LONGESO 80
Yesu Yasakula Apostolo Kumi ni Aali
Muze Yesu te hambujola ha mwaka umuwika ni ndambu, iye kapwile ni chiyulo chilemu cha kukwata. Aya te masakula hanga akalakale nenyi? Aya te mafumba hanga asongwele chikungulwila cha akwa-Kristu? Mba akwate chiyulo chacho, Yesu yafupa usongwelo wa Yehova. Chocho, yaya ku mulundu kuze te mahasa kupwa ukawenyi, nawa yalemba ufuku weswe. Ha chimene, Yesu yalikungulula ni amwe akuli tumbaji twenyi, chocho yasakula apostolo jenyi 12. Iya wa kuli ayo yoze unewuluka jina lienyi? Majina jo te Petulu, Andeleu, Tiangu, Yoano, Fwilipu, Mbatolomeu, Tomase, Mateu, Tiangu mwana wa Alefweu, Tateu, Semone ni Yundase Ka-Keriote.
Andeleu Petulu Fwilipu Tiangu
Apostolo Kumi ni aali te mapwa ni kulinga wenyi hamwe ni Yesu. Muze te haafumba kulu, yaatuma hanga aye ni kwambula ukawo. Yehova yaaha ndundo ja kutuhwisa andemoniu ni kuwuka akwa-misongo.
Yoano, Mateu, Mbatolomeu, Tomase
Yesu te kakuvuluka apostolo Kumi ni aali ngwo masepa jenyi, nawa te kakwaajikijila. A-Fwariseu te kakunyonga ngwo apostolo kapwile atu angwaza waze kakalilongesele. Alioze Yesu kaafumbile ha mulimo uze aehele. Ayo te mapwa hamwe ni Yesu ha mashimbu alemu ku mwono wenyi, muze te kanda afwa ni ha uhindukilo wenyi. Ngwe Yesu, anji akuli apostolo Kumi ni aali te aku Ngalileya. Amwe hakachi kwo te hanambata kulu.
Tiangu mwana wa Alefweu, Yundase Ka-Keriote, Tateu, Semone
Apostolo te yihenge nawa te kakulimbenja. Ha mashimbu amwe te kakuhanjika kalusulusu chakuhona kunyonga, nawa te kakukwata yiyulo yipi. Ha mashimbu akwo ayo te kakuhona uhumikizo. Nawa kapwile ni kulihamika hakachi ko hanga anyingike yoze munene wahiana. Chipwe chocho, kapwile atu apema waze te akuzanga Yehova. Ayo te mapwa fundamentu ya chikungulwila cha akwa-Kristu muze Yesu te maya kwenyi.
“Hingunanuvuluka ngwami, Tusendo; mumu yuma yize yeswe nevwile kuli Tata, hingunanunyingikisayo.” —Yoano 15:15
