwishile. Alioze A-Saduseu te keshi kufuliela ha longeso lia uhindukilo. Apostolo kapwile ni kwamba ngwo mutu katamba kufuliela muli Yesu mba amulamwine. A-Saduseu kapwile ni kuvwila A-Roma woma ngwo, te maatambula chifuchi nyi mbunga mamona Yesu ngwe Mwata wo. (Yoa. 11:48) Kashika A-Saduseu azangile chinji kuholesa apostolo!
6. Aya waze akushinjila manguvulu hanga atuhungumione, mumu liaka kutwatambile kukomoka?
6 Ni musono nawa, atu ja Yehova kakwahungumiona mumu lia yize mangana a mayingeleja akwamba ni kulinga. Mangana wano kakwete ndundo jize akuzachisa hanga ashinjile manguvulu akanjise mulimo wetu wa kwambujola. Shina twatamba kukomoka muze yuma yacho yinalingiwa? Ka. Mumu sango jetu jakusolola mahuza waze mangana a mayingeleja akulongesa. Atu anji a mbunge jipema muze akutayiza umwenemwene wa mu Mbimbiliya, kakutuhuka mu mayingeleja a mahuza. (Yoa. 8:32) Kashika mangana a mayingeleja akutuvwila kole ni kutuhungumiona.
7, 8. Kuchi apostolo alivwile muze atambwile usongwelo wa mungelo, yika twatamba kulihula?
7 Apostolo muze apwile ni kushimbwila usopeso mu zuwo lia ususu, kota kapwile ni kulihula nyi maashiha kuli akwa-kole jo. (Mateu 24:9) Alioze ufuku yikulingiwa chuma chize chakomwesene chinji, “mungelo wa Yehova yazulula mapito ja zuwo lia ususu.” b (Yili. 5:19) Mungelo yaalweza ngwenyi: “Yeenu mu tembele nununge ni kwambulwila atu.” (Yili. 5:20) Usongwelo uno wahanyine shindakenyo kuli apostolo ngwo, yuma yize te analingi yinalita ni upale wa Zambi. Kota maliji jacho katakamishine apostolo anunge ni kunyongonona, chipwe ngwe te mukulingiwa chuma cheswacho. Ni ufulielo ukolo hamwe ni hamu apostolo “yaanjila mu tembele ha chimenemene yaputuka kulongesa.”—Yili. 5:21.
8 Kashika, muchilita hita umwe wa kuli yetu kulihula ngwenyi: ‘Nyi napwanga mu chihela cha apostolo, shina te munguhasa kununga ni kusolola ufulielo ni hamu ha kununga ni kwambujola?’ Twakuwahilila chinji ha kunyingika ngwetu, angelo kakutukwasa mu mulimo wa kwambujola.—Yili. 28:23; Uso. 14:6, 7.
“Twatamba Kwononokena Zambi Ngwe Nguvulu Wetu hi Atu Ko” (Yilinga 5:21-33)
“Muze te haneha yaamanyisa kumeso ja Akwa-Kuyula.” —Yilinga 5:27
9-11. Yika apostolo ambile muze aakanjishile kwambujola, kuchi chilweza cho chinakwasa Akwa-Kristu eswe amwenemwene musono?
9 Kayafwa ni ngaji akwo a mu chota cha akwa-kuyula A-Yunda te halilulieka, hanga apatwile apostolo. Chakuhona kunyingika yize yalingiwile mu zuwo lia ususu, akwa-kuyula yatuma tufunga asake Yoano ni Petulu. Tulayi a zuwo lia ususu kota kakomokene chinji muze awanyine zuwo lia ususu lili liahululu, chipwe ngwe “mapito kapwile akuyika kanawa.” (Yili. 5:23) Hazehene kapitau wa tembele yanyigika ngwenyi, apostolo te kanambujola cheka hakutwala kuli Yesu mu tembele, chikuma chizechene chaatwalile mu zuwo lia ususu. Kawashi-washi kapitau ni yilolo yaya ku tembele hanga akwate Petulu ni Yoano aatwale ku chota cha akwa-kuyula A-Yunda.
10 Ngwe chizechene hitwamona kulu ku uputukilo wa kapitulu yono, mangana a mayingeleja kazangile kukanjisa apostolo kwambujola sango jipema. Yika apostolo alingile? Petulu yakumbulwila apostolo eswe ni hamu ngwenyi: “Twatamba kwononokena Zambi ngwe nguvulu wetu hi atu ko.” (Yili. 5:29) Ha kulinga chino apostolo yahichikila Akwa-Kristu eswe chilweza chipema. Kutushi kwononokena manguvulu muze akutukanjisa kulinga yuma yize Zambi akuzanga. Mba yika mutulinga nyi akwa-kuyula makanjisa mulimo wetu wa kwambujola? Kutwatambile kulitwamina kumanununa mulimo uze Zambi atuhele. (Roma 13:1) Nyi twachilinga, mutuwana majila akwambulwilamo sango ja Wanangana.
