Yesu ni apostolo jenyi kapalikile mu Chitwetwe cha Kendrone ni kuya ku Mulundu wa Olevwe. Te hakachi ka ufuku, nawa kakweji te kanasoloka mweswe. Muze ahetele mu munda wa Ngetesemane, Yesu yaamba ngwenyi: ‘Salenu hano hanga nunongame.’ Chocho, Yesu yasosoloka ndambu nawa yafulamana. Ni kulipikala cheswe, yalemba kuli Yehova ngwenyi: “Upale we ulingiwe.” Hohene Yehova yatuma mungelo hanga akolweze Yesu. Muze Yesu afunyine kuli apostolo jenyi, yaawana eswe atatu hapomba. Yaamba ngwenyi: ‘Hindukenu! Wano hi mashimbu ko akupomba! Ola hi yaheta hanga angukunjike mu moko ja akwa-kole jami.’

Ha shimbu likehe, Yundase yaheta hamwe ni chizavu cha maswalale waze te ali ni tutana hamwe ni masoka. Iye kanyingikine kuze te mawana Yesu, mumu ayo te kakuya chinji mu munda wacho. Yundase kalwezele maswalale ngwenyi, iye te maasolwela Yesu hakachi ko. Yaya ndo kuli Yesu ni kumwamba ngwenyi: ‘Longeshi, menekenu,’ chocho yamumbejala. Yesu yamba ngwenyi: ‘Yundase unangukunjika ni mbeju nyi?’

Yesu yaya ndambu kulutwe nawa yahula maswalale ngwenyi: “Iya nunafupu?” Ayo yamba ngwo: “Yesu Ka-Nazare.” Iye yakumbulula ngwenyi: “Yami mwe iye,” malunga jacho yaya ufuchanyima nawa yalimbuka hashi. Yesu yahula nawa maswalale jacho ngwenyi: “Iya nunafupu?” Ayo yamulweza nawa ngwo: “Yesu Ka-Nazare.” Yesu yakumbulula ngwenyi: ‘Ngunalulweza ngwami, yami mwe iye. Echenu wano malunga hanga aye kwo.’

Muze Petulu amwene yize te yinalingiwako, iye yatomona katana nawa yateta twitwi lia Malaku, umwe ngamba wa sasendote wa lutwe. Alioze Yesu yanda twitwi lia lunga wacho nawa yamuwuka. Chocho yalweza Petulu  ngwenyi: ‘Funyisa katana ke. Nyi mulipulwila ni katana, kumuukafwila ku katana.’ Maswalale yakwata Yesu ni kumukasa ku moko, hazehene apostolo yachina. Maswalale jacho yatwala Yesu kuli Anase sasendote mwata. Anase yasopesa Yesu chocho yamutwala ku zuwo lia Kayafwa Sasendote wa Lutwe. Mba yika yalingiwile kuli apostolo?