Estere kapwile pwo Ka-Yunda yoze wapwile mu Persia mbonge ya Shushane. Ha miaka yinji kunyima, asoko jenyi kaachijile mu Yerusaleme kuli Nabukanezore. Estere kamulelele kuli musonyenyi Mordekai, kavumbi wa Mwanangana Ahashueru wa ku Persia.

Mwanangana Ahashueru kafupile mwazovu mwaha. Chocho, tuvumbi twenyi yamunehena mapwo anji apema amu chifuchi, hamwe ni Estere. Hakachi ka mapwo jacho, mwanangana yasakulaho Estere hanga apwe mwazovu. Mordekai yalweza Estere hanga achine kulisolola ngwe Ka-Yunda.

Umwe lunga walizata yoze te avuluka ngwo Hamane kapwile mwata wa yilolo eswe. Iye kazangile hanga atu eswe apwe ni kufulamana kulutwe lienyi. Mordekai kalitunyine kuchilinga, chocho Hamane yevwa uli unji yafupa kumushiha. Muze Hamane anyingikine ngwenyi, Mordekai te Ka-Yunda, aye yakwata chiyulo hanga ashihe A-Yunda eswe mu chifuchi. Yalweza mwanangana ngwenyi: ‘A-Yunda kali yilianyi, kashika watamba kwaachiza mu chifuchi.’ Ahashueru yamba ngwenyi: ‘Linga yeswayo unafupu,’ chocho yamwaha chiyulo hanga ase yimwe shimbi. Hamane yasa shimbi yize alwezele atu hanga ashihe A-Yunda eswe ha tangwa lia 13 lia kakweji wa Adare. Yehova te kanamono yuma yeswayi.

Estere kakanyingikine shimbi yacho. Chocho, Mordekai yamutumina sango ja shimbi yacho ni kumulweza ngwenyi: ‘Yako ukahanjike ni mwanangana.’ Estere yamba ngwenyi: ‘Mweswawo maya kuli mwanangana chakuhona kumusanyika, mamushiha. Mwanangana keshi kungusanyika nawa hikwapalika matangwa 30! Alioze munguyako. Nyi mangwolwela lukanda wenyi, kechi kangushiha. Nyi kachilingile, kumakangushiha.’

Estere yaya mu chota cha mwanangana. Muze mwanangana amumwene, yamwolwela lukanda wenyi. Estere yaya ndo  kuli iye, nawa mwanangana yamuhula ngwenyi: ‘Estere, ha yika munguhasa kukukwasa?’ Iye yamba ngwenyi: ‘Ngunazange kunusanyika hamwe ni Hamane ha chimwe chiwanyino.’ Muze te ali ha chiwanyino, Estere yaalweza nawa hanga akeze ha chiwanyino chamuchiali. Ha chiwanyino chacho, mwanangana yamuhula nawa ngwenyi: ‘Ha yika munguhasa kukukwasa?’ Estere yamba ngwenyi: ‘Umwe unazange kungushiha hamwe ni atu jami. Lisesa, tulamwine kama.’ Mwanangana yamuhula ngwenyi: ‘Iya mwenawo unafupu kunushiha?’ Iye yamba ngwenyi: ‘Lunga au mupi, Hamane.’ Ahashueru yevwa uli unji, chocho yatuma kushiha Hamane.

Alioze te kukushi niumwe yoze machiza shimbi yize asele Hamane, chipwe mwanangana. Hachino, mwanangana yapwisa Mordekai mwata wa yilolo ni kumwaha ndundo yakusa shimbi yaha. Mordekai yatuhwisa shimbi yaha yize yakwashile A-Izalele hanga alikalile muze te maalukukila. Ha tangwa lia 13 lia kakweji Adare, A-Yunda yakumba akwa-kole jo. Kukatuka haze, ayo yaputuka kulinga chiwanyino cha kwiwuluka kukumba chacho hita mwaka.