11 Ngaji kevwile uli unji hamukunda wa kumbululo lize apostolo ahanyine ni hamu, kashika o azangile kwaashiha. (Yili. 5:33) Chasolokele ngwe te kwasala hakehe hanga ashihe yela jacho a hamu. Alioze o te matambula ukwaso kuli mutu yoze kashimbwilile!
“Kunuchi Kuhasa Kuyikwika” (Yilinga 5:34-42)
12, 13. (a) Chiyulo chika Ngamaliele ahanyine kuli akwa-milimo-ni-akwo, yika ayo alingile? (b) Kuchi Yehova mahasa kukwasa tuvumbi twenyi musono, shindakenyo yika mutuhasa kupwa nayo nyi mecha tumone lamba mumu lia ululi?
12 Ngamaliele, “longeshi ya shimbi yoze apwile ni kuvumbika chinji kuli atu” yakalila apostolo. c Lunga yono kota kapwile ni kumuvumbika chinji kuli akwa milimo-ni-akwo, kashika etele hanga atuhwise apostolo haze ha shimbu likepe. (Yili. 5:34) Ngamaliele kahanjikile hakutwala ku kulimika chize chalingiwile ku mashimbu akunyima hali A-Roma. Kulimika chacho chahwile muze waze achiputukile afwile. Kashika Ngamaliele yeta kuli ngaji asolole umbovu kuli apostolo hanga ahone kwasa mu zuwo lia ususu, mumu Mwata wo Yesu te hafwa. Ngamaliele yaalweza ngwenyi: “Kanda nupinjisa wano atu, echenu. Mumu nyi yuma yino yili ya atu kuyichi kanunga. Alioze nyi kuli Zambi yinakatuka, kunuchi kuhasa kuyikwika. Mumu nyi ka muchipwa ngwe nunalimiki ni Zambi.” (Yili. 5:38, 39) Ngaji yakaula chiyulo cha Ngamaliele, chipwe chocho, yatuma kulamba apostolo ni “kwakanjisa kuhanjika mu jina lia Yesu.”—Yili. 5:40.
13 Ni musono nawa Yehova mahasa kuzachisa malunga a ndundo akalile tuvumbi twenyi ngwe chize alingile ku mashimbu akunyima. (Yishi. 21:1) Yehova mahasa kuzachisa spiritu yenyi yisandu hanga manguvulu, ngaji ni akwa-shimbi amanunune upale wenyi. (Nehe. 2:4-8) Alioze nyi mecha hanga tumone lamba mumu lia ululi, mutuhasa kupwa ni shindakenyo ha yikuma yino yaali. (1 Petu. 3:14) Chitangu, Zambi mahasa kutwaha tachi hanga tunyongonone. (1 Kori. 10:13) Chamuchiali, akwa-kole jetu kechi kuhasa kunongesa yize Zambi atangile.—Iza. 54:17.
14, 15. (a) Kuchi apostolo alivwile muze aalambile, mumu liaka? (b) Tongola chilweza chinasolola chize atu ja Yehova akunyongonona ni uwahililo.
14 Shina yuma yeswe yize apostolo apalikile yakeketesele hamu lio? Ka! Mbimbiliya yinambe ngwo: “O yakatuka kumeso ja Akwa-Kuyula ni uwahililo.” (Yili. 5:41) Mumu liaka te anawahilila? O te kanawahilila mumu lia kushishika kuli Yehova ni kukaula ngano ja Yesu, hi mumu lia kwamwesa lamba ko.—Mateu 5:11, 12.
15 Chizechene ngwe mandumbu jetu a ku sekulu yitangu, ni yetu twakunyongonona ni uwahililo muze twakumona lamba mumu lia sango jipema. (1 Petu. 4:12-14) Kutushi kuwahilila muze akutukekuna, kutuhungumiona hanji kutusa mu mazuwo a ususu. Alioze kushishika kuli Yehova chakutwaha uwahililo unji. Tutalenu chilweza cha ndumbu Henryk Dornik, yoze amwesene lamba ha miaka yinji kuli manguvulu. Mwene kanewuluka ngwenyi, ha Agosto ya 1944, maswalale yaamutuma hamuwika ni ndumbwenyi muchihela cha kufungila funge. Akwa-kole yamba ngwo: “Chili chikalu kwalumuna manyonga jo, o kakuzanga kufwa mumu lia ufulielo wo.” Ndumbu Dornik yamba ngwenyi: “Te chazangile kufwa mumu lia ufulielo wami, alioze kumona lamba hamukunda wa kushishika chami kuli Yehova, chapwile ni kungwaha uwahililo unji.—Tia. 1:2-4.
