Yesu kejile hano hashi hanga ambujole sango lipema lia Wanangana wa Zambi. Mba asolole yize Yesu makalinga ngwe Mwanangana, Yehova yamwaha spiritu yisandu hanga alinge yikomokeso. Iye te mahasa kuwuka yikola yeswayo. Kweswako te akuya, akwa-misongo te kakwiza kuli iye hanga aakwase, nawa te kakwaawuka eswe. Tupuputa kamwene, tujika matwi kevwile, yilema kendele, nawa waze te akusongwela kuli andemoniu kaachijile mu yipikalo yacho. Chipwe te makwata wika ku songo lia hina lienyi, ayo te mahinduka. Atu te kakukaula Yesu kweswako te akuya. Chipwe muze te akuzanga kupwa ukawenyi, Yesu te keshi kuhilwisa atu waze apwile ni kumufupa.

Ha shimbu limwe, atu yatwala umwe lunga chilema ku zuwo kuze Yesu apwile. Alioze mu zuwo te mwa too ni atu, ayo kakahashile kunjilamo. Hachino, yalokola ha fulumba yapalumwisa lunga wacho ndo hali Yesu. Chocho Yesu yamulweza ngwenyi: ‘Katuka, nawa enda.’ Muze endele, atu yakomoka.

Ha shimbu likwo, muze Yesu te ananjila mu limwe limbo, akwa-mbumba kumi yamanyina hasuku nawa yaputuka ku kololoka ngwo: ‘Yesu, tukwase kama!’ Ha mashimbu jacho, akwa-mbumba te keshi kukundama kuli atu akwo. Yesu yalweza malunga jacho hanga aye ku tembele, ngwe chize Shimbi ya Yehova yambile ha yize akwa-mbumba atamba kulinga muze maawuka. Muze te achili mujila, ayo yahinduka. Muze umwe  wa kuli ayo anyingikine ngwenyi kaawuka, yafuna kuli Yesu hanga amusakwilile ni kuhalisa Zambi. Hakachi ka waze kumi, yono wika mwe wasakwilile Yesu.

Umwe pwo yoze te wayiza ha miaka 12, mbuki kakahashile kumuwuka. Chocho, yeza kunyima lia Yesu mukachi ka mbunga nawa yakwata ku songo lia hina lienyi. Hazehene, yahinduka ku yikola yenyi. Muze chino chalingiwile, Yesu yahula ngwenyi: “Iya wangukwata?” Pwo yevwa woma, alioze yaya kuli iye ni kumulweza umwenemwene. Yesu yamukolweza ha kumwamba ngwenyi: ‘Mwanami, yako ni sambukila.’

Umwe Kapitau yoze te avuluka ngwo Yaru yaliumba kuli Yesu ngwenyi: ‘Tuye kama ku zuwo liami! Mwanami wa pwo kanayiji chinji.’ Alioze muze Yesu te kanda aheta ku zuwo lia Yaru, mwana yafwa. Muze Yesu aheteleko, yamona ngwenyi atu anji ayileko hanga alilise usoko. Yesu yaalweza ngwenyi: ‘Echenu kulila, mumu mwana kanapombo wika.’ Chocho, yakwata ku kwoko lia mwana ni kumwamba ngwenyi: “Mwana-pwo, ngunambe kuli yena ngwami, hinduka!” Hazehene yahinduka, chocho Yesu yalweza yisemi jenyi hanga amwehe kulia. Yisemi jenyi yawahilila chinji!