Yehova kasakwile Jeremia hanga apwe profeta wa A-Yunda. Yamulweza hanga ambujole kuli atu ni kwaatoweza ngwo katamba kulitwamina kulinga yuma yipi. Alioze Jeremia yamba ngwenyi: ‘Yehova, ami nguchili kanuke. Kuchanyingikine kuhanjika kanawa ni atu.’ Yehova yamulweza ngwenyi: ‘Kanda wivwa woma. Mungukakulweza yize muhanjika. Nawa mungukakukwasa.’

Yehova yalweza Jeremia hanga akungulule makulwana, apalule mulondo wa uma kumeso jo ni kwaalweza ngwenyi: ‘Ni Yerusaleme che makayinongesa.’ Muze Jeremia alingile yize Yehova amulwezele, makulwana yevwa uli unji. Sasendote yoze te avuluka ngwo Pashure yalamba Jeremia ni kumusa mukuli. Ha ufuku weswe, Jeremia kakahashile kulisunga. Pashure yamutusula muze te hikwacha. Jeremia yamba ngwenyi: ‘Chisolo kuhasa nawa. Mungwecha kwambujola.’ Shina iye kechele lume? Ka. Muze Jeremia anyongene chinji hachino, yamba ngwenyi: ‘Sango ja Yehova yijapwa ngwe kahia mu kachi kami. Kungushi kuhasa kwecha kwambujola.’ Chocho, Jeremia yanunga ni kutoweza atu.

Miaka yiyipalika, nawa mu Yunda yimupwa mwanangana mwaha. Asasendote ni aprofeta a mahuza te keshi kuzanga sango ja Jeremia. Ayo yalweza yilolo ngwo: ‘Lunga yono kanatela kufwa.’ Jeremia yaamba ngwenyi: ‘Nyi munungushiha, munungushiha chamokomoko. Yize ngunahanjika yili ya Yehova, hi ya yami ko.’ Muze yilolo evwile chocho, ayo yamba ngwo: ‘Lunga yono katelele kufwa.’

 Jeremia yanunga ni kwambujola, hachino, yilolo yevwa uli unji. Ayo yalweza mwanangana hanga ashihe Jeremia. Mwanangana yamba ngwenyi, ayo te mahasa kulinga Jeremia yeswayo mazanga. Yakwata Jeremia yamusa mu wina usuku wa malowa, ni kunyonga ngwo mafwilemo. Jeremia yaputuka kushimbama mu malowa.

Hachino, Ebede-meleke yoze te wakalakala ku chota cha nguvulu yalweza mwanangana ngwenyi: ‘Yilolo kasa Jeremia mu wina wa malowa! Nyi kutwamuchijilemo kumafwa.’ Mwanangana yalweza Ebede-meleke hanga ande malunga 30, aye hamuwika ni kutuhwisa Jeremia mu wina. Shina kutwatambile kupwa ngwe Jeremia, yoze kakechele nichimwe hanga chimukinde kwambujola sango lipema?