Yoano, mwana wa Zekaria ni Izabele, yapwa profeta muze te hakola. Yehova yazachisa Yoano hanga alongese atu kwiza cha Mesaya. Alioze, shimbu alongesele mu masunangonga hanji mu mambonge, Yoano te kakulongesela mu puya. Atu te kakukatuka ku Yerusaleme ni mu Yundeya mweswe hanga aye ni kupanjika Yoano. Iye te kakwaalongesa ngwo, mba evwise Zambi kuwaha, katamba kwecha kulinga yuma yipi. Muze te akupanjika Yoano, anji akuli ayo te kakulikonyeka ku shili yo, nawa Yoano te kakwaapapachisa mu Lwiji Yordau.

Yoano te kakwete mwono washi. Mazalo jenyi te kapwa akulinga ni mona ja tumelu nawa te kakulia mapasu ni uchi. Atu te kakuzanga chinji kuliwana ni Yoano. Chipwe akwa-kulizata A-Fwariseu ni A-Saduseu te kakuya ni kumutala. Yoano yaamba ngwenyi: ‘Nwatamba kwalumuna yitanga yenu ni kulikonyeka. Kanda nunyonga ngwenu nuli alemu chinji mumu ngwo nuli ana ja Apalahama.’ Chino kuchalumbunukine ngwo nuli ana ja Zambi.’

Atu anji te kakuya kuli Yoano ni kumuhula ngwo: ‘Yika twatamba kulinga mba tuvwise Zambi kuwaha?’ Yoano te kakwaalweza ngwenyi: ‘Mweswawo uli ni yikuto yaali, ahane chimwe kuli yoze keshi nacho.’ Unanyingika mumu liaka te akwamba chocho? Iye kazangile hanga tumbaji twenyi anyingike ngwo, mba evwise Zambi kuwaha, ayo katamba kuzanga akwo.

Yoano kalwezele akwa-kufwetesa lijimu ngwenyi: ‘Kanda nufwetesa kuhiana chize hananwambe.’ Yalweza nawa maswalale ngwenyi: ‘Kanda nukatayiza chijiko hanji kuhanjika mahuza.’

 Asasendote ni A-Levi no kayile kuli Yoano ni kumuhula ngwo: ‘Yena uli iya? Atu eswe kanazange kukunyingika.’ Yoano yamba ngwenyi: ‘Yami nguli liji lia mu puya, lize linasongwela atu kuli Yehova ngwe chize ambile profeta Izaia.’

Atu te kakuzanga yize Yoano akulongesa. Anji te kakulihula nyi Yoano mwe Mesaya. Alioze iye te kakwaalweza ngwenyi: ‘Umwe wahiana yami kaneza. Kuchatele kuli yami kujitula sapato jenyi. Ami ngunanupapachisa mu meya, alioze iye makanupapachisa ni spritu yisandu.’