Ha miaka 400 hakuhwa cha kutungulula yipanga ya Yerusaleme, sasendote yoze te avuluka ngwo Zekaria ni mukwo-pwo, Izabele, te katwama hakamwihi ni mbonge. Ayo kalimbachile ha miaka yinji alioze kakapwile ni ana. Limwe tangwa muze Zekaria te anahane insensu muma musandu mu tembele, mungelo Gabriele yamusolokela. Zekaria yevwa woma, alioze Gabriele yamwamba ngwenyi: ‘Kanda wivwa woma. Ngunakunehena lusango mupema wa kuli Yehova. Mukwenu-pwo, Izabele, makasema mwana ni kumuluka jina ngwo, Yoano. Yehova kasakula Yoano ha kumwaha mulimo ulemu.’ Zekaria yahula ngwenyi: ‘Kuchi munguhasa kukutayiza? Ami ni mukwetu-pwo hitwashinakajiwa, kutushi kuhasa kusema mwana.’ Gabriele yamba ngwenyi: ‘Ami kangutuma kuli Zambi hanga ngununehene lusango yono. Alioze amu kuushi kutayiza, mupwa kanaye ndo ha kusemuka cha mwana.’

Zekaria yanunga muma musandu kuhiana mashimbu waze apwile ni kulingamo. Hachino, muze atuhukilemo, atu te anamushimbwila haze yazanga kunyingika yize te yinalingiwako. Zekaria te keshi kuhasa kuhanjika. Kapwile ni kulahula wika moko jenyi. Chocho atu yanyingika ngwo Zekaria katambula sango ja kuli Zambi.

Ha mashimbu jacho Izabele yapwa kafumba nawa yashita mwana wa lunga ngwe chize ambile mungelo. Masepa ni asoko jenyi yeza ni kutala mwana wacho. Ayo yawahilila chinji hamwe nenyi. Izabele yamba ngwenyi: ‘Mutukamuluka jina lia Yoano.’ Ayo yamba ngwo: ‘Mu usoko wetu kumushi niumwe yoze ukwete jina lia Yoano. Muluke jina lia tato, Zekaria.’ Alioze Zekaria yasoneka ngwenyi: ‘Yoano lie jina lienyi.’ Kukatuka ha shimbu liacho, Zekaria yaputuka kuhanjika nawa! Sango hakutwala kuli mwana wacho yajinyingika mu Yunda mweswe, nawa atu yalihula ngwo: ‘Mwana wacho kuchi makapwa muze makola?’

 Chocho, Zekaria yazala too ni spiritu yisandu. Yaprofetizala ngwenyi: ‘Yehova afumane. Kalakenyene Apalahama ngwo te matuma chilamwina, Mesaya hanga atulamwine. Yoano makapwa profeta, nawa makalulieka jila hakutwala kuli Mesaya.’

Nawa chimwe chuma chilemu chalingiwile kuli usoko wa Izabele, Maria. Tuchitalenu ha longeso lize mulisulaho.