Hakupalika cha mashimbu atu yaputuka kwoka hashi. Alioze anji akuli ayo te yingulungulu. Chipwe amwe angelo mu malilu no yalipwisa yingulungulu. Ayo kahichikile yihela yo mu malilu yeza hano hashi. Unanyingika chize achilingile? Kalingile chocho, ha kupwa ni mijimba ya atu hanga alimbate ni mapwo.

Angelo ni mapwo jacho yasema ana. Ana jacho yakola nawa yapwa akwa-tachi jinji. Kapwile ni kusosomba atu ni kwaalamba. Yehova kakazangile hanga yuma yacho yinunge ni kulingiwa. Kashika akwachile chiyulo cha kunongesa atu api ni sanga linene lia meya.

Alioze kwapwile umwe lunga walisa ni atu jacho. Iye te kakuzanga chinji Yehova. Jina lienyi te Noa. Kapwile ni pwo ni ana atatu waze te avuluka ngwo, Sheme, Hame ni Yafwe, nawa hita mwana kapwile ni mukwo-pwo. Yehova yalweza Noa atunge ulungu unene, hanga alilamwine ku Sanga Linene lia Meya hamwe ni usoko wenyi. Ulungu uli musheta unene uze muuhasa kuzazuluka helu lia meya. Yehova yalweza nawa Noa anjise tushitu anji mu ulungu, hanga no aalamwine.

Hohene, Noa ni usoko wenyi yaputuka kutunga ulungu. Ulungu wacho walingile miaka 50, mba yiuhwa. Ayo kalingile ulungu wacho kulita ni chize Yehova aalwezele. Ha shimbu liacho, Noa te kakutoweza atu hakutwala ku Sanga Linene lia Meya. Alioze niumwe wamupanjikile wakuhi.

Mba mashimbu akunjila mu ulungu yaheta. Tutalenu yize yalingiwileko.