Muze te hi kwasala hakehe hanga Chizomboka chiputuke ha mwaka 32 M.J., apostolo te kaneza mu mulimo wa kwambujola. Ayo te kanahongo chinji, hachino Yesu yaambata mu wato ndo ku Mbeteseta, kuze te mahasa kuhwima. Alioze muze wato wahetele kusesa lia lwiji, Yesu yamona tununu twa atu te anaakaula. Chipwe ngwe Yesu kazangile kupwa wika ni apostolo jenyi, nihindu iye yatambula atu jacho ni zango. Yawuka waze te ayiza nawa yaputuka kwaalongesa. Ha tangwa lieswe, Yesu yaalongesa hakutwala ku Wanangana wa Zambi. Muze kwatokele, apostolo yeza kuli iye ni kumwamba ngwo: ‘Atu kota kanevu zala. Eche hanga aye kwo hanji mahasa kuwana yimwe ya kulia.’

Yesu yamba ngwenyi: ‘Ayo katambile kuya. Ehenu kulia hanga alile hanohene.’ Apostolo yamba ngwo: ‘Shina unazange hanga yetu, tuye ni kwaalanjila mbolo nyi?’ Fwilipu, umwe wa kuli apostolo yamba ngwenyi: ‘Chipwe ngwe tuli ni mbongo jinji, kutuchi kulanda mbolo jize mujikumbana mbunga yeswe.’

Yesu yamba ngwenyi: ‘Shina tuli ni kulia chakumbana?’ Andeleu yakumbulula ngwenyi: ‘Tuli wika ni yipinji yitano ya mbolo ni yishi akehe-akehe aali. Kulia chino kuchakumbanyine.’ Yesu yamba ngwenyi: ‘Ngunehenenu mbolo ni yishi jacho.’ Yalweza atu hanga atwame ha yambu mu yizavu ya atu 50 ni 100. Yesu yanda mbolo ni yishi, yatala mwilu, nawa yalemba. Muze hahwisa, yahana kulia chacho kuli apostolo, nawa ayo yachihana kuli  mbunga. Malunga 5,000 ni mapwo ni ana eswe yalia yakuta. Kusulaho, apostolo yakunga kulia chize chasalileho, hanga chihone kupihia. Kazalishile mitonga 12! Chino te chikomokeso chinene, nyi ngwami?

Atu kakomokene chinji chocho yazanga kupwisa Yesu mwanangana wo. Alioze Yesu yanyingika ngwenyi, te hi shimbu ko lize Yehova mamupwisa mwanangana. Hachino, yalweza atu hanga aye kwo, nawa yalweza apostolo jenyi hanga aye sali likwo lia Kalunga-Lwiji wa Ngalileya. Ayo yanjila mu wato, alioze Yesu yaya ha mulundu kwaukawenyi. Mumu liaka? Mumu te kanafupu shimbu hanga alembe kuli Tato. Chipwe ngwe kapwile ni milimo yinji, nihindu Yesu kapwile ni kusa mashimbu hanga alembe.