Mwata wa asasendote yatwala Yesu ku zuwo lia nguvulu. Pilatu yaahula ngwenyi: ‘Chitela chika nuli nacho hali yono lunga?’ Ayo yamba ngwo: ‘Iye kanaliambe ngwo kali mwanangana!’ Pilatu yahula Yesu ngwenyi: “Yena uli mwanangana wa A-Yunda?” Yesu yakumbulula ngwenyi: “Wanangana wami hi wa hashi ko.”

Chocho Pilatu yatuma Yesu kuli Heronde, nguvulu wa mu Ngalileya, hanga amone nyi mahasa kumuwana ni chimwe chitela. Heronde kakawanyine chitela nichimwe kuli Yesu, chocho yamufunyisa nawa kuli Pilatu. Hachino, Pilato yalweza mbunga ngwenyi: ‘Heronde kawanyine chitela nichimwe kuli yono lunga. Kashika ngunamutusula.’ Mbunga yiyikololoka ngwo: ‘Mushihe! Mushihe!’ Maswalale yalamba Yesu shikote, yamufwila mate ni kumupupula. Yamusa chifulu cha mbimbo ku mutwe ni kumulenya ngwo: ‘Vulie, Mwanangana wa A-Yunda.’ Pilatu yalweza nawa mbunga ngwenyi: ‘Kuchawanyine chitela nichimwe hali yono lunga.’ Chipwe chocho, ayo yakololoka ngwo: ‘Muhate ha mutondo!’ Hachino, Pilatu yaahayo hanga amushihe.

Ayo yaya ni Yesu ndo ha chihela chize te avuluka ngwo Ngolongota, yamuhata ha mutondo ni kuujika mwilu. Yesu yalemba ngwenyi: ‘Tata, akonekene, mumu keshi kunyingika yize analingi.’ Mbunga yiyilenya Yesu ni kumwamba ngwo: ‘Nyi uli Mwana wa Zambi, sunuka ha mutondo au hanga ulilamwine.’

Umwe wa kuli yingulungulu yatala Yesu ni kumwamba ngwenyi: “Ukangwiwuluka kama mu Wanangana we.” Yesu yamulakenya ngwenyi: “Kumukapwa hamwe ni yami mu paraisu.” Ha chingoloshi, chifuchi cheswe hichilaa pwi ha maola atatu. Amwe akuli tumbaji yamana hakamwihi ni nguji liacho, kuchingako Maria, naye ya Yesu. Yesu yalweza Yoano hanga afunge Maria ngwe naye wamusema.

Kusulaho, Yesu yamba ngwenyi: “Chinamanunuka!” Yahetamisa mutwe nawa yatusula mwono wenyi. Ha shimbu liacho, hikulingiwa munyiko unene. Mu tembele, hina lize te liakuteta muma Musandu  ni Musandu Mwahiana, yilipulika mu yihanda yaali. Umwe kapitau yamba ngwenyi: ‘Au lume te mwana wa Zambi.’