Chizechene ngwe apostolo, ni yetu twakwambujola ku “zuwo ni zuwo”
16. Kuchi apostolo asolwele ngwo kazangile chinji kununga ni kwambujola sango jipema, mba kuchi musono twakwimbulula chilweza cho chipema?
16 Kawashi-washi apostolo yaputuka kwambujola cheka sango jipema. Chakuhona kwivwa woma o yaputuka kwambujola mu “tembele ni ku zuwo ni zuwo sango jipema hakutwala kuli Kristu Yesu.” d (Yili. 5:42) Akwa-kwambujola wano a hamu kazangile chinji kwambujola sango jipema, o te kakujambujola ku zuwo ni zuwo ngwe chize Yesu aatumine. (Mateu 10:7, 11-14) Chino che chaakwashile kuzalisa Yerusaleme ni malongeso a Yesu. Ni musono nawa Yela ja Yehova kakwanyingika ngwe atu waze akukaula chilweza cha kwambujola cha apostolo. Twakusolola ngwetu tunazange kununga ni kwambujola sango jipema ni kukwasa atu hanga ajipanjike, muze twakwambujola ku zuwo ni zuwo mu njiza yetu. Shina Yehova kakuwahisa mulimo wa kwambujola ku zuwo ni zuwo? Ewa! Tununu a tununu twa atu kanatayiza sango jipema ha matangwa wano a kusula. Anji a kuli ayo kevwile sango jipema ha chisuho chitangu muze umwe Chela cha Yehova angongwele ku zuwo lio.
‘Sakulenu Malunga a Lufuma Mupema Hanga Tweehe Mulimo Uno’ (Yilinga 6:1-6)
17-19. Kapinda muka wasolokele mu chikungulwila, yika apostolo alingile hanga ahwise kapinda wacho?
17 Mandumbu amu chikungulwila chaha te kanapalika mu kapinda. Kapinda muka mwenawo? Tumbaji anji waze apapachishile, waze akatukile kusuku, kazangile kulilongesa yuma yinji shimbu te kanda achihiluka ku mazuwo jo. Ayo te mafupiwa kulia ni yuma yikwo ya kulikwasa nayo. Kashika, tumbaji yahana mbongo hanga akwase ha yeswe yize te mafupiwa. (Yili. 2:44-46; 4:34-37) Alioze, yikusoloka umwe kapinda mukalu. Mapwo tuliwa waze apwile ni kuhanjika Ngregu te “keshi kwaaha kulia chize akwo apwile ni kutambula tangwa ha tangawa.” (Yili. 6:1) Alioze, chino chakapwile ni kulingiwa kuli mapwo waze apwile ni kuhanjika Hepreu. Chinasoloka ngwe mukachi ko mwapwile katonde. Katonde kali kapinda munene yoze mahasa kuhandununa mandumbu mu chikungulwila.
18 Apostolo waze apwile ngwe ndungo wakanyama mu chikungulwila chaha yaanyingika ngwo, “kuchalitele kusa Liji lia Zambi kutenga hanga atetele atu kulia.” (Yili. 6:2) Chocho ayo yasakula malunga shimbiali a lufuma mupema waze anazala too ni spiritu ni mana hanga alinge mulimo wacho. (Yili. 6:3) Chafupiwile kuwana malunga ajama mumu mulimo wacho te kuwatalile wika ha kutetela kulia. Alioze o te mazachisa mbongo, kulanda ni kusoneka yuma yeswe yize te malinga. Malunga jacho kapwile ni majina a Ngregu, chino kota chakwashile tuliwa waze te anapinda hanga ajikijile hali ayo. Muze te halemba ni kuhengwola yisoneko, apostolo yasakula malunga shimbiali hanga ‘atetele mandumbu kulia.’ e
19 Shina chino chinalumbunuka ngwo malunga shimbiali waze atongwele hanga atetele mandumbu kulia, te katambile nawa kwambujola sango jipema? Ka hi chocho ko! Umwe wa kuli malunga jacho atongwele, kali Eshetevau, chela wa hamu. (Yili. 6:8-10) Fwilipe neye kali umwe wa kuli malunga shimbiali yoze akuvuluka ngwo “mukwa kwambujola.” (Yili. 21:8) Kashika chinasoloka zwalala ngwo, malunga shimbiali waze atongwele, kanungine ni kwambujola sango ja Wanangana.
