Muze Yesu te hamupapachisa kulu, spiritu yisandu yiyimutwala mu puya. Kakalile nichimwe ha matangwa 40, chocho yevwa zala yinji. Hachino, Ndiapu yeza ni kweseka Yesu ha kumwamba ngwenyi: ‘Nyi uli lume Mwana wa Zambi, lweza mawe wano hanga apwe mbolo.’ Alioze Yesu yamukumbulula hakutongola Yisoneko ngwenyi: ‘Chinasonewa ngwo, hi mbolo wika ko mujihana mutu mwono. Alioze mutu katamba kupanjika maliji eswe waze anakatuka kuli Yehova.’

Kusulaho, Ndiapu yasa Yesu mu cheseko ha kumwamba ngwenyi: ‘Nyi uli lume mwana wa Zambi, tumbuka kukatuka helu lia tembele ndo hashi. Mumu chinasonewa ngwo Zambi matuma angelo jenyi hanga akukwase.’ Alioze Yesu yatongola nawa Yisoneko ngwenyi: ‘Chinasonewa ngwo, kuwatambile kusa Yehova mu cheseko.’

Chocho, Satana yasolwela Yesu ma wanangana eswe a hano hashi ni upite hamwe ni uhenya wo, ni kumwamba ngwenyi: ‘Nyi munguwayila wika, mungukwaha ma wanangana wano eswe hamwe ni uhenya wo.’ Alioze Yesu yakumbulula ngwenyi: ‘Yako akuze Satana! Chinasonewa ngwo, watamba kuwayila wika Yehova.’

Hachino Ndiapu yaya kwenyi, angelo yeza nawa yahana Yesu kulia. Kukatuka ha shimbu liacho, Yesu yaputuka kwambujola sango lipema lia Wanangana wa Zambi. Uno we mulimo uze amutuminyine hano hashi. Atu te kakuzanga malongeso ja Yesu, nawa te kakumukaula kweswako maya.