Yesu kapwile ni masepa jenyi atatu waze te atwama mu Mbetaniya. Ayo kapwile Lazaru ni mapangi jenyi, Maria ni Marta. Ha limwe tangwa, muze Yesu te ali sali likwo lia Yordau, Maria ni Marta yamutumina sango ja kafuji-fuji ngwo: ‘Lazaru kanayiji chinji. Lisesa tweya kama kawashi!’ Alioze Yesu kakayile ha shimbu liacho. Yashimbwila ha matangwa aali, mba hi yalweza tumbaji twenyi ngwenyi:’Tuyenu ku Mbetaniya. Lazaru haya mu tulo, nawa ngunayi ngukamuhindwise.’ Apostolo yamba ngwo: ‘Nyi Lazaru haya mu tulo, chino muchimukwasa hanga alivwe kanawa.’ Hachino, Yesu yaalweza pundu ngwenyi: ‘Lazaru kafwa.’

Muze Yesu ahetele ku Mbetaniya, Lazaru te hamufunda kulu ha matangwa awana. Atu kayile ni kutakamisa Marta ni Maria. Muze Marta evwile ngwenyi Yesu haheta, iye yaya ni kumupatwiza. Yamba ngwenyi: “Mwene, nyi te wapwanga kuno, kachi ndumbwami kafwile.” Yesu yamwamba ngwenyi: ‘Ndumbwe kumahinduka. Marta, shina unafuliela hachino?’ Marta yamba ngwenyi: ‘Ngunafuliela ngwami makahinduka kulutwe lia matangwa.’ Yesu yamwamba ngwenyi: “We uhindukilo ni we mwono yami.”

Chocho, Marta yaya kuli Maria ni kumulweza ngwenyi: ‘Yesu haheta kuno.’ Maria yazomboka ndo kuli Yesu nawa mbunga yiyimukaula. Maria yafulamana ku molu ja Yesu, nawa te keshi kuhasa kuhola kulila. Yamba ngwenyi: ‘Mwene, nyi te wapwanga kuno, kachi ndumbwetu kali ni mwono!’ Yesu yamona yinyengo yo, neye yaputuka kulila. Muze mbunga yamwene Yesu kanalila, ayo yamba ngwo: ‘Kumana Yesu te kakuzanga chinji Lazaru.’ Alioze amwe yalihula ngwo: ‘Mba mumu liaka kalamwinyine sepa lienyi?’ Yika te Yesu malinga kusulaho?

Yesu yaya ku fuka, ku chikolo cha fuka liacho kwapwile liwe linene. Iye yamba ngwenyi: ‘Chizenuko liwe.’ Marta yamba ngwenyi: ‘Halinga matangwa awana! Mujimba wenyi waputuka kunuka.’ Chipwe chocho, yachizako liwe, nawa Yesu yalemba  ngwenyi: ‘Tata, ngunakusakwila mumu wakungwivwa, nawa ngunanyingika ngwami wakungwivwa mashimbu eswe, alioze ngunachambe hanga atu wano anyingike ngwo yena mwe wangutumine.’ Chocho yakololoka ngwenyi: “Lazaru tuhukamo!” Hikulingiwa chikomokeso: Lazaru yatuhuka mu fuka, wakulimba ni mahina. Yesu yamba ngwenyi: “Mujitulenu numweche aye.”

Atu anji waze achimwene yafuliela muli Yesu. Alioze amwe yaya ni kuchilweza kuli A-Fwariseu. Kukatuka ha tangwa liacho, A-Fwariseu yafupa kushiha Lazaru ni Yesu. Umwe wa kuli apostolo 12, Yundase Ka-Keriote ni ulembekese weswe, yaya kuli A-Fwariseu ni kwaahula ngwenyi: ‘Chingahi munungwaha nyi mungunukunjika Yesu?’ Ayo yalivwashana kumufweta mbongo ja prata 30, nawa Yunda yaputuka kufupa jila yakukunjikila Yesu kuli A-Fwariseu.