Apalahama kalongesele mwanenyi Izake kuzanga Yehova ni kufuliela mu yilakenyo yenyi yeswe. Alioze muze Izake akumbanyishine miaka 25, Yehova yeta Apalahama hanga alinge chimwe chuma chikalu chinji. Chuma chika chenacho?

Zambi yalweza Apalahama ngwenyi: ‘Anda mwane wa wika, hanga umulambule kuli yami ngwe chitapo ha mulundu wa Moria.’ Apalahama kakanyingikine mumu liaka Yehova amwichile hanga alinge chuma cha mutapu au. Alioze aye yanunga ni kwononokena Yehova.

Ha tangwa lize liasulileho, ha chimene-mene Apalahama yanda Izake ni tuvumbi twenyi aali yaya ku Moria. Hakupalika cha matangwa atatu, ayo yaputuka kumona mulundu wa Moria. Apalahama yalweza tuvumbi twenyi hanga aashimbwile, muze iye ni Izake te anayi nikuhana chitapo. Apalahama yahana Izake kunyi hanga ambate, alioze iye yambata poko. Izake yahula tato ngwenyi: ‘Tata, mba kashitu yoze mutuhana ngwe mulambu kulihi ali? Apalahama yakumbulula ngwenyi: ‘Mwanami, Yehova kumatwaha kashitu yoze mutuhana ngwe mulambu.’

Muze ahetele ku mulundu wacho, ayo yatunga chilumbilo. Chocho, Apalahama yakasa moko ni molu ja Izake ni kumusa ha chilumbilo chacho.

Apalahama yakwata poko. Ha shimbu liacho, mungelo wa Yehova yamusanyika kukatuka mu malilu ngwenyi: ‘Apalahama! Kanda usa kwoko hali mwana! Haliapwila  ngunanyingika ngwami, wakufuliela muli Zambi mumu ni zango lieswe wahana mwane ngwe chitapo.’ Hachino, Apalahama yahetula meso jenyi, yamona panga unasakaminya mbinga jenyi mu lutandulwila. Hohene, yakasulula Izake ni kuhana panga wacho ngwe chitapo.

Kukatuka ha tangwa liacho, Yehova yavuluka Apalahama ngwenyi sepa lienyi. Ena unanyingika mumu liaka? Mumu Apalahama te kakulinga yuma yeswe yize Yehova akumwita, chipwe muze te keshi kunyingika mumu liaka anamwite hanga ayilinge.

Yehova yalakenya nawa Apalahama ngwenyi: ‘Mungukuwahisa, ni kwokesa ana je hanji munyachi we. Chino chinalumbunuka ngwo Yehova te mawahisa atu eswe apema kupalikila mu usoko wa Apalahama.