Mwanangana mukwo wa Babilonia kapwile Dariu Ka-Media. Dariu kamwene ngwo Daniele kali mulemu. Chocho yasa Daniele kasongo mukachi ka atu jenyi alemu amu chifuchi. Malunga wano kapwile ni kwivwila Daniele chipululu nawa yazanga kumuchiza ha chihela chacho. Ayo kanyingikine ngwo, Daniele te kakulemba katatu hita tangwa, kashika alwezele Dariu ngwo: ‘Mwanangana, kwatamba kupwa yimwe shimbi yize muyamba ngwo, atu eswe katamba kulembela wika yena. Mweswawo mehuka shimbi yacho katamba kumumbila mu wina wa ndumba.’ Dariu yazanga nyonga liacho, hachino yasa jina lienyi ha mukanda wa shimbi.

Muze Daniele evwile shimbi yacho yaha, iye yaya ku zuwo lienyi. Ha umwe kapenda wa washi, yafulamana ni kulemba kuli Yehova. Malunga waze apwile ni kumuvwila chipululu yapupa zuwo lienyi, yamuwana kanalembe. Ayo yazomboka kuli Dariu ni kwamba ngwo: ‘Daniele keshi kukwononokena. Iye kakulemba kuli Zambi yenyi katatu, hita tangwa.’ Dariu kazangile chinji Daniele, kashika kakazangile hanga afwe. Ha tangwa lieswe, yanyonga chize malamwina Daniele. Alioze chipwe mwanangana te keshi kuhasa kwalumuna shimbi yize te hanaseho kulu jina lienyi. Hachino, te katamba kutuma wika malunga jacho hanga ambile Daniele mu wina wa ndumba.

 Ha ufuku wacho, Dariu yazakalala hamukunda wa Daniele, chocho, yahona kuya tulo. Ha chimene, iye yazombokela ku wina ni kusanyika Daniele ngwenyi: ‘Shina Zambi ye kakupulwila kama?’

Dariu yevwa limwe liji. Liji liacho te lia Daniele! Daniele yalweze Dariu ngwenyi: ‘Mungelo wa Yehova kayika makanwa ja ndumba. Kangulingile upi niumwe.’ Dariu yawahilila chinji! Yatuma kutuhwisa Daniele mu wina. Daniele kakamuwanyine ni chipandu nichimwe. Hachino, mwanangana yamba ngwenyi: ‘Mbilenu mu wina malunga waze asumine Daniele mulonga.’ Muze malunga jacho ahetele mu wina, hohene ndumba yaputuka kwaalia.

Dariu yatuma shimbi yino kuli atu jenyi ngwenyi: ‘Atu eswe katamba kwivwila woma Zambi wa Daniele. Mumu kalamwina Daniele kuli ndumba.’

Shina wakulemba kuli Yehova matangwa eswe, ngwe Daniele?