Saulu te Ka-Roma mumu kasemukine mu Tarsu. Iye te Ka-Fariseu yoze wapwile ni kuvumbika shimbi ya A-Yunda, ni kuvwila kole akwa-Kristu. Iye te kakukwata akwa-Kristu malunga ni mapwo ku mazuwo jo ni kwaasa mu kamenga. Nawa kamanyine ni kutala malunga waze apwile ni kushiha kambaji Eshetevau.

Chipwe chocho, Saulu kakawahilile wika kukwata akwa-Kristu mu Yerusaleme. Iye yeta kuli sasendote wa lutwe hanga amutume ku mbonge ya Ndamaseku ahungumione akwa-Kristu waze te atwamako. Muze Saulu te anakundama ku mbonge, susumuku yikuhenya pangu haze apwile, chocho yalimbuka hashi. Yevwa liji ngwo: ‘Saulu, mumu liaka unanguhungumiona?’ Saulu yahula ngwenyi: ‘Yena iya?’ Yamukumbulula ngwenyi: ‘Yami Yesu. Yako ku Ndamaseku, mukanyingika yize watamba kulinga.’ Ha shimbu likehe, Saulu yapwa kapuputa, chocho yamukwata ku moko ni kumusongwela ndo mu mbonge.

Mu Ndamaseku, mwapwile mukwa-Kristu washishika yoze te avuluka ngwo Ananiya. Yesu yamulweza mu umwe usolwelo ngwenyi: ‘Yako ku zuwo lia Yundase mu tapalo lize avuluka ngwo Lialulama, ukafupe Saulu.’ Ananiya yamba ngwenyi: ‘Mwene, hingunevu kuli anji hakutwala kuli yono lunga! Hanatwale tumbaji twe anji mu kamenga!’ Alioze Yesu yamwamba ngwenyi: ‘Yako hanga umufupe. Yami hinamusakula kulu hanga atwale sango lipema ku mavungu anji.’

Hachino, Ananiya yawana Saulu ni kumulweza ngwenyi: ‘Saulu ndumbwami, Yesu kangutuma kuli yena hanga ngukulawise meso.’ Hazehene, Saulu yaputuka kumona nawa. Iye yalilongesa hakutwala hali Yesu nawa yapwa kambaji kenyi. Muze amupapachishile, yapwa mukwa-Kristu, chocho yaputuka kwambujola mu masunangonga, hamwe ni akwa-Kristu  akwo. A-Yunda kakomokene hakumona Saulu kanalongesa hakutwala kuli Yesu. Ayo yamba ngwo: ‘Shina lunga au, hi yoze ko te akutuma hanga ahungumione tumbaji twa Yesu?’

Saulu yambujola mu Ndamaseku, ha miaka yitatu. A-Yunda te kakumuvwila kole, chocho yakwata chiyulo hanga amushihe. Alioze mandumbu yamukwasa hanga achine. Yamusa mu chisoka nawa yamusunwishina haze lia yikalakala ya mbonge.

Muze Saulu ayile ku Yerusaleme, iye yafupa kulichinga ni mandumbu jako. Alioze kapwile ni kumuvwila woma. Chocho umwe kambaji chimbovu yoze te avuluka ngwo Mbarnabe yatwala Saulu kuli apostolo ni kwaalweza ni ushindakenyo ngwo Saulu kalumuna yitanga yenyi. Saulu yaputuka kwambujola sango lipema ni mbunge yeswe mu chikungulwila cha Yerusaleme. Kulutwe, yaputuka kumuvuluka ngwo Paulu.