Mu Fwilipu, mwapwile umwe mwana-pwo yoze te ukwete ndemoniu. Ndemoniu wacho te kakuzachisa yono mwana-pwo hanga atahe, ni kulingila miata jenyi mbongo jinji. Muze Paulu ni Saila ayile ku Fwilipu, iye te kakwaakaula chinji. Ndemoniu wacho te kakumulingisa hanga akololoke ngwenyi: “Wano atu e ndungo ja Zambi Chitunda.” Hachino, Paulu yalweza ndemoniu wacho ngwenyi: ‘Mu jina lia Yesu tuhuka haze lia yono mwana-pwo!’ Ndemoniu yatuhuka muli mwana-pwo.

Muze miata ja mwana-pwo anyingikine ngwo kechi kwaalingila nawa mbongo, yevwa uli unji. Ayo yatwala Paulu ni Saila kuli nguvulu, ni kwamba ngwo: ‘Malunga wano keshi kukaula shimbi nawa kanapinjisa mbonge yeswe!’ Nguvulu yatuma kulamba Paulu ni Saila ni kwaasa mu kamenga. Kafunga yaasa mu chipatulo cha ha muchima, ni kwaasa mukuli.

Muze Paulu ni Saila te anahalisa Yehova ni miaso, funge akwo te kanapanjika. Susumuku, hakachi ka ufuku, yikulingiwa munyiko ukolo uze wanyikishile kamenga mweswe. Yajilo ya kamenga yiyazuluka, nawa funge waze te ali mukuli yatuhukamo. Kafunga yazombokela ku kamenga yamona yajilo yeswe yawashi. Yanyonga ngwenyi funge eswe kachina, chocho yanda katana hanga alishihe.

Hazehene Paulu yamwamba ngwenyi: ‘Kanda ulishiha!’ Yetweswe muno mutuli!’ Kafunga yayamo nawa yafulamana kulutwe lia Paulu ni Saila. Yaahula ngwenyi: ‘Yika natamba kulinga mba nguwane ulamwino?’ Ayo yamwamba ngwo: ‘Yena, ni akwa-zuwo lie nwatamba kufuliela muli Yesu.’ Hazehene Paulu ni Saila yaputuka kwaalongesa liji lia Yehova, chocho kafunga ni akwa-zuwo lienyi eswe yaapapachisa.