Timoteu te mukweze yoze wapwile mu chikungulwila cha mu Lisetra. Tato te Ka-Ngregu, alioze naye te Ka-Yunda. Naye Unise, ni kako Loye kamulongesele hakutwala kuli Yehova kukatuka ku wanuke wenyi.

Muze Paulu amenekene Lisetra ha wenyi wamuchiali, iye kamwene ngwo Timoteu te kazanga chinji mandumbu ni kwaakwasa. Paulu yeta Timoteu hanga jiye hamuwika mu wenyi. Hakupalika cha mashimbu, Paulu yafumba Timoteu hanga apwe mukwa-kwambujola ni kulongesa sango lipema.

Spiritu yisandu te yakusongwela Paulu ni Timoteu kweswako te akuya. Ha umwe ufuku, mu usolwelo, umwe lunga yalweza Paulu hanga aye ku Masedoniya ni kwaakwasa. Chocho, Paulu, Timoteu, Saila, ni Luka yayako hanga ambujole ni kwazulula yikungulwila.

Mu Masedoniya mbonge ya Tesalonika, malunga ni mapwo anji yapwa akwa-Kristu. Alioze amwe akuli A-Yunda te kakwivwila Paulu ni waze apwile nenyi kuzo. Ayo yatwama punga chocho yatwala mandumbu wano kuli nguvulu wamu mbonge, nikwamba ngwo: ‘Malunga wano kali akwa-kole ja nguvulu wa Roma!’ Paulu ni Timoteu kapwile mu ponde, kashika achinyine ku Mberia.

Atu mu Mberia kapwile ni kulihulumba hanga alilongese sango lipema, kashika A-Ngregu ni A-Yunda waze apwilemo yaputuka kufuliela. Alioze muze amwe A-Yunda waze akatukile ku Tesalonika anehene mbwanja, Paulu yaya ku Atene. Timoteu ni Saila yasala mu Mberia ni kutakamisa mandumbu. Kulutwe Paulu yatuma Timoteu afune ku Tesalonika hanga akwase mandumbu anyongonone ha yihungumiona yize apwile ni kumona. Mba Paulu yatuma nawa Timoteu hanga ameneke yikungulwila yikwo yinji ni kutakamisa mandumbu.

Paulu yalweza Timoteu ngwenyi: ‘Waze eswe anazange kulingila Yehova makaahungumiona.’ Timoteu yamuhungumiona ni kumusa mu kamenga, mumu lia ufulielo wenyi. Chipwe chocho, iye yawahilila mumu lia ushishiko wenyi kuli Yehova.

Paulu yalweza A-Fwilipu ngwenyi: ‘Mungunutumina Timoteu. Makanulongesa chize chinalumbunuka kwenda mu umwenemwene, nawa makanulweza chize nwatamba kulinga mulimo wa Zambi.’ Paulu kapwile ni kujikijila hali Timoteu. Mumu ayo kakalakalile hamuwika ngwe masepa ha miaka yinji.