A-Fwariseu te kakwivwila Yesu kole nawa te kakufupa chitela hanga amukwate. Ayo yamba ngwo, iye katambile kuwuka atu ha tangwa lia Sambata. Ha limwe Sambata, Yesu yalitakana ni umwe kapuputa yoze te unaunjila ku sesa lia jila. Aye yalweza tumbaji twenyi ngwenyi: ‘Nutala chize ndundo ja Zambi mujikwasa yono lunga.’ Yesu yalinga ndambo ni mate jenyi, yayikwita mu meso lia lunga wacho. Yesu yamwamba ngwenyi: ‘Yako hanga usane kumeso mu chitende cha Sailome.’ Muze lunga wacho achilingile, yaputuka kumona.

Atu yakomoka chinji. Yahula ngwo: ‘Yono hi lunga ko yoze wakutwama ku tapalo ni kwitata mbongo, nyi kanalifu wika?’ Iye yamba ngwenyi: ‘Yami lume, yoze nasemukine kapuputa!’ Ayo yamuhula ngwo: ‘Yena te uli kapuputa, mba kuchi kunahase kumona?’ Muze aalwezele yize yalingiwileko, ayo yamutwala kuli A-Fwariseu.

Lunga wacho yalweza A-Fwariseu ngwenyi: ‘Yesu mwe wasanga ndambo mu meso jami ni kungulweza hanga nguye ni kusana kumeso. Yingulinga chocho, nawa yinguhasa kumona.’ A-Fwariseu yamba ngwo: ‘Nyi Yesu kakuwukanga ha tangwa lia Sambata, ndundo jacho hi ja kuli Zambi ko.’ Alioze atu akwo yamba ngwo: ‘Nyi ndundo jacho hi ja kuli Zambi ko, kachi iye kahashile kulinga chuma chamutapu au.’

A-Fwariseu yasanyika yisemi ja lunga wacho ni kwaahula ngwo: ‘Kuchi chapwa mba mwanenu ahase kumano?’  Yisemi jenyi yevwa woma mumu A-Fwariseu te hanambe ngwo mweswawo mafuliela muli Yesu te mamuhuma mu sunangonga. Hachino, ayo yamba ngwo: ‘Yize yalingiwa kuli iye kutwayinyingikine. Muhulenu mwene.’ A-Fwariseu yakokojola ni kuhula lunga wacho ndo haze ambile ngwenyi: ‘Hi nanulweza kulu yeswe yize ami ngunanyingika. Mumu liaka nunanungu ni kunguhula?’ Hachino, A-Fwariseu yevwa uli unji, chocho yamumbila haze.

Yesu yaya ni kuliwana ni lunga wacho, ni kumuhula ngwenyi: ‘Shina yena unafuliela muli Mesaya nyi? Iye yamba ngwenyi: ‘Nyi te ngunamunyingika, kachi nachilinga.’ Yesu yamwamba ngwenyi: ‘Ami mwe Mesaya.’ Yesu te katamba kupwa mutu wamutapu au, nyi ngwami? Iye kakawukile wika lunga wacho, alioze kamukwashile nawa kupwa ni ufulielo.