Apostolo kakawile shimbi ya Yesu ya kutwala sango lipema hashi heswe. Ha mwaka 47 M.J., mandumbu mu Andiakia yatuma Paulu ni Mbarnabe mu mulimo wa kwambujola. Akwa-kwambujola wano aali yenda mu Azia Yikehe yeswe, muyihela ngwe Lisetra, Ikoniu ni Ndervwe.

Paulu ni Mbarnabe te kakwambujola kuli mutu mweswawo, pichi hanji yiswale, akweze hanji makulwana. Atu anji yatayiza umwenemwene hakutwala kuli Kristu. Muze Paulu ni Mbarnabe ambulwile sango lipema kuli Sejiu Paulu, nguvulu wa Shipre umwe mukwa-tufutafuta yafupa kwaakanjisa. Paulu yalweza mukwa-tufutafuta ngwenyi: ‘Yehova keshi hamwe ni yena.’ Hazehene, mukwa-tufutafuta yapwa kapuputa. Nguvulu Sejiu Paulu muze achimwene, yaputuka kufuliela.

Paulu ni Mbarnabe kambulwile sango lipema kwekweswe, ku zuwo ni zuwo, ha yitanda, mu matapalo, ni mu masunangonga. Muze awukile umwe chilema mu Lisetra, waze amwene chikomokeso chacho, yanyonga ngwo ayo te tuzambi chocho yaputuka kwaawayila. Muze Paulu ni Mbarnabe achimwene yaakanjisa, hakwaamba ngwo: ‘Nwatamba kuwayila wika Zambi! Yetu tuli wika atu ngwe yenu.’ Hazehene amwe A-Yunda yeza ni kushinjila mbunga hanga yilimike ni Paulu. Mbunga yiyimwasa mawe, yimumbulumuna ndo haze lia mbonge, ayo yanyonga ngwe kafwa. Kumana Paulu te uchili ni mwono! Hazehene, mandumbu yeza ni kumukwasa nawa yamufunyisa mu mbonge. Kulutwe, Paulu yafuna ku Andiakia.

Ha mwaka 49 M.J., Paulu yaya nawa mu wenyi ukwo wakwambujola. Muze afunyine ni kutala mandumbu mu Azia Yikehe, iye yatwala nawa sango lipema kusuku, mu Europa. Yaya ku Atene, Efwesu, Fwilipu, Tesalonika ni ku yihela yikwo. Saila, Luka ni mukweze Timoteu eswe yaya hamwe ni Paulu mu wenyi. Ayo yakalakala hamuwika hakuputuka yikungulwila ni kukwasa mandumbu hanga ajame. Paulu yasala mu Korindu ha mwaka umuwika ni ndambu, hanga atakamise mandumbu. Yambujola, yalongesa nawa yasonekena yikungulwila yinji mikanda. Nawa te kakulinga mulimo wa mbalaka. Kulutwe Paulu yafuna ku Andiakia.

Ha mwaka 52 M.J., Paulu yaya mu wenyi wamuchitatu, yaputukila mu Azia Yikehe. Yaya ndo ku Fwilipu wa kusango mba yaya nawa mu Korindu. Paulu yatwama miaka yinji mu Efwesu, yalongesa, yawuka ni kukwasa yikungulwila. Nawa te kakuhanjika pande ja mbunga matangwa eswe mu yimwe shikola. Atu anji te kakumupanjika ni kwalumuna yitanga yo. Hi kusongo, muze te hambujola sango lipema mu yihela yinji, Paulu yafuna ku Yerusaleme.