Mu undungo, A -Izalele kapwile ni kulinga milimo yikalu chinji. Yehova yatuma Mose ni Arone kuli Falau ni maliji wano ngwenyi: ‘Tusula atu jami aye kwo, hanga anguwayile mu puya.’ Falau yakumbulula ngwenyi: ‘Ami chichi kulinga yize Yehova anambe, nawa chichi kutusula A-Izalele mu moko jami.’ Hachino, Falau yaawezela nawa milimo yikwo yikalu chinji. Yehova te mahana fumbo kuli Falau. Yena unanyingika fumbo liacho? Iye yatuma Kumi lia Luyinda mu Engitu. Yehova yalweza Mose ngwenyi: ‘Falau keshi kungupanjika. Ha chimene-mene iye makaya ku Lwiji Nilu. Yako umulweze ngwo, amu keshi kwecha atu jami hanga aye kwo, meya eswe a Nilu makalumuka manyinga.’ Mose yakaula shimbi yacho nawa yaya kuli Falau. Falau yamona chize Arone te analambe lukanda wenyi mu Nilu, chocho lwiji mweswe yalumuna manyinga. Lwiji mweswe yaputuka kunuka vumba lipi, yishi eswe yafwa, nawa meya jamo te keshi kuwaha ni kwanwa. Chipwe chocho, Falau yalituna kutusula A-Izalele.

 Muze te hikwapalika matangwa shimbiali, Yehova yatuma nawa Mose kuli Falau ni maliji wano: ‘Nyi kuwatumine atu jami, mu Engitu, mukazala too ni mbwota.’ Arone yazundula lukanda wenyi, mbwota yalitanda mu chifuchi cheswe. Atu yaputuka kuwana mbwota mu mazuwo jo, ha mihela ni mu mandoho. Mbwota yazala too ku yihela yeswe! Falau yalweza Mose hanga ete Yehova ahwise luyinda wacho. Falau yalakenya ngwenyi matusula A-Izalele hanga aye kwo. Hachino, Yehova yahwisa luyinda wacho, alioze A-Engitu yaputuka kulumbieka-lumbieka mbwota waze afwile. Mu chifuchi yimuputuka kunuka. Chipwe chocho, Falau kakechele A-Izalele hanga aye kwo.

Hachino, Yehova yalweza Mose ngwenyi: ‘Arone katamba kulamba lukanda wenyi hashi, nawa fufuta muyalumuka tumwe, hanji puka.’ Hazehene, tumwe yalitanda ku yihela yeswe. Amwe tuvumbi a Falau yamulweza ngwo: ‘Luyinda yono kanakatuka kuli Zambi.’ Chipwe chocho, Falau te keshi kutusula A-Izalele hanga aye kwo.