Umwe lunga te keshi kwenda nawa te kakutwama matangwa eswe ku chikola cha tembele ni kwitata mbongo. Ha chimwe chingoloshi, iye yamona Petulu ni Yoano kananjila mu tembele. Yaamba ngwenyi: ‘Lisesa ngwehenu kama mbongo.’ Petulu yamwamba ngwenyi: ‘Mungukwaha chuma chipema kuhiana mbongo jize unatwite. Mu jina lia Yesu, katuka, nawa enda!’ Chocho Petulu yamukwasa kukatuka, lunga wacho yaputuka kwenda! Mbunga yiyiwahilila chinji ha chikomokeso chacho, atu anji yafuliela.

Alioze asasendote ni A-Saduseu yevwa uli unji. Ayo yakwata apostolo, yaputuka kwaasopesa ni kwaamba ngwo: ‘Iya kevwe wanwaha ndundo mba nuwuke lunga yono?’ Petulu yamba ngwenyi: ‘Yesu Kristu yoze nwashihile mwe watwaha jo.’ Mangana a yingeleja yakolojoka ngwo: ‘Kanda nuhanjika nawa hakutwala kuli Yesu!’ Chipwe chocho, apostolo yamba ngwo: ‘Yetu twatamba kuhanjika hakutwala kuli iye. Kutuchi kwecha kuchilinga.’

Muze Petulu ni Yoano aatuswile, ayo yaya kuli tumbaji akwo ni kwaalweza yize yalingiwileko. Yalemba hamuwika, yeta kuli Yehova ngwo: ‘Lisesa tukwase hanga tupwe ni hamu tununge ni kulinga mulimo we.’ Yehova yaaha spiritu yenyi yisandu, chocho ayo yanunga ni kwambujola ni kuwuka atu. Atu anji yapwa tuvumbi twa Zambi. A-Saduseu kapwile ni kwivwa chipululu, chocho yakwata apostolo yaasa mu kamenga. Alioze ha ufuku, Yehova yatuma mungelo, yoze wazulwile yikolo ni kulweza apostolo ngwenyi: ‘Yenu mu tembele nawa putukenu kulongesa atu.’

Ha chimene, akwa-kuyula mu chota cha A-Yunda, waze te mangana a yingeleja yaalweza ngwo: ‘Kamenga kali wakuyika, alioze malunga waze twasangamo keshimo! Ayo kali mu tembele nawa kanalongesa atu!’ Apostolo yaakwata nawa ni kwaatwala mu  chota cha A-Yunda. Sasendote wa lutwe yamba ngwenyi: ‘Ngwami, twanukanjisanga ngwo kanda nuhanjika hakutwala kuli Yesu!’ Petulu yakumbulula ngwenyi: ‘Chatutamba kwononoka kuli Zambi ngwe mwanangana, hi kuli atu ko.’

Mangana a yingeleja yevwa uli unji, chocho yafupa kushiha apostolo. Alioze Ka-Fariseu yoze te avuluka ngwo Ngamaliele yamana ni kwamba ngwenyi: ‘Kanyamenu! Zambi mahasa kupwa hamwe ni malunga wano. Shina enu nunazange kulimika ni Zambi nyi?’ Ayo yakaula chiyulo chacho. Muze halamba apostolo, yaakanjisa nawa kwambujola, chocho yaecha hanga aye. Chipwe chocho, apostolo kakechele kwambujola. Ayo yanunga ni kwambujola sango lipema ni hamu lieswe, mu tembele ni ku zuwo ni zuwo.