20. Kuchi Yela ja Yehova musono akukaula chilweza cha apostolo?
20 Ni musono nawa, Yela ja Yehova kakukaula chilweza cha apostolo. Malunga waze akutongola hanga alinge milimo mu yikungulwila, katamba kusolola ngwo kali ni mana a kwilu, ni kusolola ngwo spiritu yisandu yinaasongwela. Kupalikila muli ndungo wamwenemwene wakanyama, malunga ajama kakwatongola ngwe makulwana ni tuvumbi mu yikungulwila. f (1 Timo. 3:1-9, 12, 13) Kashika mutuhasa kwamba ngwetu, spiritu yisandu ye yakutongola malunga wano ajama. Mandumbu waze akutongola kakulinga milimo yinji mu chikungulwila. Chakutalilaho, makulwana kakuhana ukwaso kuli mandumbu waze hashinakajiwa ha yize mafupiwa. (Tia. 1:27) Makulwana akwo kakukalakala chinji mu mulimo wa kutunga mazuwo a Wanangana, kululieka kukunguluka cha mambonge, eka kakuya ni kumeneka mandotolo ku mashipitali hanga akwase mandumbu jetu ha chikuma cha manyinga. Tuvumbi no kakulinga milimo yinji mu chikungulwila yize kanji-kanji kuyatalile ha kufunga ni kulongesa mapanga. Chipwe ngwe makulwana ni tuvumbi kali ni milimo yinji yize mahasa kulinga mu chikungulwila ni mu ululikiso wa Yehova, nihindu katamba kununga ni kwambujola sango ja Wanangana.—1 Kori. 9:16.
“Liji lia Zambi Lianungine ni Kufumana” (Yilinga 6:7)
21, 22. Yika yasolwele ngwo, Yehova te kanawahisa chikungulwila chaha cha Akwa-Kristu?
21 Yehova kakwashile mandumbu mu chikungulwila anyongonone ni kuhwisa kapinda yoze te mahasa kwahandununa. Chasolokele zwalala ngwo, Yehova te kanawahisa mandumbu jacho. Twakutanga ngwetu: “Chocho liji lia Zambi lianungine ni kufumana, tumbaji yoka kuhiana mu Yerusaleme ni asasendote anji afulielele.” (Yili. 6:7) Au kali lusango umwe, wa sango jinji jize twakuwana mu mukanda wa Yilinga hakutwala ku kutatuka cha sango jipema. (Yili. 9:31; 12:24; 16:5; 19:20; 28:31) Ni musono nawa, kwivwa chize sango jipema jinalitande hashi heswe, chakututakamisa.
22 Ku sekulu yitangu M.J, mangana a mayingeleja kanungine ni kuhungumiona tumbaji twa Yesu. Kashika, chimwe kuhungumiona chinene yichiputuka. Eshetevau, kamuhungumionene ngwe chize mutumona ha kapitulu mahataho.
a Tala mushete unambe ngwo, “ Chota Chinene cha Akwa-Kuyula A-Yunda.”
b Achi chili chisuho chitangu cha yisuho 20 chize anatongola angelo mu mukanda wa Yilinga. Alioze ha Yilinga 1:10 angelo kanaasolola wika ngwe atu waze anazala mazalo atoma.
c Tala mushete unambe ngwo, “ Ngamaliele—Mutu Mulemu Hakachi ka Alongeshi.”
d Tala mushete unambe ngwo, “ Kwambujola ‘ku Zuwo ni Zuwo.’”
e Malunga jacho kota kapwile ni yitanga yipema yize yakufupiwa mba mutu amutongole ngwe mukulwana mu chikukugulwila. Mumu mulimo wa kutetela kulia, wapwile ulemu chinji. Yisoneko kuyishi kusolola zwalala ha shimbu lika malunga aputukile kwatongola ngwe makulwana ni tulayi mu chikungulwila cha Akwa-Kristu.
f Ku sekulu yitangu, makulwana a mu chikungulwila e apwile ni kutongola malunga ajama. (Yili. 14:23; 1 Timo. 5:22; Titu 1:5) Musono, mandumbu a mu Chizavu cha Tusongo e akutongola tulayi a mambonge, tulayi a mambonge e akutongola makulwana ni tuvumbi mu yikungulwila.
