Muze Yesu afwile, pichi yoze te avuluka ngwo Yosefwe yeta kuli Pilatu hanga achize mujimba wa Yesu ku mutondo. Yosefwe yavunga mujimba ha limwe hina nawa yausa mu fuka liaha. Iye kapwile ni liwe lilemu, chocho yalisa ku chikolo cha fuka. Sasendote mwata yalweza Pilatu ngwenyi: ‘Tunevu woma ngwetu amwe akuli tumbaji twenyi meza ni kwanda mujimba wenyi hanga ambe ngwo kamuhindwisa ku ufwe.’ Hachino, Pilatu yaalweza ngwenyi: ‘Kolekenu fuka nawa lifungenu.’

Muze kwapalikile matangwa atatu, ha chimene, amwe mapwo yaya ku fuka chocho yawana liwe liakuchizako. Mukachi ka fuka, mwapwile mungelo, iye yaalweza ngwenyi: ‘Kanda nwivwa woma. Yesu kamuhindwisa. Yenu nukalweze tumbaji twenyi hanga akaliwane nenyi ku Ngalileya.’

Maria Mandalena kawashi-washi yaya ni kufupa Petulu ni Yoano. Yaalweza ngwenyi: ‘Umwe wambata mujimba wa Yesu!’ Petulu ni Yoano yazombokela ku fuka. Muze amwene ngwo mu fuka mwamokomoko, ayo yafuna kwo ku ma zuwo jo.

Muze Maria ahilukile ku fuka, yamona angelo aali mukachi nawa yaalweza ngwenyi: ‘Kuchanyingikine kuze ayo atwala mujimba wa Mwene wami.’ Chocho yamona umwe lunga, ni kunyonga ngwe kali njimi, yamwamba ngwenyi: ‘Mwata, lisesa ngulweze kama kuze wamutwala.’ Alioze muze lunga wacho ambile ngwenyi, “Maria!” iye yanyingika ngwo, kumana te Yesu. Yalila ni kwamba ngwenyi: “Longeshi!” yaliumba ku molu jenyi. Yesu yamulweza ngwenyi: ‘Yako ukalweze mandumbu jami ngwe wangumona.’ Chocho, Maria yazomboka ndo kuli tumbaji ni kwaalweza ngwenyi, kamona Yesu.

Ha chingoloshi, tumbaji aali a Yesu te kanakatuka ku Yerusaleme ni kuya ku Emeu. Umwe lunga yalichinga hamwe no mu tapalo ni kwaahula ha yize te ayo anahanjika. Ayo yamba ngwo: ‘Kuma yena kuwayivwile? Hi kwapalika matangwa atatu chize haze sasendote mwata atumine kushiha Yesu. Haliapwila amwe mapwo kanambe  ngwo iye kali ni mwono!’ Lunga wacho yaahula ngwenyi: ‘Kuma kunushi kufuliela kuli aprofeta? Ayo kambile ngwo, Kristu te mafwa nawa mamuhindwisa.’ Yanunga ni kwaalumbunwina Yisoneko. Muze ahetele ku Emeu, tumbaji yalweza lunga wacho hanga jiye hamwika. Ha mashimbu akulia muze te halembela mbolo, mba ayo yanyingika ngwo kumana te Yesu. Chocho yatoka.

Tumbaji wano aali yafuna kawashi-washi ku zuwo mu Yerusaleme kuze kwapwile apostolo ni kwaalweza yize yalingiwileko. Muze apwile mukachi ka zuwo, Yesu yasoloka kuli ayo eswe. Chitangu, apostolo kakatayijile ngwo te Yesu. Chocho iye yaamba ngwenyi: ‘Talenu mu moko jami; ngukwatenu. Hi chinasonewa ngwo Kristu te mamuhindwisa ku ufwe.’