Yuma yeswe yize te akulinga A-Fwariseu te kakuyilinga hanga akomwese atu. Nyi malinga chimwe chuma chipema, ayo te kakuzanga hanga atu eswe achimone. Ayo te kakulembela ha yihela ya mbunga hanga atu eswe ahase kwaamona. A-Fwariseu te kakupachikila mu mutwe yilemba yisuku-yisuku ni kuyifunyina mu masunangonga ni ha makano haze atu akwo mahasa kwaapanjika. Kashika, atu akomokene muze Yesu aalwezele ngwenyi: ‘Kanda nupwa ni kulemba ngwe A-Fwariseu. Ayo kakunyonga ngwe Zambi makomoka ha maliji anji waze akuhanjika, alioze Zambi keshi kuchilinga. Kulemba chili kuhanjika ni Yehova. Kashika muze unalembe kanda ufunyina yuma yoyene. Yehova kanazange hanga umulweze chize wakwivwa ku mbunge.

 ‘Nwatamba kulemba chino: “Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu.”’ Yesu yaalweza nawa ngwo, te katamba kulemba hakutwala ku kulia cho ha tangwa, ha ukonekeno wa shili yo, ni ha milonga yikwo ya ku mwono.

Yesu yamba ngwenyi: ‘Kanda nulitwamina kulemba. Nungenu ni kwita Tatenu, Yehova, yuma yipema. Chisemi mweswe kakuzanga kuhana yuma yipema kuli mwanenyi. Nyi mwane makwita lumbolo, shina mumwaha liwe? Nyi makwita yishi, kutala mumwaha kapela?’

Kulutwe Yesu yalumbununa longeso liacho ngwenyi: ‘Nyi nunanyingika kuhana yawana yipema kuli ana jenu, kuma Tatenu, Yehova, kechi kunwaha spiritu yisandu yahiana? Yeswe yize nunafupu kulinga etenu.’ Shina wakukaula chiyulo cha Yesu? Yuma yika yena wakwita mu yilemba ye?