Noa ni usoko wenyi hamwe ni tushitu yanjila mu ulungu. Yehova yayika pito, mba vula yiputuka kunoka. Kwanokene vula munji, chocho ulungu yiuputuka kuzazuluka helu lia meya. Hashi heswe yihazala too ni meya. Atu eswe waze apwile haze lia ulungu yafwa. Alioze Noa ni usoko wenyi kapwile ni mwono mukachi ka ulungu. Ayo kanakawahilila chinji mumu kwononokene Yehova.

Vula kanokene ha matangwa 40 ni ha ufuku 40, chocho, mba hi yahwa. Meya kapwile nikutepuluka hakehe-hakehe. Chocho ulungu yiutula helu lia milundu. Chipwe chocho, hashi heswe te hachili meya anji, kashika Noa ni usoko wenyi yanunga ni kushimbwila mu ulungu.

Meya yaputuka kutepuluka hakehe-hakehe. Noa ni usoko wenyi kapwile mu ulungu ha mwaka umuwika kuhiana. Mba, Yehova yaalweza hanga atuhuke mu ulungu ni kutwama mu chifuchi chaha, muze te kumushi nawa atu api. Ayo kanakasakwilila chinji Yehova hakwaalamwina. Chocho yasolola usakwililo wo ha kuhana mulambu kuli Yehova.

Yehova kanakawahilila chinji ni mulambu wacho. Iye yalakenya ngwenyi, kechi kazachisa nawa sanga lia meya hanga anongese yuma hano hashi. Mba Noa ni usoko wenyi ewuluke chilakenyo chacho, Yehova yaaha chimwe chilayi, hakwaasolwela kongolo mwilu. Shina ena hi unamona kama kongolo?

Chocho Yehova yalweza Noa ni usoko wenyi ngwenyi, semenu ana nuliokese nukazalise hashi.