Yoano kapwile ni kulongesa ngwenyi: ‘Umwe wahiana yami kaneza.’ Muze Yesu akumbanyishine miaka 30, iye yakatuka ku Ngalileya yaya ku Lwiji Yordau, kuze te Yoano anapapachishila atu. Yesu kazangile hanga Yoano amupapachise, alioze Yoano yamba ngwenyi: ‘Ami kuchatambile kukupapachisa. Ena mwe watamba kungupapachisa.’ Yesu yalweza Yoano ngwenyi: ‘Yehova kanazange hanga yena ungupapachise.’ Chocho, ayo yanjila mu Lwiji Yordau, Yoano yanjisa Yesu mu meya.

Muze Yesu atuhukile mu meya, iye yalemba. Ha mashimbu jacho, malilu yazuluka nawa spiritu ya Zambi yiyihulumuka hali iye ngwe katele. Chocho Yehova yaputuka kuhanjika kukatuka mu malilu ngwo: ‘Yena uli mwanami, ngunakuzange, nawa ngunakutayiza.’

Muze spiritu ya Yehova yejile hali Yesu, iye yapwa Kristu hanji Mesaya. Haliapwila iye te maputuka kulinga mulimo uze Yehova amutuminyine hano hashi.

Hazehene amupapachishile, Yesu yaya mu puya nawa yalingamo matangwa 40. Muze afunyine, yaya ni kutala Yoano. Muze Yesu te anakundama, Yoano yamwamba ngwenyi: ‘Au kali mwana-panga wa Zambi yoze unachiza shili hano hashi.’ Hakwamba maliji wano, Yoano te kanalweze atu hanga anyingike ngwo, Yesu mwe te Mesaya. Shina unanyingika yize yalingiwile kuli Yesu muze apwile mu puya? Tuyitalenu.