Muze te hasakula apostolo 12, Yesu yapalumuka ha mulundu ndo haze hapwile mbunga yinene ya atu. Ayo kakatukile ku Ngalileya, Yundeya, Teru, Sendone, Seria ni sali likwo lia Yordau. Kanehene atu waze apwile ni misongo ni amwe waze apwile ni kupinjisa kuli andemoniu. Yesu yaawuka eswe. Chocho yatwama hakachi ka mulundu nawa yaputuka kuhanjika. Iye yalumbununa yize twatamba kulinga nyi tunazange kupwa masepa ja Zambi. Twatamba kunyingika ngwetu, tunafupu Yehova ni kumuzanga. Chipwe chocho, kutuchi kuhasa kuzanga Yehova nyi kutushi kuzanga akwetu. Twatamba kupwa yimbovu ni kuzanga atu eswe, chipwe akwa-kole jetu.

Yesu yamba ngwenyi: ‘Kuchakumbanyine wika kuzanga masepa jenu. Nwatamba nawa kuzanga akwa-kole jenu ni kukonekena atu ni mbunge yeswe. Nyi umwe makulemeka ku mbunge, yako kuli iye kawashi-washi nawa mwite ukonekeno. Lingila akwenu yuma yize unazange hanga ayo akulingile.’

 Yesu nawa yahana atu chiyulo chipema hakutwala ku upite. Yamba ngwenyi: ‘Chili chilemu kupwa sepa lia Yehova kuhiana kuzanga kupwa ni mbongo jinji. Mwiji mahasa kukwiya mbongo jacho, alioze kukushi niumwe yoze mahasa kwiya usepa we ni Yehova. Echenu kulipikala hakutwala ku yize munulia, mununwa hanji munuzala. Talenu tujila. Zambi kakwalisa mashimbu eswe. Kulipikala chinji kuchishi kunuwezela matangwa anji ku mwono. Iwulukenu ngwenu, Yehova kananyingika yize nwakufupa.’

Atu jacho te kanda achivwa kama niumwe mahanjika ngwe Yesu. Mumu mangana a mayingeleja te keshi kulongesa yuma yacho. Mumu liaka Yesu apwile longeshi munene? Mumu yuma yeswe yize te akulongesa yakatukile kuli Yehova.