Muze Yesu apwile hamwe ni apostolo jenyi mu chipatulo cha kwilu, iye yaamba ngwenyi: ‘Yenu eswe mununguchina ha ufuku uno.’ Petulu yamba ngwenyi: ‘Yami ka! Chipwe ngwe akwetu eswe makuchina, yami ka.’ Alioze Yesu yamulweza ngwenyi: ‘Shimbu ndemba kanda achisanyika, yena mukalituna ha yisuho yitatu ngwo kuwangunyingikine.’

Muze maswalale atwalile Yesu ku zuwo lia Kayafwa, apostolo anji yachina. Alioze aali akuli ayo yamukaula, chocho yaya hamwe ni mbunga. Umwe wa kuli ayo te Petulu. Iye yaya ndo mu chota cha zuwo lia Kayafwa nawa yaputuka kwota kahia. Muze te ali kujiko, umwe kavumbi wa pwo yatala kuli Petulu ni kumwamba ngwenyi: ‘Ngunakunyingika! Ni yena te wakwenda hamwe ni Yesu!’

Petulu yalikala ngwenyi: ‘Ka, hi yami ko.’ Kuchanyingikine yize unambe!’ Chocho yaputuka kuya ku chikolo. Alioze hazehene kavumbi mukwo wa pwo yamumona ni kulweza mbunga ngwenyi: ‘Lunga au neye kapwanga hamwe ni Yesu!’ Petulu yamba ngwenyi: ‘Ami kuchanyingikine Yesu!’ Umwe lunga yamwamba nawa ngwenyi: ‘Yena uli umwe wa kuli ayo! Mumu kuhanjika che chinasolola ngwe uli Ka-Ngalileya, chinalifu ni cha Yesu.’ Alioze Petulu yalishinga ngwenyi: ‘Yono mutu kuchamunyingikine!’

Ha shimbu liacho, ndemba yasanyika. Petulu yamona Yesu kanateuluka ni kumutala. Yewuluka maliji ja Yesu, chocho yaya haze yaputuka kulila.

Ha shimbu likehe, akwa-kuyula mu Chota cha A-Yunda yakwata chiyulo cha kusopesela Yesu ku zuwo lia Kayafwa. Ayo te halitesa kulu hanga ashihe Yesu, haliapwila te kanafupu wika chitela. Alioze kakamuwanyine ni chitela nichimwe. Kusulaho, Kayafwa yahula Yesu ngwenyi: ‘Ngwo yena uli Mwana wa Zambi?’ Yesu yamba ngwenyi: ‘Nguli Mwana wa Zambi.’ Kayafwa yamba ngwenyi: ‘Kutwafupile nawa chitela chikwo. Chino chili kushililika!’ Ngaji  yamba ngwo: ‘Lunga yono katamba kufwa.’ Ayo yamulamba mbangala, yamufwila mate kumeso, yamufuka kumeso ni kumwamba ngwo: ‘Nyi uli profeta, tulweza kama yoze unakulambe!’

Muze kwachile, ayo yatwala Yesu mu Chota cha A-Yunda ni kumuhula nawa ngwo: ‘Yena uli Mwana wa Zambi?’ Yesu yakumbulula ngwenyi: ‘Yenu nwachamba ngwenu nguli Mwana wa Zambi.’ Hachino, yamumona ngwo kanashililika, chocho yamutwala ku zuwo lia Ponshu Pilatu, nguvulu Ka-Roma. Mba yika yalingiwileko? Tutalenu.